ސައުދީން އިންޑިއާ އާއި ބަންގްލަދޭޝް ހިމެނޭހެން ހަ ގައުމަކަށް އިލެކްޓްރޯނިކް ވިސާ ދޫކުރަން ނިންމައިފި

ސައުދީ އަރަބިއްޔާއިން އަލަށް ތައާރަފުކުރި "ވިސާ ޕެކޭޖް" އިސްލާމީ ގައުމުތަކާއި އެހެނިހެން ބައެއް ގައުމުތައް ހިމެނޭހެން ފުރަތަމަ މަރުހަލާގައި ހަ ގައުމަކަށް ދޫކުރަން ނިންމައިފި އެވެ. މި އައު އުސޫލުގެ ދަށުން ދަތުރުވެރިންނަށް ފްލައިޓާއި ހޮޓާ ބުކްކުރާ ވަގުތު، އެއާ އެކު ސައުދީގެ ޓޫރިސްޓް ވިސާ އިލެކްޓްރޯނިކްކޮށް ހޯދުމުގެ ފުރުސަތު ލިބިގެންދާނެ އެވެ.

ސައުދީ އަރަބިއްޔާގެ މިނިސްޓްރީ އޮފް ޓޫރިޒަމުން ހާމަކޮށްފައިވާ ގޮތުގައި، މި ވިސާ ޕެކޭޖް މިހާރު ލިބޭނީ އުރުދުން، މިސްރު، އިންޑިއާ، ބަންގްލަދޭޝް، އިންޑޮނޭޝިއާ އަދި މެކްސިކޯގެ ދަތުރުވެރިންނަށެވެ.

މި ޚިދުމަތަކީ ފްލައިޓް ޓިކެޓާއި، ހުރުމުގެ އިންތިޒާމާއި، އިލެކްޓްރޯނިކް ޓޫރިސްޓް ވިސާ އެއްކޮށްލައިގެން އެއް މަރުހަލާއެއްގެ ތެރެއިން ފޯރުކޮށްދޭ ޚިދުމަތެކެވެ. މީގެ ސަބަބުން ޝަރުތު ހަމަވާ ދަތުރުވެރިންނަށް، ވަކިން ޓޫރިސްޓް ވިސާއަށް އެދުމުގެ ބަދަލުގައި، ހުއްދަދެވިފައިވާ ޓްރެވަލް ޕެކޭޖެއް މެދުވެރިކޮށް ދަތުރުގެ ހުރިހާ އިންތިޒާމެއް ފުރިހަމަކުރުމުގެ ފުރުސަތު ލިބިގެންދާނެ އެވެ.

ދަތުރުގެ ޕެކޭޖް ގަނެ ނިމޭތާ ގިނަވެގެން 48 ގަޑިއިރު ނުވަނީސް، މި ވިސާ ޕެކޭޖްގެ ދަށުން އިލެކްޓްރޯނިކްކޮށް ވިސާ ދޫކުރާ ގޮތައް ވަނީ ހަމަޖެހިފަ އެވެ. މީގެ ސަބަބުން ސައުދީ އެމްބަސީއަށް ދިއުމުގެ ބަދަލުގައި ނުވަތަ ވަކިން ވިސާ އެޕްލިކޭޝަން ހުށަހެޅުމުގެ ބަދަލުގައި ފަސޭހަކަމާއެކު ވިސާ ލިބޭނެ މަގު ވަނީ ފަހިވެފަ އެވެ.

މިނިސްޓްރީން މައުލޫމާތު ދޭ ގޮތުގައި، މިއީ ތިން މަސްދުވަހުގެ މުއްދަތަށް ދޫކުރާ، އެއް ފަހަރު ބޭނުންކުރެވޭ (ސިންގަލް އެންޓްރީ) ޓޫރިސްޓް ވިސާއެކެވެ. މި ވިސާގައި ސައުދީ އަރަބިއްޔާގައި މަދުވެގެން ދެ ދުވަސް އަދި ގިނަވެގެން 88 ދުވަހު މަޑުކުރެވޭނެއެވެ. 

މި ޕެކޭޖް ފުރިހަމަވާނީ ދެކޮޅު ޓިކެޓް ކަށަވަރުވެފައި އޮތުމާއި، ޓޫރިޒަމް މިނިސްޓްރީން ހުއްދަދީފައިވާ މަދުވެގެން ހަތަރު ތަރީގެ ހޮޓަލަކުން ހުރުން ހަމަޖެހުމުގެ އިތުރުން، އިލެކްޓްރޯނިކް ވިސާ އެޕްލިކޭޝަން ހިމެނުމުންނެވެ.

މި ޕެކޭޖްގެ އެންމެ ކުޑަ އަގަކީ ބޮޑު މީހަކަށް ފުރަތަމަ ދެ ދުވަހަށް 4،000 ސައުދީ ރިޔާލެވެ. އަދި އޭގެ ފަހުން އިތުރުވާ ކޮންމެ ދުވަހަކަށް 1،000 ސައުދީ ރިޔާލަ އިތުރުވާނެ އެވެ.

ފްލައިޓާއި ހޮޓަލުގެ އިތުރުން، ދަތުރުވެރިން ބޭނުންނަމަ އެކި ހަރަކާތްތަކުގެ ޓިކެޓާއި މުނިފޫހިފިލުވުމުގެ ޚިދުމަތްތައް ފަދަ އިތުރު ކަންކަން ވެސް މި ޕެކޭޖްގައި ހިމެނިދާނެ ކަމަށް ވެސް ބުނެފައިވެ އެވެ.

މި ޕެކޭޖްތަކުގެ ތެރޭގައި މައްކާއާއި މަދީނާގެ ޚިދުމަތްތައް، މިސާލަކަށް އުމްރާގެ އިންތިޒާމުތައް ނުހިމެނުނު ކަމުގައި ވިޔަސް، މި ވިސާގައި ސައުދީއަށް އެތެރެވުމަށްފަހު އެ ގައުމުގެ ކޮންމެ ސަރަހައްދަކަށް ވެސް ދަތުރުކުރުމުގެ ހުއްދަ އޮންނާނެ އެވެ. މީގެ ތެރޭގައި މައްކާއާއި މަދީނާއަށް ޒިޔާރަތްކުރުން ވެސް ހިމެނެ އެވެ.