އެމްކިއުއޭގެ ތުހުމަތުތަކަކީ އިތުބާރު ގެއްލުވާލަން ކުރި ކަމެއް: އެވިޑް ކޮލެޖް
25 ޖޫން 2026 | ބުރާސްފަތި 14:02އެމްކިއުއޭގެ އުސޫލުތަކާ ހިލާފަށް ރާއްޖޭން ބޭރުގައި ކޯސްތައް ހިންގި ކަމަށް ބުނެ އެވިޑް ކޮލެޖަށް ފިޔަވަޅު އެޅީ އެއްވެސް ސުވާލެއް ކުރުމެއް ނެތި، އެ ކޮލެޖުގެ އިތުބާރު ގެއްލުވާލުމަށް ކަމަށް އެ ކޮލެޖުން ބުނުފެި. އެވިޑް ކޮލެޖުން ނެރުނު ބަޔާނެއްގައި ބުނެފައިވަނީ އާ އުސޫލު ގެޒެޓްކުރި ފަހުން ބައިނަލްއަގުވާމީ އެއްވެސް މުއައްސަސާއަކާ ގުޅިގެން ކޯހެއް ހިންގާފައި ނުވާނެ ކަމަށާއި، އެމްކިއުއޭގެ ނިންމުމަކީ އިންސާފުގެ ހަމަތަކާ ހިލާފު އަމަލެއް ކަމަށް. އެހެންކަމުން، ގާނޫނީ އިމުގެ ބޭރުން އަދަބު ދިނުމަކީ ބަލައިގަނެވޭނެ ކަމެއް ނޫން ކަމަށްވެސް އެ ކޮލެޖުން ފާހަގަކޮށްފައިވޭ.
އެވިޑް ކޮލެޖް | އެވިޑް ކޮލެޖް
ރަޖިސްޓްރީ ކޮށްފައި ނުވާ ދަރިވަރުންތަކަކަށް ސެޓްފިކެޓް ދޫކޮށްފައިވާ ކަމަށް ބުނެ މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ) އިން ކުރާ ތުހުމަތުތަކަކީ، އެވިޑް ކޮލެޖާ މެދު ރައްޔިތުންގެ ހިތްތަކުގައި އޮތް އިތުބާރު ގެއްލުވާލުމަށް އިޚްލާސްތެރިކަމެއް ނެތި ކޮށްފައިވާ ކަމެއް ކަމަށް އެ ކޮލެޖުން ބުނެފި އެވެ.
މިކަމާ ގުޅިގެން އެވިޑް ކޮލެޖުން ނެރުނު ނޫސްބަޔާނެއްގައި ބުނެފައިވަނީ، 21 ޖޫން 2026 ވީ އާދީއްތަ ދުވަހު އެމްކިއުއޭ އިން ނެރެފައިވާ ބަޔާނުގައި އެ ކޮލެޖަށް ކޮށްފައިވަނީ ހަގީގަތާ ހިލާފު ތުހުމަތުތަކެއް ކަމަށެވެ. އެވިޑް ކޮލެޖަކީ ފާއިތުވި އަހަރުތަކުގައި ބައިނަލްއަގުވާމީ ތައުލީމީ މުއައްސަސާތަކާއެކު ގިނަގުނަ އިލްމީ ގުޅުންތަކެއް ގާއިމުކޮށްފައިވާ ތަނެއް ކަމަށާއި، އެކަން އެމްކިއުއޭއާ ވެސް ހިއްސާކޮށްފައިވާނެ ކަމަށް އެ ކޮލެޖުން ފާހަގަކުރެ އެވެ.
ބަޔާނުގައި ވާގިތުން އެމްކިއުއޭ އިން އެކްރެޑިޓޭޝަން ދީފައިވާ ޕްރޮގްރާމްތައް ރާއްޖެއިން ބޭރުގައި ހިންގުމާ ބެހޭ އުސޫލު ގެޒެޓްކޮށް އަމަލުކުރަން ފަށާފައިވަނީ 10 ސެޕްޓެމްބަރު 2025 ގަ އެވެ. އެމްކިއުއޭ އިން 18 ޖޫން 2026 ގައި އެވިޑް ކޮލެޖަށް ތައުދީބީ ފިޔަވަޅު އަޅައި، އެކަން އާންމުކޮށް އިއުލާންކުރި އިރު، އެ ކޮލެޖާ އެއްވެސް ވަރަކަށް މަޝްވަރާކޮށް މައްސަލައާ ގުޅޭ މައުލޫމާތު ސާފުކޮށްފައި ނުވާ ކަމަށް ބަޔާނުގައިވެ އެވެ.
ކަން ހިނގާފައިވާ ގޮތް ސާފުކުރެއްވުމަށްޓަކައި އެއްވެސް ސުވާލެއް ވެސް ކުރައްވާފައެއް ނުވޭ. މީގެއިން ހާމަވަނީ މިކަމަކީ އިޚްލާސްތެރިކަމެއް ނެތި އެވިޑް ކޮލެޖާ މެދު ރައްޔިތުންގެ ހިތްތަކުގައި އޮތް އިތުބާރާއި ޔަގީންކަން ގެއްލުވާލުމަށް ކޮށްފައިވާ ކަމެއްކަން. އަދި މިއީ އެވިޑްކޮލެޖްގެ ރީތި ނަން ކިލަނބު ކޮށްލުމަށް ހިންގާފައިވާ އިންސާފުގެ ހަމަތަކާއި ޚިލާފު ޢަމަލެއްކަން ކަށަވަރު.އެވިޑް ކޮލެޖުގެ ބަޔާން
އެވިޑް ކޮލެޖުން އިތުރަށް ބުނެފައިވަނީ، 10 ސެޕްޓެމްބަރު 2025 ގެ ފަހުން ބައިނަލްއަގުވާމީ އެއްވެސް މުއައްސަސާއެއް މެދުވެރިކޮށް އެއްވެސް ކޯހެއް ހިންގާފައި ނުވާނެ ކަމަށެވެ. އަދި އައު އުސޫލާ ހިލާފަށް އެއްވެސް މުއާމަލާތެއް ނުކުރެވޭނެ ކަމަށް ބޭރުގެ މުއައްސަސާތަކަށް އަންގައި، އެކަން އެމްކިއުއޭގެ ސަމާލުކަމަށް ވެސް ގެނެސްފައިވާނެ ކަމަށް އެ ކޮލެޖުން ބުނެ އެވެ.
މީގެއިތުރުން، އެއްވެސް މީހަކަށް ނުވަތަ ފަރާތަކަށް އަދަބެއް ކަނޑައެޅޭނީ ގާނޫނީ އިމުގެ ތެރެއިން އެފަދަ ގާނޫނެއް ނުވަތަ ގަވާއިދެއް ވުޖޫދުގައި އޮވެގެން ކަމަށާއި، އެމްކިއުއޭގެ އަމަލަކީ "ޕްރިސަމްޝަން އޮފް އިނޯސަންސް" ނުވަތަ ކުށް ސާބިތުނުވާހާ ހިނދަކު އެއީ ކުށްވެރިއެއް ނޫން ކަމަށް ބަލާ މަބްދައާ ވެސް ހިލާފު ކަމެއް ކަމަށް އެވިޑް ކޮލެޖުން ވަނީ ތުހުމަތުކޮށްފަ އެވެ.
