ރާއްޖޭގެ ކޮލެޖުތަކުން ގަވާއިދާ ހިލާފަށް އޮންލައިން ކޯސްތައް ހިންގުމުގެ މައްސަލަ ބޮޑު، އެފަދަ ސަނަދުތައް ގަބޫލެއް ނުކުރާނަން: އެމްކިއުއޭ

ގަވާއިދާ ހިލާފަށް އޮންލައިން ޕްރޮގްރާމްތައް ނުވަތަ ކޯސްތައް ހިންގާ މައްސަލަ ބޮޑުވެފައިވާ ކަމަށާއި އެގޮތަށް ހިންގާ ކޯސްތަކުގެ ސަނަދު ގަބޫލު ނުކުރާނެ ކަމަށް މޯލްޑިވްސް ކޮލިފިކޭޝަންސް އޮތޯރިޓީ (އެމްކިއުއޭ) އިން ބުނެފި އެވެ.

އެމްކިއުއޭ އިން ހޯމަ ދުވަހު ނެރުނު ނޫސް ބަޔާނެއްގައި ބުނީ  ނޭޝަނަލް ކޮމްޕީޓެންސީ ސްޓޭންޑަޑް ތަކަށް އެ އޮތޯރިޓީ އިން، މޯލްޑިވްސް ނޭޝަނަލް ސްކިލްސް ޑިވެލޮޕްމަންޓް އޮތޯރިޓީ އަށް ހުއްދަ ދީފައިވާ ގޮތާއި ޚިލާފަށް ބައެއް މަރުކަޒުތަކުން އޮންލައިން ކޮށް ޕްރޮގްރާމް ހިންގާކަމުގެ މައުލޫމާތު އެ އޮތޯރިޓީ އަށް ލިބިފައިވާ ކަމަށެވެ.

ނޭޝަނަލް ކޮމްޕީޓެންސީ ސްޓޭންޑާޑްތަކަށް ހިންގާ ޕްރޮގްރާމްތައް އޮންލައިން ކޮށް ހިންގުމަށް މަޝްވަރާތައް ކުރަމުންދިޔަ ނަމަވެސް، އެއްވެސް ޕްރޮގްރާމެއް އޮންލައިންކޮށް ހިންގުމަށް މިހާތަނަށް އެ އޮތޯރިޓީ އިން ހުއްދަ ދީފައި ނުވާނެ ކަމަށް އެމްކިއުއޭ ގެ ނޫސްބަޔާނުގައި ބުނެފައިވެ އެވެ. ވުމާއެކު ނޭޝަނަލް ކޮމްޕީޓެންސީ ސްޓޭންޑަޑްތަކަށް އެ އޮތޯރިޓީ ގެ ހުއްދަ ނެތި އޮންލައިން ކޮށް ހިންގާ އެއްވެސް ޕްރޮގްރާމެއްގެ ސަނަދު ގަބޫލު ނުކުރާނެ ކަމަށް އެމްކިއުއޭ އިން ބުނެފައިވެ އެވެ.

އެމްކިއުއޭ ގެ ހުއްދަ ނެތި ކޯސްތައް ހިންގައި، ސެޓްފިކެޓް ވިއްކުމަކީ ރާއްޖޭގައި ފުޅާ ދައިރާއެއް ގައި ކުރާ ވިޔަފާރިއެއް ކަމަށް ގިނަ ބަޔަކު ތުހުމަތު ކުރެ އެވެ. އެމްކިއުއޭ ގެ ހުއްދަ ނެތި ޕްރޮގްރާމްތައް ހިންގައި، ސެޓްފިކެޓް ދޭ މައްސަލަ މިއީ މީގެ ކުރިން ވެސް އާންމު ވެފައިވާ މައްސަލައެކެވެ. އެގޮތުން އެމްކިއުއޭ ގެ ޕްރޮގްރާމް އޮޑިޓު ނުހަދައި، ދަރިވަރުންނަށް ސަނަދު ދޭ މައްސަލަ ވެސް ފާހަގަކުރެވެ އެވެ.