ބައެއް މީހުންގެ ގައިގައި މަދިރި މާބޮޑަށް ހަފަނީ ކީއްވެ؟

ދުނިޔޭގެ ކޮންމެ ތަނަކަށް ބަައެއް މީހުން ޗުއްޓީއަށް ދިޔަ ނަމަވެސް، އެއް ކަމެއް ކަށަވަރެވެ. އެއީ އެތަނެއްގައި މަދިރި އުޅޭނަމަ މަދިރި ހަފާނެ ކަމެވެ. އަދި އެއާއެކު މަދިރި ހެފުމުގެ ސަބަބުން ހަށިގަނޑުގައި އުފެދޭ ބޮޑެތި ފިތްތަކާއި ކަހާ ކެހުމުގެ އުނދަގޫ ހަފުތާތަކަކަށް ދެމިގެންދެ އެވެ.

ނަމަވެސް، އެކުގައި ތިބޭ އެހެން މީހުންނަށް މިފަދަ އެއްވެސް އުނދަގުލަކާ ކުރިމައްޗެއް ނުވެ އެވެ. އެމީހުންގެ ގައިގައި އެންމެ މަދިރިއެއްވެސް ނުހަފަ އެވެ. ސަމާސާގެ ގޮތުން ބުނާނަމަ ބައެއް މީހުންގެ ގައިގައި ހުންނަނީ މަދިރިއަށް ވަރަށް "މީރު ފޮނި" ލެޔެކެވެ.

ސައިންސްވެރިންގެ ހޯދުންތަކުން މަދިރި ބައެއް މީހުންނަށް ޝައުގުވެރިވާ ސަބަބުތައް މިވަނީ ދެނެގަނެވިފަ އެވެ. އަހަރެމެންގެ ހަށިގަނޑުން ބޭރުވާ ނޭވާ އާއި ހަށިގަނޑުގެ ވަހުގެ ތެރޭގައި ހިމެނޭ ބަޔޮލޮޖިކަލް މާކަރުތަކަކީ، މަދިރި ހަފާނީ ކާކުގެ ގައިގައިކަން ކަނޑައަޅާ ކަންކަމެވެ. ބައެއް މީހުންގެ ކިބައިގައި ހުންނަ މި މާކަރުތަކަކީ މަދިރިތައް ވަރަށް ބޮޑަށް ދަމައިގަންނަ ބާރުގަދަ އެއްޗެކެވެ.

މަދިރިތައް އިންސާނުން ހޯދާ ތިން ގޮތެއް ތިރީގައި އެވަނީ އެވެ.

ކާބަން ޑައިއޮކްސައިޑަކީ މަދިރި ހަފަންވީ ވަގުތު އަންގައިދޭ ސިގްނަލެއް

އިންސާނުންގެ ގައިގައި ހަފަނީ ހަމައެކަނި އަންހެން މަދިރި އެވެ. އެ ސޫފިތައް އިންސާނުންގެ ލެޔަށް ބޭނުންވަނީ، އޭގެ ބިސްތައް އުފެދުމަށް ބޭނުންވާ ޕްރޮޓީން ހޯދުމަށެވެ. ގާތްގަނޑަކަށް 10 މީޓަރު (33 ފޫޓު) ދުރުމިނުން މަދިރިތައް އެސޫފިތަކުގެ ޝިކާރަ ދެނެގަންނަނީ ފެނުމާއި ވަހުގެ ޒަރީއާއިންނެވެ. މީގެ ތެރޭގައި އަހަރެމެންގެ ނޭވާ އާއި ހަމުގެ ތެރެއިން ބޭރުވާ ކާބަން ޑައިއޮކްސައިޑް (CO2) ހިމެނެ އެވެ.

އިންސާނުން ބޭރުކުރާ ނޭވާގައި ހުންނަ ކާބަން ޑައިއޮކްސައިޑްގެ ސިގްނަލްގެ ސަބަބުން، މަދިރީގެ ވަސް ބަލާ ގުނަވަންތަކުގައި ހުންނަ "ޝިކާރަ ހޯދުމުގެ ބައި" ހަރަކާތްތެރިވާން ފަށަ އެވެ. ބޮޑެތި މީހުން ކުޑަކުދިންނަށްވުރެ ގިނައިން ކާބަން ޑައިއޮކްސައިޑް ބޭރުކުރާތީ، މަދިރިތައް ބޮޑެތި މީހުންނަށް މާ ބޮޑަށް ޝައުގުވެރިވެ އެވެ.

މީގެ މާނައަކީ އިންސާނުން ނޫން އެހެން ތަކެތިން ބޭރުވާ ކާބަން ޑައިއޮކްސައިޑަށްވެސް މަދިރި ދެނެގަންނަ ކަމެވެ. އެހެންކަމުން، "ޑްރައި އައިސް" އާއި ފުޅީގައި ހުންނަ ކާބަން ޑައިއޮކްސައިޑަކީ މަދިރި ހިފާ ދަންތުރަ ހެދުމަށް ބޭނުންކުރާ ބޭނުންތެރި ވަސީލަތްތަކެކެވެ. ސައިންސްވެރިން ބުނާ ގޮތުގައި، އެއް ތަނެއްގައި ހަތަރު މީހުން ތިއްބަސް، އޭގެ ތެރެއިން އެކަކުގެ ގައިގައި 90 އިންސައްތަ މަދިރި ހަފާފާނެ އެވެ.

ހަށިގަނޑުގެ ހޫނުމިނަކީ މަދިރި ޝައުގުވެރިކުރުވާ ކަމެއް

ދިރާސާތަކުން ދައްކާ ގޮތުގައި މަދިރިތައް ހޫނާއި ތެތްކަމަށް ޝައުގުވެރިވެ އެވެ. އަދި ކާބަން ޑައިއޮކްސައިޑްގެ ސަބަބުން މި ހޫނަށް ހުންނަ ޝައުގުވެރިކަން އިތުރަށް ބޮޑުވެ އެވެ.

މި ސަބަބަށްޓަކައި، މާބަނޑު ނޫން އަންހެނުންނާ އަޅާބަލާއިރު މާބަނޑު އަންހެނުންގެ ގައިގައި މަދިރި ހެފުމުގެ ފުރުސަތު ދެގުނަ އިތުރެވެ. އެއީ މާބަނޑުވުމުން ހަށިގަނޑުގެ މެޓަބޮލިޒަމް އިތުރުވެ، ނޭވާލާ މިންވަރު އިތުރުވުމުގެ ސަބަބުން، ހަށިގަނޑުން ބޭރުވާ ހޫނާއި ކާބަން ޑައިއޮކްސައިޑްގެ މިންވަރު އިތުރުވާތީ އެވެ.

ކަސްރަތު ކުރާ މީހުންގެ ހަށިގަނޑުގެ މެޓަބޮލިޒަމް އިތުރުވެ، ކާބަން ޑައިއޮކްސައިޑް ގިނައިން އުފެދި، ހަށިގަނޑު ހޫނުވެ ދާހިއްލާތީ، ކަސްރަތު ކުރާ ވަގުތާއި އޭގެ ފަހުން ވަގުތީ ގޮތުން މަދިރިތައް އެމީހުންނަށް މާ ބޮޑަށް ޝައުގުވެރިވެ އެވެ. ހަށިގަނޑު ބޮޑެތި މީހުންނަކީ އާންމުކޮށް ގިނައިން ހޫނު އުފައްދާ އަދި ގިނައިން ކާބަން ޑައިއޮކްސައިޑް ބޭރުކުރާ ބަޔަކަށް ވާތީ، އެމީހުންގެ ގާތަށްވެސް މަދިރި ދިއުން ގާތެވެ.

ހަމުން ބޭރުވާ ވަހަކީ މަދިރި ދެނެގަންނަ އެއްޗެއް

މަދިރިތައް އިންސާނުންނާ ގާތްވަމުންދާއިރު (10 މީޓަރަށްވުރެ ކައިރިވުމުން)، އެ ސޫފިތައް ޝިކާރަ ދެނެގަންނަނީ ހަމާއި ނޭވާގެ ވަސް ފަދަ ތަފާތު ނިޝާންތަކުންނެވެ.

ސައިންސްވެރިން ބުނާ ގޮތުގައި މަދިރި ހަފާނީ ކާކުގެ ގައިގައިކަން ކަނޑައަޅަނީ މައިގަނޑު ގޮތެއްގައި ވަހުންނެވެ. "

ސައިންސްވެރިން ވަނީ "ފޮނި ލޭ" ހުންނަ މީހުންގެ ގައިގައި މަދިރި ހަފާ ކަމަށް ބުނާ ވާހަކައަކީ ހަގީގަތެއް ނޫންކަން ސާބިތުކޮށްދީފަ އެވެ. އޭގެ ބަދަލުގައި މަދިރިތައް ދަމައިގަންނަނީ ކޮންމެ މީހެއްގެ ހަމުން ބޭރުވާ ހާއްސަ ވަހަށެވެ. ހަމުގައި ހުންނަ މައިކްރޯބްތަކުން ކާބޯހައިޑްރޭޓްސް، ފެޓީ އެސިޑްސް އަދި ޕެޕްޓައިޑްސް ފަދަ މާއްދާތައް "ވޮލަޓައިލް އޯގަނިކް ކޮމްޕައުންޑްސް" (VOCs) އަށް ބަދަލުކޮށްލަ އެވެ. މިއީ ވަރަށް ފަސޭހައިން ވައިގެ ތެރެއަށް ފެތުރޭ އެއްޗެހި ކަމުން، މަދިރިތަކަށް މީގެ ތަފާތު ދެނެގަނެވެ އެވެ. އަހަރެމެންގެ ހަމުގައި 500 އަށްވުރެ ގިނަ މިފަދަ ކޮމްޕައުންޑްތައް ހުރެ އެވެ. ސްޓީވް ލިންޑްސޭ ވިދާޅުވާ ގޮތުގައި، މަދިރިތައް ތިބާއަށް ޝައުގުވެރިވާ މިންވަރަކީ އާންމުކޮށް ބަދަލުނުވެ ހުންނަ ކަމެކެވެ.

މަދިރިއަކީ މިހާރުވެސް އަހަރެމެންގެ ހަމުގައި ހުންނަ އެމޯނިއާ އާއި ލެކްޓިކް އެސިޑަށް ދަމައިގަންނަ އެއްޗެހި ކަމަށްވާއިރު، ކާބޮކްސިލިކް އެސިޑް ހުރުމުން މި ޝައުގުވެރިކަން އިތުރަށް ބޮޑުވެ އެވެ.

އެމެރިކާގެ ރޮކްފެލާ ޔުނިވާސިޓީގެ ދިރާސާވެރިން ވަނީ ހަ ގަޑިއިރު ވަންދެން 64 މީހެއްގެ ހަމުގެ ވަސް ދިރާސާކޮށްފަ އެވެ. މަދިރިތަކަށް އެ މީހުންގެ ހަށިގަނޑުން ޖަމާކުރި ވަސް އެކުލެވޭ ސާމްޕަލްތަކުގެ ތެރެއިން އިޚްތިޔާރު ކުރުމުގެ ފުރުސަތު ދިނުމުން، އެ ސޫފިތައް އެންމެ ބޮޑަށް ދަމައިގަތީ ކާބޮކްސިލިކް އެސިޑް ގިނައިން ހުރި މީހުންގެ ވަހަށެވެ.

ދިރާސާވެރިން ކޮންމެ މީހަކަށް "އެޓްރެކްޓިވްނަސް ސްކޯ" އެއް ދިންއިރު، އެންމެ މަތީ ސްކޯ ލިބުނު މީހާގެ ސްކޯ، އެންމެ ދަށް ސްކޯ ލިބުނު މީހާއަށްވުރެ 100 ގުނަ މަތިކަން ފާހަގަކުރެވުނެވެ. ދިރިއުޅުމުގެ އާދަކާދައަށް ބަދަލު އައި ނަމަވެސް، މި ތަފާތުތައް އަހަރުތަކެއް ވަންދެން އެއްގޮތަކަށް ހުއްޓެވެ. ސައިންސްވެރިން ބުނާ ގޮތުގައި، މަދިރި ތިބާއަށް ޝައުގުވެރިވާ މިންވަރަކީ ބޮޑު ބަދަލެއް ނާންނަ، ދާއިމީ ކަމެކެވެ. ހަމުގައި ހުންނަ މައިކްރޯބްތަކުގެ ސަބަބުންވެސް މަދިރި ދަމައިގަންނަ މިންވަރަށް އަސަރުކުރެ އެވެ.

ނެދަލޭންޑްސްގެ ވަގެނިންގެން ޔުނިވާސިޓީގެ ދިރާސާވެރިންނަށް ފެނުނު ގޮތުގައި، މަދިރި ވަރަށް ބޮޑަށް ޝައުގުވެރިވާ މީހުންގެ ހަމުގައި ހުންނަ ބެކްޓީރިއާގެ ބާވަތްތައް ތަފާތެވެ. އެމީހުންގެ ހަމުގައި ބެކްޓީރިއާ ގިނަ ނަމަވެސް، ބެކްޓީރިއާގެ ބާވަތްތައް މަދެވެ. މީގެ ސަބަބަކީ ހަށިގަނޑުގެ ވަސް އުފެއްދުމުގައި ހަމުގެ ބެކްޓީރިއާ މުހިންމު ދައުރެއް އަދާކުރާތީ އެވެ. ބެކްޓީރިއާ ނެތް ނަމަ، އިންސާނާގެ ދަލުގައި އިންސާނުންގެ ނޭފަތަށް ދެނެގަނެވޭނެ ވަހެއް ނުހުންނާނެ އެވެ.

އެއްމާބަނޑު ކުދިން ބޭނުންކޮށްގެން ހެދި ދިރާސާތަކުން ދައްކާ ގޮތުގައި، އެއްގޮތް އެއްމާބަނޑު ކުދިންގެ ގާތަށް މަދިރި ދަނީ އެއްވަރަކަށެވެ. ނަމަވެސް، ތަފާތު އެއްމާބަނޑު ކުދިންގެ މެދުގައި މިކަމުގައި ތަފާތުތައް ހުއްޓެވެ. މީގެއިން އެނގެނީ މަދިރި ހެފުމަށް މެދުވެރިވާ ހަށިގަނޑުގެ ވަހަކީ ވާރުތަވާ ކަމެއް ކަމެވެ.