އެއަރ ފްރާންސުން ޕެރިހާއި މާލެއާ ދެމެދު ހަފްތާއަކު ދެ ދަތުރު ފަށަނީ

އެއަރ ފްރާންސުން މި އަހަރުގެ ޑިސެމްބަރު މަހުގެ 18 ވަނަ ދުވަހުން ފެށިގެން ޕެރިހާއި މާލެއާ ދެމެދު ހަފުތާއަކު ދެ ދަތުރު ކުރުމަށް ނިންމައިފިއެވެ.

އަންނަ ފިނި މޫސުމާ ދިމާކޮށް އެއަރ ފްރާންސުން ކުރިއަށްގެންދާ މި ސީޒަނަލް ދަތުރުތަކުގެ ދަށުން، 2026 ޑިސެމްބަރު 18 އިން ފެށިގެން ކޮންމެ އަންގާރަ އަދި ހޮނިހިރު ދުވަހަކު ޕެރިހުގެ ޗާލްސް ޑި ގޯލް އެއަރޕޯޓުން "އޭއެފް268" ފްލައިޓް ރާއްޖެއަށް ދަތުރުކުރާނެ އެވެ. އެއަރބަސް އޭ350-900 މަރުކާގެ ބޯޓުތަކުގައި ކުރާ މި ދަތުރުތައް 2027 މާރިޗު މަހުގެ 7 ވަނަ ދުވަހުގެ ނިޔަލަށް ކުރިއަށްދާނެ އެވެ.

ޕެރިހުން މާލެ އަށް ކުރާ ދަތުރުތަކަށް ހޭދަވާނީ ގާތްގަނޑަކަށް 10 ގަޑިއިރެވެ. މި ދަތުރުތަކުގައި ބޭނުންކުރާ އެއަރބަސް އޭ350-900 މަރުކާގެ ބޯޓުތަކުގައި ބިޒްނަސް ކްލާސް، ޕްރީމިއަމް އިކޮނޮމީ އަދި އިކޮނޮމީ ކްލާސް ހިމެނެ އެވެ. 

އެއަރ ފްރާންސުން އެންމެ ފުރަތަމަ އިއުލާންކުރީ 2026 ޑިސެމްބަރު 18 އިން 2027 ޖެނުއަރީ 3 އާ ހަމައަށް، ޗުއްޓީ ދުވަސްވަރާ ދިމާކޮށް ކުރު މުއްދަތަކަށް ދަތުރުތައް ބޭއްވުމަށެވެ. ނަމަވެސް، އެ އެއަރލައިނުން މިހާރު ވަނީ މި ދަތުރުތައް 2027 މާރިޗު 7 އާ ހަމައަށް އިތުރުކޮށްފަ އެވެ. މިއީ ރާއްޖޭގެ ފަތުރުވެރިކަމުގެ އެންމެ ބާރުބޮޑު ދުވަސްވަރު ކަމަށްވާ ފެބްރުއަރީ އަދި މާރިޗު މަހާ ދިމާވާ ގޮތައް ނިންމި ނިންމުމެކެވެ.