2027 ވަނަ އަހަރުގެ ކުރީ ކޮޅު ރިޔާސީ އިންތިޚާބު ބާއްވަން ފަލަސްޠީނުގެ ރައީސް އައްބާސް ނިންމަވައިފި

އަންނަ 2027 ވަނަ އަހަރުގެ ކުރީ ކޮޅު ފަލަސްޠީނުގެ ރިޔާސީ އިންތިޚާބެއް ބޭއްވުމަށް، އެ ޤައުމުގެ ރައީސް މަހުމޫދު އައްބާސް ނިންމަވައިފި އެވެ.

ރިޔާސީ އިންތިޚާބު ބޭއްވުމުގެ އިތުރުން، މިއަހަރުގެ ނޮވެމްބަރު މަހުގެ ތެރޭގައި ޤާނޫނު ހަދާ މަޖިލީހުގެ އިންތިޚާބެއް ބޭއްވުމަށް ވެސް ފަލަސްޠީނުގެ ރައީސް އައްބާސް ވަނީ ނިންމަވައިފަ އެވެ. ފަލަސްޠީނުގެ ނޫސް އޭޖެންސީ ވަފާ އިން މިކަން ރިޕޯޓު ކޮށްފައިވާއިރު، އައްބާސް އިންތިޚާބުގައި ވާދަ ކުރައްވާނެ ކަމެއް، ނުވަތަ ނޫން ކަމެއް ވެސް ބުނެފައި ނުވެ އެވެ.

އުމުރުފުޅުން 90 އަހަރުގެ އައްބާސް ފަލަސްޠީނުގެ އެންމެ ފަހު ރިޔާސީ އިންތިޚާބު ކާމިޔާބު ކުރެއްވީ 2005 ވަނަ އަހަރު އެވެ. އެއީ ހަތަރު އަހަރުގެ ދައުރެއް ކަމަށް ވާތީ، އެ ދައުރު ހަމަވާން އޮތީ 2009 ވަނަ އަހަރު އެވެ. ނަމަވެސް އެ ދައުރު އިތުރުކޮށް، އެއަށް ފަހު އިންތިޚާބެއް ބޭއްވިފައި ނުވެ އެވެ. މިހާތަނަށް އައްބާސް ވަނީ ރިޔާސީ ޙުކުމް ތަކުން ވެރިކަން ކުރެއްވުމުގައި އެވެ. 

ރިޔާސަތުން ނެރެފައިވާ ބަޔާނެއް ކަމަށް ބުނެ، ވަފާ އިން ބުނީ 2027 ވަނަ އަހަރުގެ ކުރީ ކޮޅު ރިޔާސީ އިންތިޚާބެއް ބޭއްވުމަށް ރައީސް އައްބާސް ނިންމަވާފައިވާ ކަމަށެވެ. އަދި މި އަހަރުގެ ނޮވެމްބަރު މަހުގެ ތެރޭގައި ޤާނޫނު ހަދާ މަޖިލީހުގެ އިންތިޚާބު ބޭއްވުމަށް ވެސް އެ ޙުކުމުގައި އަންގަވާފައިވާ ކަމަށް ބުނެފައިވެ އެވެ. 

އައްބާސްގެ ޙުކުމުގައި ވަނީ، ނޮވެމްބަރު މަހުގެ ތެރޭގައި ފަލަސްޠީނުގެ ޤާނޫނު ހަދާ މަޖިލީހުގެ އިންތިޚާބު ބާއްވަން ފުރިހަމަ އަށް ތައްޔާރުވެ ވަޑައިގެންފައިވާ ކަމަށް ފާހަގަ ކުރައްވައިފަ އެވެ. ފަލަސްޠީނުގެ ޤާނޫނު ހަދާ މަޖިލީހަކީ، ފަލަސްޠީނު މިނިވަން ކުރުމުގެ ޖަމާއަތުގެ މަޖިލީހެވެ. މި މަޖިލީހުގައި ފަލަސްޠީނުގެ ސަރަހައްދު ތަކުންނާއި، ބޭރުން 700 އަށް ވުރެ ގިނަ މެމްބަރުން ތިބެ އެވެ. 

އެންމެ ފަހުން ފަލަސްޠީނުގެ ސަރަހައްދު ތަކުގައި ޤާނޫނު ހަދާ މަޖިލީހުގެ އިންތިޚާބެއް ބާއްވާފައި ވަނީ 2006 ވަނަ އަހަރު އެވެ. އެ އިންތިޚާބު ކާމިޔާބު ކޮށްފައި ވަނީ ހަމާސް އިންނެވެ. ފަލަސްޠީނުގެ ރައީސް އައްބާސްގެ ފަތަހް ޕާޓީ އަށް ވަނީ ނާކާމިޔާބާ ކުރިމަތިލާން ޖެހިފައި އެވެ. އެކަމުގެ ނަތީޖާ އަކަށް ވެފައި ވަނީ، ފަލަސްޠީނު އޮތޯރިޓީގެ ޤާނޫނު ހަދާ މަޖިލީހުގެ ބައްދަލުވުންތައް 2007 ވަނަ އަހަރުން ފެށިގެން ނުބޭއްވުމެވެ. 

އިންތިޚާބުތައް ބޭއްވުމަކީ، ބައިނަލްއަޤުވާމީ މުޖުތަމައުން ފަލަސްޠީނު އޮތޯރިޓީ އަށް ބާރު އަޅަމުން އަންނަ ކަމެކެވެ. އަދި އިސްލާހު ތަކުގެ ތެރޭގައި ވސް ހިމެނޭ ކަމެކެވެ. ފަލަސްޠީނު އޮތޯރިޓީ އަށް ބައިނަލްއަޤުވާމީ މުޖުތަމައުން އަންނަނީ މާލީ ގޮތުން ވެސް އެހީތެރިކަން ދެމުންނެވެ. 

މީގެ ކުރިން 2021 ވަނަ އަހަރު ފަލަސްޠީނުގެ ރައީސް ވަނީ، އެ އަހަރުގެ މެއި މަހާއި، ޖުލައު މަހު ޤާނޫނު ހަދާ މަޖިލީހުގެ އިންތިޚާބު އަދި ރިޔާސީ އިންތިޚާބު ބޭއްވުމަށް އިއުލާން ކުރައްވައިފަ އެވެ. އެކަމަކު، އިރުމަތީ ޤުދުސްގައި ވޯޓުލުން ކުރިއަށް ގެންދެވޭނެ ކަމުގެ ޔަޤީންކަން ނެތުމުގެ ސަބަބުން އިންތިޚާބު ވަނީ މުއްދަތެއް ނެތް ގޮތަށް ފަސްކޮށްފައި އެވެ.