ވޯލްޑްކަޕް ކުއާޓާފައިނަލް: އިންގްލެންޑާއި ނޯވޭ، އާޖެންޓީނާ އާއި ސްވިޒަލޭންޑް ބައްދަލު ކުރާ މެޗުތަކުގެ، ޝެޑިއުލް، ޕްރިޑިކްޝަން، އެންމެ ފަހުގެ މައުލޫމާތު

2026 ވަނަ އަހަރުގެ ފީފާ ވޯލްޑް ކަޕްގެ ސެމީ ފައިނަލުގެ ފަހު ދެ ޖާގައަށް ވާދަކުރާ މެޗުތައް ހޮނިހިރު ދުވަހު އޮންނާނެ އެވެ. އެ ދުވަހު ކުޅޭ ފުރަތަމަ މެޗުގައި އިންގްލެންޑާއި ނޯވޭ ބައްދަލުކުރާއިރު، ދެވަނަ މެޗުގައި އެންމެ ފަހުގެ ޗެމްޕިއަން އާޖެންޓީނާ ނުކުންނާނީ ސްވިޒަލޭންޑާ ދެކޮޅަށެވެ.

މުބާރާތުގެ ސެމީ ފައިނަލުގެ ފުރަތަމަ ދެ ޖާގަ ފްރާންސާއި ސްޕެއިން މިހާރު ކަށަވަރުކޮށްފައިވާއިރު، ބާކީ އޮތް ދެ ޖާގައަށް މިހާރު ވާދަކުރަނީ ހަތަރު ޓީމެވެ.

"އޮޕްޓާ ސުޕަ ކޮމްޕިއުޓަރު" ގެ ތަފާސްހިސާބުތަކަށް ބަލާއިރު، ކުއާޓާ ފައިނަލުގެ މި މެޗުތަކުން މޮޅުވާނެ ކަމަށް ބޮޑަށް ބެލެވެނީ އިންގްލެންޑާއި އާޖެންޓީނާ އެވެ. ނަމަވެސް، ނޯވޭ އާއި ސްވިޒަލޭންޑުން މަސައްކަތް ކުރާނީ ނަތީޖާ އަނބުރާލައި ހައިރާންކުރުވަނިވި މޮޅެއް ހޯދުމަށެވެ.

މެޗުތަކާ ގުޅޭ މުހިންމު ތަފްސީލުތައް ތިރީގައި އެވަނީ އެވެ.

މެޗުތައް ކުޅޭނެ ތާވަލު:

- ނޯވޭ އަދި އިންގްލެންޑް: ޖުލައި 11 ވާ ހޮނިހިރު ދުވަހުގެ ހަވީރު 5:00 ގައި (ޖީއެމްޓީން 21:00) – އެމެރިކާގެ މިއާމީ ސްޓޭޑިއަމްގައި.

- އާޖެންޓީނާ އަދި ސްވިޒަލޭންޑް: ޖުލައި 11 ވާ ހޮނިހިރު ދުވަހުގެ ރޭ 8:00 ގައި (ޖީއެމްޓީން އާދީއްތަ ދުވަހުގެ 01:00) – އެމެރިކާގެ ކެންސަސް ސިޓީ ސްޓޭޑިއަމްގައި.

ސެމީ ފައިނަލަށް ދަތުރުކުރި ޓީމުތަކާއި މެޗުތައް:

- ފްރާންސް އަދި ސްޕެއިން: ޖުލައި 14 ވާ އަންގާރަ ދުވަހު (ޖީއެމްޓީން 19:00) – ޑަލަސް ސްޓޭޑިއަމްގައި.

- ނޯވޭ ނުވަތަ އިންގްލެންޑް އަދި އާޖެންޓީނާ ނުވަތަ ސްވިޒަލޭންޑް: ޖުލައި 15 ވަނަ ދުވަހު (ޖީއެމްޓީން 19:00) – އެޓްލާންޓާ ސްޓޭޑިއަމްގައި.

ނޯވޭ އާއި އިންގްލެންޑް ބައްދަލުކުރާ މެޗުގެ ލަފާކުރުންތައް:

މިއީ ވޯލްޑް ކަޕްގެ ތާރީޚުގައި އިންގްލެންޑާއި ނޯވޭ ބައްދަލުކުރާ ފުރަތަމަ ފަހަރެވެ. ނަމަވެސް، އެހެނިހެން މުބާރާތްތަކާއި އެކުވެރިކަމުގެ މެޗުތަކުގައި މި ދެ ޓީމު ވަނީ ޖުމްލަ 12 ފަހަރު ބައްދަލުކޮށްފަ އެވެ. މީގެ ތެރެއިން އަށް މެޗުން އިންގްލެންޑް މޮޅުވެފައިވާއިރު، ނޯވޭއަށް މޮޅުވެވިފައިވަނީ އެންމެ ދެ މެޗުންނެވެ. އަދި އެންމެ ފަހުން ކުޅުނު ހަތަރު މެޗުގައި ވެސް ނޯވޭއަށް އިންގްލެންޑް ކޮޅަށް ލަނޑެއް ޖެހިފައެއް ނުވެ އެވެ. މި ދެ ޓީމު އެންމެ ފަހުން ބައްދަލުކުރީ 2014 ވަނަ އަހަރުގެ ސެޕްޓެމްބަރު މަހު ކުޅުނު އެކުވެރިކަމުގެ މެޗެއްގަ އެވެ. އެ މެޗު 1-0 އިން ކާމިޔާބުކުރީ އިންގްލެންޑެވެ.

އޮޕްޓާ ސުޕަ ކޮމްޕިއުޓަރުން މެޗުގެ ނަތީޖާ ކުރިއަށް ލަފާކޮށް ހެދި ދިރާސާތަކަށް ބަލާއިރު، މެޗުގެ ފުރިހަމަ ވަގުތު ކަމަށްވާ 90 މިނެޓުގެ ތެރޭގައި އިންގްލެންޑް މޮޅުވުމުގެ ފުރުސަތު 50.4 އިންސައްތައަށް އޮތްއިރު، މިއީ އެ ޓީމު ސެމީ ފައިނަލަށް ދިއުމަށް އޮތް ބޮޑު ފުރުސަތެކެވެ. އިތުރު ވަގުތާއި ޕެނަލްޓީ ޝޫޓްއައުޓް ހިމެނޭހެން އިންގްލެންޑް މުބާރާތުގެ ކުރިއަށް ދިއުމުގެ ފުރުސަތު 62.3 އިންސައްތައަށް އަރަ އެވެ.

މި މެޗުގެ ފުރިހަމަ ވަގުތުގެ ތެރޭގައި ނޯވޭ މޮޅުވުމުގެ ފުރުސަތު އޮތީ 25.1 އިންސައްތަ އެވެ. އަދި 90 މިނެޓު ހަމަވާއިރު މެޗު އެއްވަރުވުމުގެ ފުރުސަތު އޮތީ 24.6 އިންސައްތަ އެވެ.

އާޖެންޓީނާ އާއި ސްވިޒަލޭންޑް ބައްދަލުކުރާ މެޗުގެ ލަފާކުރުންތައް:

މި ކުއާޓާ ފައިނަލަށް ނުކުންނައިރު ތާރީޚީ ތަފާސްހިސާބުތަކުން ބޮޑު ކުރިއެރުމެއް އޮތީ އާޖެންޓީނާއަށެވެ. އެންމެ ފަހުގެ ޗެމްޕިއަނުން ވަނީ މީގެ ކުރިން ސްވިޒަލޭންޑާ ދެކޮޅަށް ކުޅުނު ހަތް މެޗުން ވެސް ބަލިނުވެ ހިފަހައްޓާފަ އެވެ. އޭގެ ތެރެއިން ފަސް މެޗުން އާޖެންޓީނާ މޮޅުވިއިރު، ދެ މެޗު ނިމުނީ އެއްވަރުވެގެންނެވެ.

އޮޕްޓާގެ ތަފާސްހިސާބުތަކުން ދައްކާ ގޮތުގައި ސެމީ ފައިނަލުގެ ޖާގައެއް ހޯދުމުގެ އެންމެ ފުރުސަތު ބޮޑީ އާޖެންޓީނާއަށެވެ. ސުޕަ ކޮމްޕިއުޓަރުން ހެދި 25،000 ސިމިއުލޭޝަންތަކަށް ބަލާއިރު، ލިއޮނަލް މެސީގެ ޓީމު 90 މިނެޓުގެ ތެރޭގައި މޮޅުވުމުގެ ފުރުސަތު 57.1 އިންސައްތައަށް އޮތްކަމަށް ދައްކަ އެވެ.

މި މެޗުގެ ފުރިހަމަ ވަގުތުގެ ތެރޭގައި ސްވިޒަލޭންޑް މޮޅުވުމުގެ ފުރުސަތު އޮތީ 18.7 އިންސައްތަ އެވެ. އަދި 90 މިނެޓު ހަމަވާއިރު މެޗު އެއްވަރުވުމުގެ ފުރުސަތު އޮތީ 24.2 އިންސައްތަ އެވެ. ޖުމްލަ ގޮތެއްގައި ބަލާއިރު، އާޖެންޓީނާ ސެމީ ފައިނަލަށް ދިއުމުގެ ފުރުސަތު 69.4 އިންސައްތައަށް އޮތްއިރު، ސްވިޒަލޭންޑަށް އޮތީ 30.6 އިންސައްތައިގެ ފުރުސަތެކެވެ. މި މެޗުން މޮޅުވާ ޓީމެއް ސެމީ ފައިނަލުގައި ބައްދަލުކުރަން ޖެހޭނީ އިންގްލެންޑް ނުވަތަ ނޯވޭއާ އެވެ.

އިތުރު މުހިންމު ކަންތައްތައް: އިންގްލެންޑާއި ނޯވޭ: ވައިކިންގްސްގެ ކުރިމަތިލުމެއް

އިންގްލެންޑާއި ނޯވޭ ބައްދަލުކުރާ މެޗަކީ ތާރީޚީ ގޮތުން "ވައިކިންގްސްގެ ހަނގުރާމައެއް" ގެ ގޮތުގައި ސަޕޯޓަރުން ދަނީ ސިފަކުރަމުންނެވެ.

ކޭން އާއި ހާލަންޑްގެ އަޅާކިޔުންތަކަށް ކޭންގެ ޖަވާބު

ނޯވޭއާ ދެކޮޅަށް ކުޅޭ ކުއާޓާ ފައިނަލް މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި، އިންގްލެންޑްގެ ކެޕްޓަން ހެރީ ކޭން ވަނީ އޭނާ އާއި ނޯވޭގެ އާލިން ހާލަންޑާ ދެމެދު ކިޔާ އަޅާކިޔުންތަކަށް މާ ބޮޑު ސަމާލުކަމެއް ނުދޭކަމަށް ބުނެފަ އެވެ. ކޭން ބުނި ގޮތުގައި ދެ މީހުންނަކީ މުޅިން ތަފާތު ދެ ކުޅުންތެރިން ކަމަށްވާތީ، އެ ދެމީހުން އެއްވަރުކޮށް ގޮތް ނިންމުމަކީ އުނދަގޫ ކަމެކެވެ.

މި މެޗަކީ މުބާރާތުގެ އެންމެ ގިނަ ލަނޑު ޖަހާ ކުޅުންތެރިޔާއަށް ދޭ "ގޯލްޑަން ބޫޓް" ހޯދުމުގެ ރޭހުގައި ވެސް ވަރަށް މުހިންމު މެޗެކެވެ. މިހާތަނަށް ހާލަންޑް ހަތް ލަނޑު ޖަހާފައިވާއިރު، ކޭން ވަނީ ހަ ލަނޑު ޖަހާފައެވެ. މި ދެ ކުޅުންތެރިން ވެސް ދަނީ އަށް ލަނޑާއެކު ލިސްޓުގެ ކުރީގައި ތިބި ލިއޮނަލް މެސީ އާއި ކީލިއަން އެމްބާޕޭއާ އަރާ ހަމަކުރުމަށް މަސައްކަތް ކުރަމުންނެވެ.

މީގެ ތެރެއިން މޮޅީ ކޮން ކުޅުންތެރިއެއްތޯ ސުވާލުކުރުމުން، ކޭން ސީދާ ޖަވާބެއް ނުދިނެވެ.

"އަހަރެމެންނަކީ މުޅިން ތަފާތު ދެ ކުޅުންތެރިން،" އިންގްލެންޑްގެ ކެޕްޓަން ބުންޏެވެ. "ދެމީހުންނަކީ ވެސް ނަންބަރު ނުވައެއް (ސްޓްރައިކަރުން). އެކަމަކު އަހަރެމެން ކުޅޭ ގޮތް ތަފާތު. އަހަރެން ބޮޑަށް ބޭނުންވަނީ ބޯޅައާ އެކު ގިނަ ވަގުތު ހޭދަކޮށްގެން ކުޅެން، އެކަމަކު ހަމައެއާއެކު ސްޓްރައިކަރެއްގެ ދައުރު ވެސް އަދާކުރަން."

އޭގެ ބަދަލުގައި ކޭން ވަނީ ހާލަންޑްގެ ލަނޑު ޖެހުމުގެ ހުނަރަށް ވަރަށް ބޮޑަށް ތައުރީފުކޮށްފަ އެވެ.

"ޖިސްމާނީ ގޮތުން ބަލާއިރު އޭނާއަކީ މެޝިނެއް ފަދަ ވަރުގަދަ ކުޅުންތެރިއެއް. އޭނާގެ ފިނިޝިން ހުރީ އެންމެ މަތީ ފެންވަރުގައި، އަދި އޭނާ ޖަހާފައިވާ ލަނޑުތަކުގެ އަދަދުން އެކަން ސާފުވޭ،" ކޭން ބުންޏެވެ. "އަހަރެން އޭނާއަށް ވަރަށް އިހުތިރާމް ކުރަން. އެކަމަކު އުންމީދަކީ މާދަމާގެ މެޗުގައި އޭނާއަށް މާ ގިނަ ފުރުސަތުތަކެއް ނުލިބުން."