ޑެންގީ ކޮންޓްރޯލު ކުރަން މަދިރި ގެންނަ މީހުންނަށް ފިލިޕީންސް ގައި ފައިސާ ދެނީ

ޑެންގީ ފެތުރުން ހުއްޓުވުމަށް މަސައްކަތް ކުރުމުގެ ގޮތުން މަދިރި ގެންނަ ފަރާތްތަކަށް ފިލިޕީންސްގެ އާބާދީ އެންމެ ބޮޑު ސަރަހައްދުތަކުގެ ތެރެއިން އެއް ސަރަހައްދުގެ އިސްވެރިން ފައިސާގެ އިނާމު ހުށަހަޅައިފިއެވެ.

"ޕެސޯ ފޯރ އަ މޮސްކިޓޯ" ގެ ނަމުގައި ކުރިއަށް ގެންދާ މި ޕްރޮގްރާމާ ބެހޭ ގޮތުން، މެނީލާގެ މެދުތެރޭގައި އޮންނަ ބަރަންގައި އެޑިޝަން ހިލްސްގެ ވެރިޔާ ކާލިޓޯ ސާނަލް ވަނީ ކޮންމެ 5 މަދިރި އަކަށް 1 ޕެސޯ (ގާތްގަނޑަކަށް 2 އެމެރިކާ ސެންޓް) ގެ އިނާމެއް ދޭނެކަން އިއުލާނުކޮށްފައެވެ.

މި އިނާމާ ބެހޭ ޚަބަރު ސޯޝަލް މީޑިއާގައި ފާޑުކިޔުމުގެ ރޫހެއްގައި ފެތުރުނު ނަމަވެސް، ސާނަލް ވަނީ މިއީ އެންމެންގެ ސިއްހަތަށްޓަކައި ކޮންމެހެން ކުރަން ޖެހޭ ކަމެއް ކަމަށް ބުނެ މިކަން ދިފާއު ކޮށްފައެވެ.

މި ފިޔަވަޅު އަޅާފައިވަނީ ފިލިޕީންސް ގައި މަދިރިން ފެތުރޭ ޑެންގީ ބަލީގެ ހާލަތު ދާދި ފަހުން ގޯސްވެފައިވާތީއެވެ.

މަދުވެގެން އެއް މަސްދުވަހުގެ މުއްދަތަށް ކުރިއަށްދާ މި ޕްރޮގްރާމް ފަށާފައިވަނީ ސާނަލް ގެ އަވަށުގެ ދެ ދަރިވަރަކު މި ބަލީގެ ސަބަބުން މަރުވުމާ ގުޅިގެންނެވެ.

ސާނަލް އިތުރަށް ބުނެފައިވާ ގޮތުގައި މަދިރި ދިރި ހުއްޓާ ގެނަޔަސް އަދި މަރުވެފައި ވަނިކޮށް ގެނެޔަސް އަދި އޭގެ ބިސް ގެނެޔަސް އިނާމު ލިބޭނެއެވެ.

ބީބީސީ އަށް އޭނާ ކިޔައިދިން ގޮތުގައި މިހާތަނަށް 21 މީހަކު އިނާމު ހޯދުމަށް ކުރިމަތިލާފައިވާއިރު، ޖުމްލަ 700 މަދިރި އަދި މަދިރީގެ ބިސް އިނާމު ހޯދަން ގެނެސްފައިވެއެވެ.

އަންގާރަ ދުވަހުގެ ރޭގެ ފަހުކޮޅު މި އިނާމު އިއުލާނު ކުރުމާއެކު އެކަމާ މެދު ފާޑުކިޔަން ފެށުނެވެ.

"މަދިރި ދަނޑުވެރިކަން އަންނަނީ" އެއް ކޮމެންޓުގައި ލިޔެފައިވެއެވެ. "އެއް ފިޔަ ހުރި މަދިރި އެއް ބަލައިގަންނާނެތަ؟" އަނެއް ކޮމެންޓެއްގައި ލިޔެފައިވެއެވެ.

ފިލިޕީންސްގެ ސިއްހަތާބެހޭ މިނިސްޓްރީ (ޑީއޯއެޗް) އިން ބީބީސީ އަށް ދިން ބަސްދީގަތުމެއްގައި ބުނެފައިވާ ގޮތުގައި ޑެންގީއާ ދެކޮޅަށް ހަނގުރާމަ ކުރުމަށް ލޯކަލް ގަވަރމަންޓް އެގްޒެކެޓިވުންގެ ހެޔޮ ނިޔަތުގެ އަގު މިނިސްޓްރީން ވަޒަން ކުރެއެވެ.

ނަމަވެސް، ފައިސާ ދީގެން މަދިރި ހިފުމަކީ ޑެންގީ ހުއްޓުވުމަށް އެކަށީގެންވާ ގޮތެއްތޯ އެހުމުން އިތުރު ކޮމެންޓެއް ދޭން އެ މިނިސްޓްރީން ވަނީ އިންކާރުކުރިއެވ

"އަޅުގަނޑުމެން އެދެނީ ކަމާބެހޭ ހުރިހާ ފަރާތްތަކުން އެ ސަރަހައްދެއްގެ ލޯކަލް ހެލްތު އޮފިސަރުންނާ ނުވަތަ ޑީއޯއެޗްގެ ސަރަހައްދީ އޮފީހާ މަޝްވަރާކޮށް، ނަތީޖާ ނުކުންނަކަން ސާބިތުވެފައިވާ އުސޫލުތަކާ އެއްގޮތަށް ކަންކަން ކުރިއަށް ގެންދިއުމަށެވެ،" އެ މިނިސްޓްރީން ބުންޏެވެ.

ސާނަލް ބުނި ގޮތުގައި ސޯޝަލް މީޑިއާގައި މި އިނާމަށް ފާޑުކިޔާފައިވާކަން އޭނާ އަށް އެނގެއެވެ. ނަމަވެސް އޭނާ އިތުރަށް ބުންޏެވެ: "މިއީ އެންމެ ބޮޑު އަދި އެންމެ އާބާދީ ބޮޑު ސަރަހައްދުތަކުގެ ތެރެއިން އެއް ސަރަހައްދު، އަޅުގަނޑުމެން ލޯކަލް ސަރުކާރަށް އެހީތެރިވުމަށް ކޮންމެވެސް ކަމެއް ކުރަން ޖެހޭ."