2030 ގެ ފީފާ ވޯލްޑް ކަޕް 64 ޓީމަށް ފުޅާކުރުމަށް ފީފާގެ ރައީސް ވިސްނަވަނީ

2030 ވަނަ އަހަރުގެ ވޯލްޑް ކަޕް ފެށުމުގެ ކުރިން، މުބާރާތުގައި ވާދަކުރާ ޓީމުތަކުގެ އަދަދު އިތުރު 16 ޓީމާއެކު މުބާރާތް އިތުރަށް ފުޅާކުރުމުގެ ފުރުސަތު އޮތްތޯ ފީފާގެ އޮފިޝަލުން ބައްލަވާނެ ކަމަށް އެ އިދާރާގެ ރައީސް ޖިއާނީ އިންފަންޓީނޯ ވިދާޅުވެއްޖެ އެވެ.

ސްވިޒަލޭންޑްގެ މީޑިއާއެއް ކަމަށްވާ "ބްލޫވިން" އަށް ދެއްވި އިންޓަވިއުއެއްގައި އިންފަންޓީނޯ ވިދާޅުވީ، މުބާރާތުގައި ވާދަކުރާ ޓީމުތަކުގެ އަދަދު 48 އިން 64 އަށް އިތުރުކުރުމަކީ ހަމަޖެހޭ ކަމެއް ކަމަށް ފެންނަ ކަމަށެވެ. އަދި މިހާރު ކުރިއަށްދާ ވޯލްޑް ކަޕަށްފަހު، ކަމާގުޅޭ ކޮމިޓީތަކުގައި މި މައްސަލައާ މެދު ބަހުސްކޮށް، ދިރާސާކުރާނެ ކަމުގެ ޔަގީންކަން އޭނާ ދެއްވި އެވެ.

"ވޯލްޑް ކަޕެއް އިންތިޒާމުކުރާއިރު، އެއީ ހަމައެކަނި ޔޫރަޕާއި ދެކުނު އެމެރިކާއަށް އެކަނި އަމާޒުކޮށްގެން ކުރާ ކަމަކަށް ވެގެން ނުވާނެ. އެއީ މުޅި ދުނިޔެއަށް އަމާޒުކޮށްގެން ބާއްވާ މުބާރާތަކަށް ވާންޖެހޭނެ. ކޮންމެ ގައުމަކަށް ވެސް ވޯލްޑް ކަޕްގައި ކުޅުމުގެ ހުވަފެން ދެކުމުގެ ފުރުސަތު އޮންނަންވާނެ. މުޅި ދުނިޔޭގައި ވެސް ޓީމުތަކުގެ ފެންވަރު އަންނަނީ ވަރަށް ބޮޑަށް ރަނގަޅުވަމުން. ކުދި ގައުމުތަކަށް ވޯލްޑް ކަޕްގައި ބައިވެރިވުމުގެ ފުރުސަތު ނުދޭނަމަ، އެ ގައުމުތަކުގެ ފެންވަރު ރަނގަޅު ކުރުމަށް އޮންނަ ޝައުގުވެރިކަން ކުޑަވާނެ،" އިންފަންޓީނޯ ވިދާޅުވި އެވެ.

1998 ވަނަ އަހަރުން ފެށިގެން 2022 ވަނަ އަހަރާ ހަމައަށް ވޯލްޑް ކަޕްގައި ވާދަކުރަމުން އައީ 32 ޓީމެވެ. ނަމަވެސް މިހާރު ކުރިއަށްދާ 2026 ވަނަ އަހަރުގެ މުބާރާތަކީ 48 ޓީމާއެކު ބާއްވާ ފުރަތަމަ މުބާރާތެވެ.

މިހާރު ކުރިއަށްދާ މުބާރާތުގައި ބާކީ ތިބީ އާޖެންޓީނާ، އިންގްލެންޑް، ފްރާންސް އަދި ސްޕެއިން އެވެ. ކެނެޑާ، މެކްސިކޯ އަދި އެމެރިކާގައި ކުޅުމަށް ތާވަލުކުރި ޖުމްލަ 104 މެޗުގެ ތެރެއިން މިހާރު ބާކީ އޮތީ ސެމީ ފައިނަލްގެ ދެ މެޗާއި ފައިނަލް މެޗު އެކަންޏެވެ.

މުބާރާތުގައި 48 ޓީމު ބައިވެރިކުރުމަށް ނިންމި ނިންމުމަކީ ވަރަށް ބޮޑު ކާމިޔާބީއެއް ކަމަށް އިންފަންޓީނޯ ސިފަކުރެއްވި އެވެ.

އިންފަންޓީނޯ ވިދާޅުވީ ކޮންމެ ޓީމަކުން ވެސް ވަރަށް މަތީ ފެންވަރެއްގައި ކުޅެފައިވާ ކަމަށާއި، ހުރިހާ ބައްރުތަކެއްގެ ޓީމުތަކުން ވެސް ލަނޑު ޖަހައި، މަދުވެގެން އެއް ޕޮއިންޓް ހޯދާފައިވާ ކަމަށެވެ. "އެފްރިކާގެ 10 ޓީމުގެ ތެރެއިން 9 ޓީމެއް ވަނީ ނޮކްއައުޓް ބުރަށް ދަތުރުކޮށްފައި. އެންމެ ފަހުން ބޭއްވި ވޯލްޑް ކަޕްގައި އެފްރިކާއިން ބައިވެރިވީ އެންމެ 5 ޓީމު. މިއިން އެނގެނީ ހުރިހާ ޓީމުތަކެއް މުބާރާތުގައި ބައިވެރިކޮށް، މި ފުރުސަތު ދިނުމުގެ މުހިންމުކަން،" އޭނާ ވިދާޅުވި އެވެ.

2030 ވަނަ އަހަރުގެ ވޯލްޑް ކަޕް ބޭއްވުމަށް ހަމަޖެހިފައިވަނީ އެކި ބައްރުތަކަށް ބަހާލައިގެންނެވެ.

އެގޮތުން މުބާރާތުގެ ފުރަތަމަ ތިން މެޗު އުރުގުއޭ، އާޖެންޓީނާ އަދި ޕެރަގުއޭގައި ކުޅުމަށް ހަމަޖެހިފައިވާއިރު، ބާކީ މެޗުތައް ކުޅޭނީ މޮރޮކޯ، ޕޯޗުގަލް އަދި ސްޕެއިންގަ އެވެ. ޓީމުތަކުގެ އަދަދު 64 އަށް އިތުރުކޮށްފިނަމަ، ދެކުނު އެމެރިކާގެ ގައުމުތަކުގައި ހަމައެކަނި އެއް މެޗު ކުޅުމުގެ ބަދަލުގައި، ހަތަރު ޓީމު ހިމެނޭ ގްރޫޕެއްގެ ހުރިހާ މެޗެއް އެ ގައުމުތަކުގައި ބޭއްވުމުގެ ފުރުސަތު ލިބިގެންދާނެ އެވެ.