ރަޝިޔާގެ ދެވަނައަށް އެންމެ ބޮޑު ސިޓީ ކަމަށްވާ ސެއިންޓް ޕީޓަސްބާގަށް ޔޫކްރެއިނުން ހަމަލާ ދީފި
ޔޫކްރެއިނުން ރަޝިޔާގެ ސެއިންޓް ޕީޓަސްބާގާއި ލެނިންގްރާޑް ސަރަހައްދުގެ ތެޔޮ ރައްކާކުރާ ވަސީލަތްތަކަށާއި ބަނދަރުތަކަށް އަމާޒުކޮށް ޑްރޯންގެ ވަރުގަދަ ހަމަލާތަކެއް ދީފި. މި ހަމަލާތަކުގައި ބައެއް އޮއިލް ޓާމިނަލްތަކަށް ގެއްލުން ލިބިފައިވާއިރު، ރަޝިޔާގެ ދިފާއީ ބާރުތަކުން ވަނީ ޔޫކްރެއިނުގެ ގިނަ އަދަދެއްގެ ޑްރޯންތައް ވައްޓާލާފައި.
ރަޝިޔާގެ ސެއިންޓް ޕީޓަސްބާގަށް ޔޫކްރެއިނުން ދިން ޑްރޯން ހަމަލާތަކެއްގައި އެ ސިޓީގެ އިންފްރާސްޓްރަކްޗަރަށް ބޮޑެތި ގެއްލުންތަކެއް ލިބި، އެ ސަރަހައްދުން ބޯ ދުން އަރަމުންދާ ކަމަށް އެ ގައުމުގެ ކަމާބެހޭ އިދާރާތަކުން ބުނޭ | ރޮއިޓާސް
ރަޝިޔާގެ ދެވަނައަށް އެންމެ ބޮޑު ސިޓީ ކަމަށްވާ ސެއިންޓް ޕީޓަސްބާގާއި އެ ސިޓީގެ ވަށައިގެންވާ ލެނިންގްރާޑް ސަރަހައްދުގެ ބަނދަރަކަށާއި ތެލުގެ ވަސީލަތްތަކަށް، ޔޫކްރެއިނުން ރޭގަނޑުގެ ވަގުތެއްގައި ޑްރޯން ބޭނުންކޮށްގެން ވަރުގަދަ ހަމަލާތަކެއް ދީފައިވާ ކަމަށް އެ ގައުމުގެ ކަމާބެހޭ ފަރާތްތަކުން ހޮނިހިރު ދުވަހު ބުނެފި އެވެ.
ސެއިންޓް ޕީޓަސްބާގްގެ ގަވަރުނަރު އެލެގްޒެންޑަރ ބެގްލޯވް ވިދާޅުވީ، 6 މިލިއަން މީހުންގެ އާބާދީއެއް އޮންނަ އެ ސިޓީއަށް ޔޫކްރެއިނުން "ބޮޑު" ޑްރޯން ހަމަލާއެއް ދީފައިވާ ކަމަށާއި، މި ހަމަލާގައި އެ ސިޓީގެ އޮއިލް ޓާމިނަލަށް ގެއްލުން ލިބިފައިވާ ކަމަށެވެ. ނަމަވެސް މި ހަމަލާގައި އެއްވެސް މީހަކަށް އަނިޔާއެއް ލިބިފައި ނުވާ ކަމަށާއި، ހަމަލާއާ ގުޅިގެން ކުރިމަތިވި ކަންކަން މިހާރު ހައްލުކޮށްފައިވާ ކަމަށް އޭނާ ވިދާޅުވި އެވެ.
ލެނިންގްރާޑް ސަރަހައްދުގެ ގަވަރުނަރު އެލެގްޒެންޑަރ ޑްރޮޒްޑެންކޯ ވިދާޅުވީ، ސެއިންޓް ޕީޓަސްބާގްގެ ހުޅަނގު އުތުރުން ގާތްގަނޑަކަށް 170 ކިލޯމީޓަރު (105 މޭލު) ދުރުގައި އޮންނަ ގަލްފް އޮފް ފިންލޭންޑްގެ ވައިސޮޓްސްކް ބަނދަރަށް ޑްރޯންތަކުން ހަމަލާދީފައިވާ ކަމަށެވެ. އެ ބަނދަރަކީ ތެލާއި، ގޮވާމާއި، އަދި އެލް.އެން.ޖީ ބޭރުކުރުމަށް ބޭނުންކުރާ މުހިންމު ބަނދަރެކެވެ.
ޑްރޮޒްޑެންކޯ އިތުރަށް ވިދާޅުވީ، ލެނިންގްރާޑް ސަރަހައްދުގެ ވައިގެ ސަރަހައްދުން ޔޫކްރޭނުގެ 72 ޑްރޯން ބަޑިޖަހައި ވައްޓާލާފައިވާ ކަމަށެވެ.
މި އަހަރުގެ ތެރޭގައި ޔޫކްރެއިނުން ވަނީ ރަޝިޔާގެ ހަކަތަ އުފައްދާ ވަސީލަތްތަކަށް ދޭ ހަމަލާތައް ވަރުގަދަކޮށްފަ އެވެ. މީގެ ސަބަބުން ރަޝިޔާގެ ބައެއް ސަރަހައްދުތަކުން ތެޔޮ ލިބުމަށް ވަނީ ދަތިތަކާ ކުރިމަތިވެފަ އެވެ.
ޔޫކްރެއިންގެ ބާރުގެ ދަށުގައިވާ ސަރަހައްދުތަކާ ގާތްގަނޑަކަށް 900 ކިލޯމީޓަރު (560 މޭލު) ދުރުގައި އޮންނަ ސެއިންޓް ޕީޓަސްބާގަށް، ކީވްގެ ޑްރޯންތަކުން ދޭތެރެ ދޭތެރެއިން ހަމަލާތައް އަމާޒުވެ އެވެ. މީގެ ކުރިން ދީފައިވާ ހަމަލާތަކުގެ ތެރޭގައި، މިދިޔަ ޖޫން މަހު ބޭއްވި ސެއިންޓް ޕީޓަސްބާގް އިންޓަނޭޝަނަލް އިކޮނޮމިކް ފޯރަމްގެ ތެރެއިން އެ ސިޓީގެ އޮއިލް ޓާމިނަލަށާއި ބަނދަރުކޮށްފައި އޮތް ހަނގުރާމަމަތީ މަނަވަރަކަށް ދިން ހަމަލާތައް ހިމެނެ އެވެ.
ސެއިންޓް ޕީޓަސްބާގްގެ ދެކުނުން އޮންނަ ޕްސްކޯވް ސަރަހައްދުގެ ގަވަރުނަރު ވިދާޅުވީ، ރޭގަނޑުގެ ވަގުތެއްގައި އެ ސަރަހައްދުން 30 އަށްވުރެ ގިނަ ޑްރޯން ބަޑިޖަހައި ވައްޓާލާފައިވާ ކަމަށެވެ. އޭނާ ރިޕޯޓްކުރެއްވި ގޮތުގައި މި ހަމަލާތަކުގައި ވެލިކިޔޭ ލޫކީ އަވަށުގައި ހުރި ފެކްޓްރީއަކަށް ކުދިކުދި ގެއްލުންތައް ލިބި، ބައެއް މީހުންނަށް ވަނީ އަނިޔާވެފަ އެވެ.
