ރައީސް މުޢިއްޒު އާ ބައްދަލުކުރަން ބޭނުންވާ ފަރާތްތަކަށް ނަން ނޯޓު ކުރަން ހުޅުވާލައިފި
13 ޖުލައި 2026 | ހޯމަ 13:34ރައީސުލްޖުމްހޫރިއްޔާއާ ސީދާ ބައްދަލުކޮށް ޝަކުވާ ހުށަހެޅުމަށް ފުރުޞަތު ދިނުމަށް ފަށާ "ރައްޔިތުންގެ އަޑު" ސިލްސިލާގެ ފުރަތަމަ ބައްދަލުވުމުގައި ބައިވެރިވުމަށް ހަތަރު ދާއިރާއަކަށް ރައީސް އޮފީހުން ހުޅުވާލައިފި. މި ބައްދަލުވުމުގައި ބައިވެރިވާން އެދޭ ހުޅުމާލެ އުތުރު، ހުޅުމާލެ މެދު، ހުޅުދޫ އަދި ހޯރަފުށި ދާއިރާގެ ރައްޔިތުން މި މަހުގެ 15 ގެ ކުރިން ޕޯޓަލް މެދުވެރިކޮށް ނަން ނޯޓުކުރަން ޖެހޭ.
ސަރުކާރުން ބޭއްވި "އަންހެންވެރިންގެ ސައްލާ" މަސައްކަތު ބައްދަލުވުން ފެށުމުގެ ރަސްމިއްޔާތުގެ ތެރެއިން | ރައީސް އޮފީސް
ރައީސް ޑރ. މުޙައްމަދު މުޢިއްޒު އާ ބައްދަލުކުރަން ބޭނުންވާ ފަރާތްތަކަށް، ވީހާވެސް ފުޅާ ދާއިރާއެއްގައި އެފުރުޞަތު ދެއްވުމަށްޓަކައި ފަށްޓަވާ "ރައްޔިތުންގެ އަޑު" ސިލްސިލާގައި ބައިވެރިވާން އެދޭ ފަރާތްތަކަށް ނަން ނޯޓުކުރުމުގެ ފުރުޞަތު ހުޅުވާލައިފި އެވެ.
މުޅި ރާއްޖެއަށް ހުޅުވާލައިގެން ކުރިއަށްގެންދިއުމަށް ހަމަޖެހިފައިވާ މި ބައްދަލުވުންތަކުގެ ތެރެއިން ފުރަތަމަ ބައްދަލުވުމުގައި ފުރުޞަތު ހުޅުވާލަނީ، ރާއްޖޭގެ އިންތިޚާބީ 93 ދާއިރާގެ ތެރެއިން، ހުޅުމާލެ އުތުރު ދާއިރާ، ހުޅުދޫ ދާއިރާ، ހޯރަފުށި ދާއިރާ، އަދި ހުޅުމާލެ މެދު ދާއިރާއަށް ނިސްބަތްވާ ރައްޔިތުންނަށް ކަމަށް ރައީސް އޮފީހުން ބުނެފައިވެ އެވެ.
މި ދާއިރާތަކުން، "ރައްޔިތުންގެ އަޑު" ބައްދަލުވުމުގައި ބައިވެރިވާން އެދޭ ފަރާތްތަކުން ނަން ނޯޓުކުރާނީ، ރައީސުލްޖުމްހޫރިއްޔާގެ އޮފީހުގެ ވެބްސައިޓްގައި މިކަމަށް ޚާއްޞަކޮށްފައިވާ ޕޯޓަލް (https://rayyithungeadu.presidency.gov.mv/login/efaas) މެދުވެރިކޮށެވެ. މި ބައްދަލުވުންތަކުގައި ބައިވެރިވުމަށް އުސޫލެއް ހަމަޖައްސާފައިވާއިރު އުސޫލުވެސް، ރައީސް އޮފީހުގެ ވެބްސައިޓުން ފެންނާނެ ކަމަށް ރައީސް އޮފީހުން ބުނެފައިވެ އެވެ. ނަން ނޯޓުކުރުމުގެ ސުންގަޑިއަކީ، 15 ޖުލައި 2026 ވާ ބުދަ ދުވަހުގެ ރޭ 00:00 އެވެ.
ނިމިދިޔަ ޖޫން މަހުގެ 25 ވަނަ ދުވަހު ރައީސުލްޖުމްހޫރިއްޔާ ވަނީ، މިހާރަށްވުރެވެސް ބޮޑަށް، ސީދާ ރައްޔިތުންނާ ބައްދަލުކުރައްވައިގެން ރައްޔިތުންގެ ވާހަކަތައް އަޑުއެއްސެވުމުގެ މަޤުޞަދުގައި، ވަކިވަކި ދާއިރާތަކުން، ސީދާ އެމަނިކުފާނާ ވަކިވަކީން ބައްދަލުކުރައްވައިގެން ވާހަކަދެއްކުމުގެ ފުރުޞަތު ފަހިވާ ފަދަ ޕްރޮގްރާމެއް ދާދި އަވަހަށް ފަށްޓަވާނޭކަން އިޢުލާންކުރައްވާފަ އެވެ.
ރައީސް މުއިއްޒު އާ ބައްދަލު ކުރުމަށް އެދޭ ފަރާތްތަކުން އަމަލު ކުރަން ޖެހޭ އުސޫލުތަކުގެ ތެރޭގައި ބައްދަލުވުމުގައި ދެކެވޭ ވާހަކައިގެ އަޑާއި މަންޒަރު އަމިއްލަ އަށް ރެކޯޑް ކުރުމަކީ މަނާ ކަމެއް ކަމަށް ބުނެފައިވެ އެވެ. އަދި ފޮޓޯ ނެގުަމަށާއި ވީޑިއޯ ރެކޯޑް ކުރުމަށާއި އޯޑިއޯ ރެކޯޑް ކުރުމަށް މޯބައިލް ފޯނު އަދި އެހެން ވެސް ވަސީލަތެއް ބޭނުމެއް ނުކުރެވޭނެ ކަމަށް ބުނެފައިވެ އެވެ.
ބައްދަލުވުމުގައި ހުށަހެޅޭ ކަންކަން ހައްލުކޮށްދިނުމަށް ކަމާ ގުޅޭ އޮފީހަކަށް ފޮނުވުމުގެ އިޚްތިޔާރު ރައީސުލްޖުމްހޫރިއްޔާ އަށް ލިބިގެންވާ ކަމަށް ބުނެފައިވެ އެވެ.
ބައްދަލުވުމުގައި ބައިވެރިވާ ފަރާތްތަކުން އަމަލުތައް ބަހައްޓަންވާނީ އަދަބުވެރިކޮށް ކަމަށާއި، ބައްދަލުވުމުގެ ތެރޭގައި ބިރު ދައްކައި، ހުތުރު ބަހުން މުއާމަލާތް ކުރުމަށް ފުރުސަތު ނުދެވޭނެ ކަމަށް ވެސް 13 ނުކުތާގެ މައްޗަށް އެކުލަވާލާފައިވާ އުސޫލުގައިވެ އެވެ.
