އަނބިމީހާގެ ގަޔަށް 78 ފަހަރު ވަޅިޖަހައި މަރާލި މީހަކު ކުށްވެރިވެއްޖެ

އަނބިމީހާގެ ގަޔަށް 78 ފަހަރު ވަޅިޖަހައި މަރާލުމަށްފަހު، އެކަން ފުލުހުންނަށް އަންގައި "އަނބިމީހާ ނައްތާލައިފިން" ކަމަށް ބުނި މީހަކު، މީހަކު މެރުމުގެ ކުށުގައި ކުށްވެރިވެއްޖެއެވެ.

އުމުރުން 66 އަހަރުގެ ރޮބަޓް އެލެގްޒެންޑާ، އޭނާގެ އުމުރުން 60 އަހަރުގެ އަނބިމީހާ ކްރިސްޓީނާ އެލެގްޒެންޑާ މަރާލާފައިވަނީ 2025 ވަނަ އަހަރުގެ ޖޫން މަހުގެ ތެރޭގައި، އިނގިރޭސިވިލާތުގައި ޓެމްވޯތުގެ ޑޮސްހިލްގައި ހުންނަ އެމީހުންގެ ގޭގައެވެ. ސްޓެފަޑް ކްރައުން ކޯޓުގެ ޖޫރީންގެ ކުރިމަތީގައި އޭނާ ބުނެފައިވަނީ އެއީ އަމިއްލަ ނަފްސުގެ ދިފާއުގައި ކުރި ކަމެއް ކަމަށެވެ.

އަނބިމީހާ މަރާލުމަށްފަހު، އޭނާ ވަނީ އަމިއްލަ ހެދުން ބަދަލުކޮށް، ކުނިކޮތަޅުތައް ބޭރަށް ނެރެ، އޭނާގެ ކުއްތާތަކާއެކު ސިޓިންގ ރޫމުގައި އިށީނދެ އިނދެފައެވެ. އޭނާ އިމަޖެންސީ ނަންބަރު 999 އަށް ގުޅާފައިވަނީ އޭގެ ފަހުންނެވެ.

ފުލުހުންނަށް މައުލޫމާތު ދެމުން އޭނާ ބުނެފައިވަނީ، މި ހުރިހާ ކަމެއްވެސް ގުޅިފައިވަނީ ފައިސާއާ ކަމަށާއި، އޭނާއަށް ވާރުތައިން ލިބުނު ފައިސާ ހަރަދުކުރަންވީ ގޮތް އަނބިމީހާ އަންގަމުންދިޔަ ކަމަށެވެ.

އަދި މީގެ އަށް އަހަރު ކުރިން އޭނާގެ ހަޔާތަށް އަނބިމީހާ އައިއިރު، އަނބިމީހާގެ އަތުގައި އެއްވެސް އެއްޗެއް ނެތް ކަމަށްވެސް ރޮބަޓް ބުނެފައިވެއެވެ.

ޕްރޮސެކިއުޓަރުން ފާހަގަ ކުރި ގޮތުގައި، ރޮބަޓް، ފުލުހުންގެ އޮފިސަރުން ގާތު ބުނެފައިވަނީ "އަހަރެން އަނބިމީހާ ނައްތާލައިފިން" ކަމަށެވެ. މީގެ އިތުރުން، މީގެ ކުރިންވެސް ރޮބަޓް އޭނާގެ އަނބިމީހާގެ ކަރުގައި ހިފައި ނޭވާ ހާސްކޮށްލަން މަސައްކަތްކޮށް، ކޮލުގައި ދަތްއަޅާފައިވާކަން ޖޫރީންނަށް ވަނީ އެނގިފައެވެ.

މި ހާދިސާ ހިނގަމުންދިޔަ ވަގުތު، އެތަނުގައި ހިނގަމުންދިޔަ ކަންތައްތަކުގެ އަޑު އިވުނު އަވަށްޓެރިއަކު މަރާލާނެ ކަމުގެ އިންޒާރުވެސް ރޮބަޓް ވަނީ ދީފައެވެ.

މީގެ ކުރިން 2021 ވަނަ އަހަރުގެ ޖޫން މަހު ހިނގި އެހެން ހާދިސާއެއްގައި، ރޮބަޓް ދަގަނޑު ބުރިއެއް ނަގައި އަނބިމީހާއަށް ބިރުދެއްކުމުން، ބިރުން ހުރެ ކްރިސްޓީނާ ވަނީ 999 އަށް ގުޅައި އެހީއަށް އެދިފައެވެ.

އޭނާ ފުލުހުން ގާތު ބުނެފައިވަނީ، ފިރިމީހާގެ ފަރާތުން ކުރިމަތިވެދާނެ އަނިޔާއެއްގެ ބިރުވެރިކަމުގެ ތެރޭގައި އޭނާ އަބަދުވެސް ދިރިއުޅެމުންދާ ކަމަށެވެ.

އެ ހާދިސާއާ ގުޅިގެން، ގެވެށި އަނިޔާއިން ރައްކާތެރިކޮށްދޭ އަމުރެއް (ޑޮމެސްޓިކް ވަޔަލަންސް ޕްރޮޓެކްޝަން އޯޑަރ) އޭނާގެ މައްޗަށް އޭރު ނެރުނެވެ.

ޝަރީއަތުގެ މަޖިލީހުގައި ރޮބަޓް ބުނެފައިވަނީ، އެންމެ ފުރަތަމަ ވަޅީގައި ހިފީ އޭނާގެ އަނބިމީހާ ކަމަށާއި، އޭނާ އަމަލުކުރީ އަމިއްލަ ނަފްސުގެ ދިފާއުގައި ކަމަށެވެ.

އަދި އޭނާގެ ކިބައިގައި ހުރި ޑިޕްރެޝަން ނުވަތަ މާޔޫސްކަމާއި އޯޓިޒަމްގެ ސަބަބުން، މި އަމަލުގެ ޒިންމާ އޭނާގެ މައްޗަށް އޮންނަ މިންވަރު ކުޑަވާނެ ކަމަށްވެސް އޭނާ ވަކާލާތު ކުރިއެވެ.

ޖޫރީން ހުރިހާ ހެކިތަކަށް ފަރުވާތެރިކަމާއެކު ރިއާޔަތްކުރުމަށްފަހު، އަމިއްލަ ނަފްސުގެ ދިފާއުގައި ކުރި ކަމެއް ކަމަށް ބުނެ އޭނާ ދެއްކި ވާހަކަތަކާއި، ނަފްސާނީ ހާލަތުގެ ސަބަބުން ޒިންމާ ކުޑަވާނެ ކަމަށް ބުނި ބުނުން ވަނީ ބަލައިނުގަނެ ބޭރުކޮށްލާފައެވެ.

ނަރްމީނާ އިތުރަށް ވިދާޅުވީ، ރޮބަޓްގެ އަމަލުތަކަކީ އަނބިމީހާގެ މައްޗަށާއި ފައިސާގެ މައްޗަށް ބާރު ފޯރުވުމުގެ ނިޔަތުގައި ކޮށްފައިވާ ކަންތައްތަކެއްކަން ސާބިތުކޮށްދެވުނު ކަމަށެވެ. އަދި އޭނާ އަމިއްލަ ނަފްސަށް ދީފައިވާ ގެއްލުންތަކަކީވެސް އެ އުސޫލުގެ ބައެއް ކަމަށާއި، އެއީ ނަފްސާނީ ބޮޑު ބައްޔެއްގެ ސަބަބުން ވީ ކަމެއް ނޫންކަން ހާމަވި ކަމަށެވެ.

ރޮބަޓް އެލެގްޒެންޑާގެ މައްޗަށް އަދަބު ކަނޑައެޅުން އޮންނާނީ ފަހުން އިއުލާންކުރާ ތާރީޚެއްގައެވެ.