އެކްސިޑެންޓްވެ އަގުއޭރޯ ކުޅުމާ ދުރަށް

މެންޗެސްޓާ ސިޓީގެ ފޯވާޑް ސާޖިއޯ އަގުއޭރޯ އެކްސިޑެންޓްވެ ކުޅުމާ ދުރަށް ދާން ޖެހިއްޖެއެވެ.

ސްޕޯޓްސް އިލަސްޓްރޭޓެޑް އިން ރިޕޯޓް ކޮށްފައިވާ ގޮތުގައި ނެދަލޭންޑްސްގެ އެމްސްޓަޑޭމްގައި އޮތް ކޮލޮމްބިއާގެ މަޝްހޫރު ލަވަކިޔުންތެރިޔާ މަލޫމާގެ ޝޯއެއް ބަލާލުމަށް ފަހު އެނބުރި އިންގްލޭންޑަށް ދިޔުމަށް އަގުއޭރޯ އެއާޕޯޓަށް ދިޔަ މަގުމަތީ އޭނާ ދަތުރުކުރި ޓެކްސީ ވަނީ އެކްސިޑެންޓްވެފައެވެ.

އެގޮތުން އަގުއޭރޯ ދަތުރު ކުރި ޓެކްސީ ހޮޅިދަނޑިއަކަށް އަރާފައިވާ ކަމަށާއި މި އެކްސިޑެންޓްގެ ސަބަބުން އަގުއޭރޯގެ މޭކަށިގަނޑުން ބައެއް ބިންދައިގެން ގޮސްފައިވާ ކަމަށް ރިޕޯޓް ކޮށްފައިވެއެވެ. އަދި އޭނާއަށް މި އެކްސިޑެންޓްގައި ލިބުނު އަނިޔާތަކަށް ވުރެ ސީރިއަސް އަނިޔާތަށް ނުލިބި ސަލާމަތްވީ އޭނާ އެކްސިޑެންޓްވި ވަގުތު ސީޓް ބެލްޓް އަޅައިގެން އިނުމާ ގުޅިގެން ކަމަށް ރިޕޯޓުތައް ބުނެއެވެ.

މި އެކްސިޑެންޓާ ވިދިގެން އަގުއޭރޯ 2 މަސްދުވަހަށް ވުރެ ގިނަ ދުވަހު ކުޅުމާ ދުރުގައި ހުންނަން ޖެހިދާނެ ކަމަށް ރިޕޯޓުތައް ބުނެއެވެ. މިކަން މިގޮތަށް ދިމާވެއްޖެނަމަ އޮކްޓޯބަރު އަދި ނޮވެމްބަރު މަހުގެ ތެރޭގައި ސިޓީއިން ކުޅޭ މެޗުތަކުގައި އޭނާއަށް ނުކުޅެވޭނެއެވެ. އަދި 2018 ވަނަ އަހަރުގެ ވޯލްޑްކަޕް ކޮލިފައިންގައި އޮކްޓޯބަރު މަހުގެ ފަސްވަނަ ދުވަހު ޕެރޫ އަދި އޮކްޓޯބަރު މަހުގެ 10 ވަނަ ދުވަހު އިކުއޭޑޯއާ ދެކޮޅަށް އާޖެންޓީނާގެ ގައުމީ ޓީމު ކުޅޭ މުހިންމު ދެ މެޗު އޭނާއަށް ގެއްލިގެން ދާނެއެވެ.

އަގުއޭރޯއަށް އެކްސިޑެންޓްވެ ކުޅުމާ ދުރަށް ދާން ޖެހިފައިވާއިރު އޭނާ އަންނަނީ މި ސީޒަނުގައި ސިޓީގައި މޮޅު ކުޅުމެއް ދައްކަމުންނެވެ. އެގޮތުން އޭނާވަނީ މި ސީޒަނުގައި މިހާތަނަށް ކުޅުނު ހަ މެޗުގައި އެ ޓީމަށް ހަ ލަނޑު ޖަހައިދީފައެވެ. އަގުއޭރޯގެ އިތުރުން އެ ޓީމުގެ ޑިފެންޑާ ބެންޖަމިން މެންޑީއަށްވެސް ވަނީ އަނިޔާވެ ކުޅުމާ ދުރަށް ދާން މަޖުބޫރުވެފައެވެ.