ސެނެގާލް ވޯލްޑް ކަޕުން ކެޓުމުން ކޯޗު ޕާޕޭ ތިއޯ ވަކިކޮށްފި

2026 ވަނަ އަހަރުގެ ވޯލްޑް ކަޕްގެ ގަދަ 32 ގެ ބުރުން ސެނެގާލް ކެޓުމާ ގުޅިގެން، އެ ގައުމުގެ ގައުމީ ޓީމުގެ ކޯޗު ޕާޕޭ ތިއޯ މަގާމުން ވަކިކޮށްފި އެވެ.

2024 ވަނަ އަހަރުގެ ޑިސެމްބަރު މަހުން ފެށިގެން "ޓެރަންގާ ލަޔަންސް" ގެ ނަމުން މަޝްހޫރުވެފައިވާ ސެނެގާލް ޓީމަށް އިރުޝާދުދެމުން އައި ތިއޯގެ އިރުޝާދުގެ ދަށުން، މުބާރާތުގެ ގްރޫޕް ސްޓޭޖުގެ ފުރަތަމަ ދެ މެޗުގައި ފްރާންސާއި ނޯވޭ އަތުން އެ ގައުމު ވަނީ ބަލިވެފަ އެވެ.

ނަމަވެސް، ގްރޫޕް ސްޓޭޖުގެ ފަހު މެޗުގައި އިރާގު އަތުން 5-0 ގެ ތަފާތު ބޮޑު ނަތީޖާއަކުން މޮޅުވެ، ގްރޫޕްގެ ތިންވަނަ ހޯދި ޓީމުތަކުގެ ތެރެއިން އެންމެ ރަނގަޅު ނަތީޖާ ހޯދި ޓީމެއްގެ ގޮތުގައި ސެނެގާލް ވަނީ ނޮކްއައުޓް ބުރަށް ކޮލިފައިވެފަ އެވެ.

ގަދަ 32 ގެ ބުރުގައި ބެލްޖިއަމާ ދެކޮޅަށް ކުޅުނު މެޗުގައި ސެނެގާލުން ދެ ލަނޑުގެ ލީޑެއް ނަގާފައިވަނިކޮށް، މެޗުގެ ފަހުކޮޅު ބެލްޖިއަމުން ދެ ލަނޑު ޖަހައި ނަތީޖާ އެއްވަރުކުރި އެވެ. އަދި އިތުރު ވަގުތުގެ ތެރޭގައި ލިބުނު ޕެނަލްޓީއަކާއެކު 3-2 އިން ބެލްޖިއަމް އަތުން ބަލިވެ، ސެނެގާލް ވަނީ މުބާރާތުން ކަޓާފަ އެވެ.

މުބާރާތުން ކެޓުމާ ގުޅިގެން، ސެނެގާލްގެ މިހާރުގެ މެނޭޖްމަންޓް މަގާމުގައި ތިބިހާ ހިނދަކު ގައުމީ ޓީމަށް ކުޅުމުން "ބްރޭކެއް" ނަގާނެ ކަމަށް އެ ޓީމުގެ މިޑްފީލްޑަރު ޕާޕޭ ގޭ ވަނީ ބުނެފަ އެވެ.

ސެނެގާލް ފުޓްބޯޅަ ފެޑެރޭޝަން (އެފް.އެސް.އެފް) އިން ނެރުނު ބަޔާނެއްގައި ބުނެފައިވަނީ، ގައުމީ ޓީމުގެ ނަތީޖާތަކާއި ކުރިއަށް އޮތް ތަނުގައި ޓީމަށް ހުރި ފުރުސަތުތަކަށް ފުންކޮށް ބެލުމަށްފަހު، ސެނެގާލްގެ ފުޓްބޯޅައިގެ އެންމެ މަތީ މަސްލަހަތަށްޓަކައި ތިއޯ މަގާމުން ވަކިކުރުމަށް ނިންމާފައިވާ ކަމަށެވެ.

ސެނެގާލުން 2026 ވަނަ އަހަރުގެ ވޯލްޑް ކަޕާ ކުރިމަތިލީ، 2025 ވަނަ އަހަރުގެ އެފްރިކާ ކަޕް އޮފް ނޭޝަންސް (އެފްކޯން) ގެ ތަށި އެ ގައުމުގެ އަތުން އަތުލުމަށް ކޮންފެޑެރޭޝަން އޮފް އެފްރިކަން ފުޓްބޯޅަ (ކެފް) އިން ނިންމި ނިންމުން އިސްތިއުނާފު ކުރުމަށްފަހު އެވެ. އެ މުބާރާތުގައި ހިނގައިދިޔަ ހަމަނުޖެހުންތަކުގެ މައިގަނޑު އެއް ސަބަބަކީވެސް ކޯޗު ތިއޯ އެވެ.

މިދިޔަ ޖެނުއަރީ މަހު އޮތް އެފްކޯން ފައިނަލް މެޗުގެ އިތުރު ވަގުތުގެ ތެރޭގައި މޮރޮކޯއަށް ޕެނަލްޓީއެއް ދިނުމާ ގުޅިގެން، ތިއޯ ވަނީ އޭނާގެ ޓީމު ދަނޑުން ބާލާފަ އެވެ.

ގާތްގަނޑަކަށް 17 މިނެޓުގެ މެދުކެނޑުމަކަށްފަހު ކުޅުންތެރިން އަލުން ދަނޑަށް އެރިއިރު، މޮރޮކޯގެ ބްރަހީމް ޑިއާޒް ފޮނުވާލި ޕެނަލްޓީ ސެނެގާލްގެ ކީޕަރު ދިފާއުކުރި އެވެ. އަދި އޭގެ ފަހުން އިތުރު ވަގުތުގެ ތެރޭގައި ގޭ ޖަހައިދިން ލަނޑާއެކު ސެނެގާލް މެޗުން މޮޅުވި އެވެ.

ނަމަވެސް، ސެނެގާލްގެ ކުޅުންތެރިން ދަނޑުން ފޭބި މައްސަލައިގައި، މާޗް މަހު ކެފް އިން ވަނީ ފައިނަލް މެޗުގެ ނަތީޖާ ބަދަލުކޮށް، މޮރޮކޯއަކީ މުބާރާތުގެ ޗެމްޕިއަނުން ކަމަށް ކަނޑައަޅާފަ އެވެ.

މި މައްސަލަ ސެނެގާލުން މިހާރު ވަނީ ކޯޓް އޮފް އާބިޓްރޭޝަން ފޯ ސްޕޯޓްސް (ކާސް) އަށް ހުށަހަޅާފަ އެވެ. އެ ގައުމުން އުންމީދު ކުރަނީ އެފްކޯން ތަށި އަލުން އަނބުރާ ލިބޭނެ ކަމަށެވެ.