2027 ވަނަ އަހަރުގެ ސައުތު އީސްޓް އޭޝިއަން ޕްލަސް ޔޫތު ގޭމްސްގެ އިންތިޒާމު ކޮމިޓީގެ ބައްދަލުވުމުގައި ރާއްޖެ އިން ބައިވެރިވެއްޖެ
ފިލިޕީންސްގައި ބާއްވާ މި މުބާރާތުގެ ތައްޔާރީތަކާ ގުޅޭގޮތުން ބޭއްވި ބައްދަލުވުމުގައި ރާއްޖެ ހިމެނޭހެން 17 ގައުމަކުން ބައިވެރިވެފައިވާއިރު، 23 ކުޅިވަރެއް ހިމަނައިގެން ބައިނަލްއަގުވާމީ ފެންވަރުގައި މުބާރާތް ބޭއްވުމަށް ވަނީ ރާވާފައި. އޮލިމްޕިކް ކުޅިވަރުތަކުގެ އިތުރުން މާޝަލް އާޓްސް އާއި ޕެރަ ސްޕޯޓްސް ހިމެނޭ މި މުބާރާތް ހަތަރު ސަރަހައްދަކަށް ބަހާލައިގެން ކުރިއަށްގެންދިއުމަށް ވަނީ ނިންމާފައި.
ސައުތު އީސްޓް އޭޝިއަން ޕްލަސް ޔޫތު ގޭމްސް ބޭއްވުމަށްޓަކައި ވާންޖެހޭ ތައްޔާރީތަކާއި ޕްލޭންތައް އެކުލަވާލުމުގެ މަސައްކަތް މިހާރު ވަނީ ފަށާފައި. | ޕީއޯސީ
ސައުތު އީސްޓް އޭޝިއަން ޕްލަސް ޔޫތު ގޭމްސް ބޭއްވުމަށް ވާންޖެހޭ ތައްޔާރީތައް ފަށައިފި އެވެ. 2027 ވަނަ އަހަރުގެ ޑިސެމްބަރު މަހު ބޭއްވުމަށް ތާވަލުކޮށްފައިވާ މި މުބާރާތުގެ ފުރަތަމަ އެޑިޝަނަށް ވާންޖެހޭ ތައްޔާރީތައް ފިލިޕީންސް އޮލިމްޕިކް ކޮމިޓީ (ޕީއޯސީ) އިން ރަސްމީކޮށް ފަށާފައިވަނީ މިދިޔަ ހޮނިހިރު ދުވަހު އެވެ. މި ބައްދަލުވުމުގައި މުބާރާތް ބާއްވާނެ ތަންތަނާއި މުބާރާތުގެ ޝެޑިއުލް ވަނީ ހާމަކޮށްފަ އެވެ.
ޕީއޯސީގެ ރައީސް އަބްރަހަމް ޓޮލެންޓީނޯ ރިޔާސަތު ބެލެހެއްޓެވި އިންތިޒާމުކުރާ ކޮމިޓީގެ މި ބައްދަލުވުމުގައި އާސިއާންގެ މެންބަރު ގައުމުތަކުގެ ނޭޝަނަލް އޮލިމްޕިކް ކޮމިޓީތަކުގެ މަންދޫބުންނާއި، މި ސަރަހައްދުން ބޭރުން ދައުވަތު ދެވުނު 17 ގައުމެއްގެ މަންދޫބުން ބައިވެރިވި އެވެ. މީގެ ތެރޭގައި ދިވެހިރާއްޖެ، ބޫޓާން، ނޭޕާލް، ޗައިނީޒް ތައިޕޭ، ބަހްރައިން، ގަތަރު، ސްރީލަންކާ އަދި ސައުދީ އަރަބިއްޔާ ހިމެނެ އެވެ.
ލޯކަލް އޮގަނައިޒިން ކޮމިޓީގެ ސީއީއޯ އަދި ރައީސް ރާމޮން ސުޒާރާ ވިދާޅުވީ، އެ ކޮމިޓީގެ އަމާޒަކީ ބައިނަލްއަގުވާމީ މިންގަނޑުތަކަށް ފެތޭ ފަދަ ފުރިހަމަ މުބާރާތެއް ބޭއްވުން ކަމަށެވެ. އަދި 23 ކުޅިވަރަކާއި ހަތަރު ކްލަސްޓަރަކަށް ބަހާލައިގެން ކުރިއަށްގެންދާ މި މުބާރާތް ބައިނަލްއަގުވާމީ ފެންވަރުގައި ކާމިޔާބުކަމާއެކު ބޭއްވޭނެ ކަމަށް ގަބޫލުކުރައްވާ ކަމަށްވެސް އޭނާ ވިދާޅުވި އެވެ. މި މުބާރާތުގައި ހިމެނުމަށް ހުށަހަޅާފައިވާ ކުޅިވަރުތަކުގެ ތެރޭގައި ފެތުމާއި އެތުލެޓިކްސް ފަދަ މަގުބޫލު ކުޅިވަރުތަކުގެ އިތުރުން، އޮލިމްޕިކް ކުޅިވަރުތައް ކަމަށްވާ ޓްރަޔަތުލޯން، ޖޫޑޯ، ބޮކްސިން، ގޯލްފް، ޓައެކްވަންޑޯ، ސްކޭޓްބޯޑިން، ރެސްލިން، ފެންސިން، ބާސްކެޓްބޯޅަ، ޓެނިސް އަދި ޖިމްނާސްޓިކްސް ހިމެނެ އެވެ. މީގެ އިތުރުން އޮލިމްޕިކްސްގައި ނުހިމެނޭ ކުޅިވަރުތައް ކަމަށްވާ ޖިއު-ޖިޓްސޫ، ބިލިއަޑްސް، ޑާންސްސްޕޯޓް، މިކްސްޑް މާޝަލް އާޓްސް (އެމްއެމްއޭ) އަދި ފިލިޕީންސްގެ ސަގާފީ މާޝަލް އާޓްސްއެއް ކަމަށްވާ "އަރްނިސް" ވެސް ހިމެނުމަށް ވަނީ ނިންމާފަ އެވެ.
މީގެ އިތުރުން، މުބާރާތުގެ ފަހު ތިން ދުވަހު ނުކުޅެދުންތެރިކަން ހުންނަ ފަރާތްތަކަށް ހާއްސަ "ޕެރަ ސްޕޯޓްސް" އިވެންޓުތައް ބޭއްވުމަށްވެސް އިންތިޒާމުކުރާ ފަރާތްތަކުން ދަނީ ރާވަމުންނެވެ. ކުޅިވަރުތަކާއި އިވެންޓުތަކުގެ އަދަދަށް ބަދަލު އައުމުގެ ފުރުސަތު އޮތް ނަމަވެސް، ކުރިއަށް އޮތް ދެ މަސްދުވަހުގެ ތެރޭގައި އެކަންކަން މުޅިން ފައިނަލް ކުރެވޭނެ ކަމަށް އިންތިޒާމުކުރާ ކޮމިޓީން ލަފާކުރެ އެވެ. މި މުބާރާތުގެ ކުޅިވަރުތައް ބޭއްވުމަށް ހުށަހަޅާފައިވާ ހަތަރު ސަރަހައްދަކީ މެނީލާ، ޕާސިގް، ސުބިކް އަދި ޓަގަޓޭ އެވެ. މި ސަރަހައްދުތަކުގައި މިހާރުވެސް ހުރި ވަސީލަތްތައް ބޭނުންކޮށްގެން މުބާރާތުގެ އެކި ކުޅިވަރުތައް ކުރިއަށް ގެންދިއުމަށް ވަނީ ހަމަޖެހިފަ އެވެ.
މަސްދަރު: ޕީއޯސީ
