ރަހުނަކާ ނުލައި 150،000 ރުފިޔާއާ ހަމައަށް ފައިސާ ލިބޭ ފެސިލިޓީއެއް ބީއެމްއެލް އިން ތައާރަފް ކޮށްފި

އަލަށް ވިޔަފާރި ފަށާ ފަރާތްތަކަށް ޚާއްޞަ ކުރެވިފައިވާ "ޔޫތު އެންޓްރަޕްރިނިއަރޝިޕް ފައިނޭންސިންގ" ފެސިލިޓީ ރައީސް ޑރ. މުޙައްމަދު މުޢިއްޒު، ބުދަ ދުވަހު އިފްތިތާޙްކޮށްދެއްވައިފި އެވެ.

ބަރސެލޯ ނަސަންދުރާގައި ހެނދުނު އޮތް "ޔޫތު އޮންޓްރަޕްރަނަރސް އެކްސްޕޯ" ހުޅުވުމުގެ ރަސްމިއްޔާތުގައި އިފްތިތާހު ކުރި "ޔޫތު އެންޓްރަޕްރިނިއަރޝިޕް ފައިނޭންސިންގ" ފެސިލިޓީ އަކީ، ބޭންކް އޮފް މޯލްޑިވްސް (ބީއެމްއެލް) އާއި އެސްއެމްއީ ޑިޖިޓަލް ގުޅިގެން، ދިވެހި ޒުވާނުންނަށް ކުދި އަދި މެދު ފަންތީގެ ވިޔަފާރިތައް ފެށުމަށާއި އައު އީޖާދީ ޚިޔާލުތައް ދެމެހެއްޓެނިވި ވިޔަފާރިތަކަށް ބަދަލުކުރުމަށް މަގުފަހިކޮށްދިނުމުގެ ގޮތުން ތަޢާރަފުކުރެއްވި ފައިނޭންސިންގ ފެސިލިޓީއެކެވެ.

މި ފެސިލިޓީއަކީ އުމުރުން 18 އަހަރާއި 30 އަހަރާ ދެމެދުގެ ޒުވާނުންނަށް، އެއްވެސް ރަހުނެއް ނުވަތަ އިކުއިޓީއަކާ ނުލާ ނެގޭ ގޮތަށް ހުޅުވާލެއްވި ފުރުސަތެކެވެ. ޝަރުތު ހަމަވާ ފަރާތްތަކަށް 150,000 ރުފިޔާއާ ހަމައަށް ފައިނޭންސިންގ ލިބޭ މި ފެސިލިޓީއަކީ ވިޔަފާރިއެއް ފަށަން ބޭނުންވާ ޒުވާނުންނަށާއި ފްރީލާންސްކޮށް މަސައްކަތްކުރާ ފަރާތްތަކަށް އެމީހުންގެ މަސައްކަތް ފެށުމަށް ނުވަތަ ފުޅާކުރުމަށް ބޭނުންވާ ރައުސްމާލު ހޯދައިދިނުމަށް ހުޅުވާލެވުނު ފުރުސަތެއް ކަމަށް ރައީސް އޮފީހުން ބުނެ އެވެ. 

މީގެ އިތުރުން މިއަދުގެ ރަސްމިއްޔާތުގައި، ބީ.އެމް.އެލުން އަލަށް ޚިދުމަތްދޭން ފެށި 7 ބްރާންޗް، ރަސްމީކޮށް ރައީސް މުއިއްޒު ހުޅުއްވައިދެއްވި އެވެ. މި ބްރާންޗްތައް ގާއިމުކޮށްފައި ވަނީ، ހއ. ހޯރަފުށި، ށ. ކަނޑިތީމު، ރ. އަލިފުށި، ޅ. ހިންނަވަރު، އދ. މާމިގިލި، ގއ. ގެމަނަފުށި، އަދި ލ. މާވަށުގަ އެވެ. މިއާއެކު، ބޭންކް އޮފް މޯލްޑިވްސްއިން މި ވަނީ، ރާއްޖޭގެ 20 އަތޮޅުގައި، ޖުމްލަ 55 ބްރާންޗުން އެ ބޭންކުގެ ޚިދުމަތް ދޭން ފަށާފަ އެވެ. މީގެ ތެރޭގައި މިދިޔަ ދެއަހަރުތެރޭގައި ހުޅުވި 17 ބްރާންޗް ހިމެނެ އެވެ. 

ހަމަމިއާއެކު، ސައްތައިންސައްތަ ދިވެހި އުފެއްދުމެއް ކަމަށްވާ "ސްވައިޕް" މެދުވެރިކޮށް، ބައިނަލްއަޤުވާމީ އެކައުންޓްތައް ހުޅުވުމުގެ ފުރުޞަތުވެސް މިއަދުގެ ރަސްމިއްޔާތުގައި ވަނީ ރަސްމީކޮށް ތަޢާރަފުކޮށްފަ އެވެ. މި ޚިދުމަތް ތަޢާރަފުކޮށްދެއްވީ ބޭންކް އޮފް މޯލްޑިވްސްގެ ޗެއަރޕަރސަން އަޙްމަދު ޢަލީ ޙަބީބެވެ. މި ޚިދުމަތާއެކު އެމެރިކާ ޑޮލަރު، ޕައުންޑް އަދި ޔޫރޯ އެކައުންޓްތައް ހުޅުވުމުގެ ފުރުޞަތު ވަނީ ތަނަވަސްވެފަ އެވެ.

ސަރުކާރުން ބުނެފައިވަނީ 2030 ވަނަ އަހަރު އަންނަންވާއިރަށް ރާއްޖޭގެ ޤައުމީ އުފެއްދުންތެރިކަމުގެ (ޖީ.ޑީ.ޕީގެ) 15 އިންސައްތަ އަކީ "ޑިޖިޓަލް އިކޮނޮމީ" ނުވަތަ ޑިޖިޓަލް އިޤްތިޞާދުގެ ތެރެއިން ލިބޭ އާމްދަނީއަށް ހެދުމަށް އަމާޒުކޮށްފައިވާ ކަމުގަ އެވެ.