ޓެލެގްރާމްގެ ވެރިޔާ ޑޫރޯފް ގެ މައްޗަށް ފްރާންސުން ހިންގަމުންދާ ތަހުގީގުގައި ހަތަރުވަނަ ފަހަރަށް އޭނާ ހާޒިރު ކޮށްފި

ޓެލެގްރާމްގެ ކޯ-ފައުންޑަރ ޕަވެލް ޑޫރޯފްގެ މައްޗަށް ފްރާންސްގެ ތަހުގީގީ އިދާރާތަކުން ހިންގާ ޖިނާއީ ތަހުގީގަށް ދެ އަހަރު ފުރެން ގާތްވެފައިވާއިރު، އެއްވެސް ނަތީޖާއެއް ނުފެނި މައްސަލަ ދިގުލައިގެން ގޮސްފައިވާ ދަނޑިވަޅެއްގައި، ސުވާލުކުރުމަށް އޭނާ އަނެއްކާވެސް ހާޒިރުކޮށްފި އެވެ.

ލޯ އެންފޯސްމަންޓް އިދާރާތަކާ ހަވާލާދީ އެ ގައުމުގެ މީޑިއާތަކުން ރިޕޯޓްކޮށްފައިވާ ގޮތުގައި، ބުދަ ދުވަހު ޕެރިސް ޖުޑީޝަލް ޓްރައިބިއުނަލަށް ހާޒިރުކޮށް، ޑޫރޯފްއާ ހަ ގަޑިއިރެއްހާއިރު ވަންދެން ސުވާލުކޮށްފައިވެ އެވެ. މިއީ މި މައްސަލައިގެ ތަހުގީގަށް މި ޓެކްނޮލޮޖީ މަހުޖަނު ހާޒިރުކޮށް ސުވާލުކުރި ހަތަރުވަނަ ފަހަރެވެ.

ޑޫރޯފްގެ ގާނޫނީ ޓީމުން އޭއެފްޕީ ނިއުސް އެޖެންސީއަށް މިކަން ކަށަވަރުކޮށްދެމުން ބުނެފައިވަނީ، އޭނާގެ މައްޗަށް ދައުވާ އުފުލިތާ ގާތްގަނޑަކަށް ދެ އަހަރު ވެފައިވާއިރު، އެ ދައުވާތަކުގެ ސައްހަކަން ސާބިތުކޮށްދޭނެ އެއްވެސް ހެއްކެއް އަދިވެސް ފެންނަން ނެތް ކަމަށެވެ.

ޓެލެގްރާމުން ނެރުނު ވަކި ބަޔާނެއްގައި ބުނެފައިވަނީ، ފްރާންސްގައި ޑޫރޯފް ހިފެހެއްޓި ފަހުން އައި ހަމައެކަނި ބަދަލަކީ، ފްރާންސްގެ ކަމާބެހޭ ފަރާތްތަކުން ޓެލެގްރާމަށް ފޮނުވާ ރިކުއެސްޓްތައް ރަނގަޅު އުސޫލުން ލިޔަން ފެށުން ކަމަށެވެ.

ފްރާންސްގައި ޑޫރޯފް އަށް ގާނޫނީ މައްސަލަތައް ކުރިމަތިވާން ފެށީ 2024 ވަނަ އަހަރުގެ އޮގަސްޓް މަހު ޕެރިސްގެ އެއާޕޯޓަކުން އޭނާ ހައްޔަރުކޮށް، އެކި ބާވަތުގެ 12 ދައުވާއެއް އުފުލުމާ ގުޅިގެންނެވެ. ފުރަތަމަ އޭނާ ގައުމުން ބޭރަށް ދިއުން މަނާކުރި ނަމަވެސް، ފަހުން ވަނީ އެ ދަތުރުފަތުރުގެ ހުރަސްތައް އުވާލާފަ އެވެ.

ފްރާންސްގެ ޕްރޮސެކިއުޓަރުން ތުހުމަތުކުރާ ގޮތުގައި، ޓެލެގްރާމް މެދުވެރިކޮށް ހިންގާ ޖިނާއީ ކުށްތަކުގައި ޑޫރޯފްގެ ބައިވެރިވުން އެބައޮތެވެ. މި ތުހުމަތުތައް ބިނާކޮށްފައިވަނީ އެ ޕްލެޓްފޯމްގައި ހުންނަ ގާނޫނާ ހިލާފު ކޮންޓެންޓްތައް ބެލެހެއްޓުމުގައި ފަރުވާކުޑަކުރުމާއި، ތަހުގީގަށް އެއްބާރުލުން ދިނުމަށް ދެކޮޅު ހަދާފައިވާ ކަމަށް ބުނާ މައްސަލަތަކުގެ މައްޗަށެވެ.

ޑޫރޯފް ވަނީ އޭނާގެ މައްޗަށް ކުރެވޭ ހުރިހާ ތުހުމަތުތަކަކަށް އިންކާރުކޮށްފަ އެވެ. އަދި އޭނާ ހައްޔަރުކޮށް ދައުވާ އުފުލުމަކީ "ބުއްދި ގަބޫލުނުކުރެވޭ" ކަމެއްގެ ގޮތުގައި ސިފަކޮށް، ފްރާންސް ސަރުކާރުން މަސައްކަތް ކުރަނީ ހިޔާލު ފާޅުކުރުމުގެ މިނިވަންކަމަށް ހުރަސްއަޅަން ކަމަށް އޭނާ ވަނީ ތުހުމަތުކޮށްފަ އެވެ.