ކުލަގަދަ ހަފްލާއަކާއެކު "ކަނބުލޮ" ޕްރިމިއަރކޮށްފި
މި ފިލްމަކީ ޅަފުރައިގެ އަންހެން ކުއްޖަކަށް ކުރާ ގެވެށި އަނިޔާއާއި ޖިންސީގޮތުން ކުރާ ނޭދެވޭ އަމަލުތަކުގެ މައްޗައް ހަދާފައިވާ އިބްރަތްތެރި ފިލްމެއް
"ކަނބުލޮ" ޕްރިމިއަރ ނައިޓް
ކުލަގަދަ ހަފްލާއަކާއެކު މަޝްހޫރު ޑައިރެކްޓަރ ހުސެއިން މުނައްވަރު ޑައިރެކްޓުކޮށް ނެރޭ "ކަނބުލޮ" ޕްރިމިއަރކޮށްފި އެވެ.
ދިވެހިބަހާއި ތާރީހަށް ހިދުމަތްކުރާ ގައުމީ މަރުކަޒުން 2009 ވަނަ އަހަރު ބޭއްވި ދިގު ވާހަކަ ލިޔުމުގެ ގައުމީ މުބާރާތުން ހޮވި އެންމެ މޮޅު ވާހަކަ، "ޔުކްތާ"ގެ މައްޗަށް ތައްޔާރުކޮށްފައިވާ މި ފިލްމަކީ ޅަފުރައިގެ އަންހެން ކުއްޖަކަށް ކުރާ ގެވެށި އަނިޔާއާއި އަދި ޖިންސީގޮތުން ކުރާ ނޭދެވޭ އަމަލުތަކުގެ މައްޗައް ހަދާފައިވާ އިބްރަތްތެރި ފިލްމެކެވެ.
ރާއްޖެ އެމްވީ އަށް ދިން އިންޓަރވިއު އެއްގައި އިސްމާއިލް ރަޝީދު (ކޮޕީ އިއްސެ) ބުނީ، "ކަނބުލޮ" ޓީމުގައި މަސައްކަތް ކޮށްފައިވަނީ މިހާރު މިގައުމުގައި ތިބި އެންމެ ފުންނާބު އުސް މީހުން އެކުލެވޭ ޓީމު ކަމަށާއި އެހެންކަމުން މި ފިލްމުގައިވެސް މަސައްކަތް ކޮށްފައިވާނީ ކުރިން ކުޅެފައިވާ ފިލްމުތަކަށް ވުރެ ރަނގަޅަށް ކަން ފާހަގަކުރި އެވެ.
ވަރަށް ވަރުގަދަ ޓީމް ވާރކެއްގެ ތެރެއިން މުޅި މަސައްކަތް މިދިޔައީ، ޑޭ ވަން އިން ފެށިގެން މިހާތަނަށް އެހެންވީމަ އެއީ އަސްލު އެންމެ ބޮޑު ކާމިޔާބީ، ދެން ހަމަ ވަރަށް އުފަލުން މިހުރީ ފިލްމު އެޅުވޭތީވެސް ދެންހަމަ މިހާރުވެސް އެއްކަލަ ފިލްމުގެ ހައިޕް އިންވަރުން ވެސް އިނގޭ ފިލްމު ހަމަ ކަމުދާނެ ކަން ދެން ހަމަ މިރޭ ބަލައިލީމަ ރަނގަޅުވާނެ އިތުރަށް މީގެ ހައިޕް އުފެދޭނެއިސްމާއިލް ރަޝީދު (ކޮޕީ އިއްސެ)
ކާމިޔާބު ފިލްމުތަކެއް ބެލުންތެރިންނާ ހަމައަށް ގެނެސްދީފައިވާ މުނައްވަރު ވަނީ "ކަނބުލޮ" އާމެދު އުންމީދުތަކެއް އޮތް ކަމަށް ބުނެފަ އެވެ. އަދި މި ޕްރިމިއަރ ގައި ހައްސަ ގުރުއަތު ނެގުމެއް ވެސް ވަނީ ކުރިއަށް ގެންގޮސްފަ އެވެ. އެގޮތުން އާދިއްތަ ދުވަހާއި ހަމައަށް ޓިކެޓް ނަގާފައިވާ ފަރާއްތަކުގެ ތެރެއިން ޤުރުއަތުން ހޮވުނު ފަރާތައް އީވޯ އިން ހަދިޔާ ކުރާ ބެޑްރޫމްސެޓެއް ވަނީ ދީފަ އެވެ.
ކަނބޮލޮ ފިލްމުން ފެނިގެންދާ ތަރިންގެތެރޭގައި، އިސްމާއީލް ރަޝީދު (ކޮޕީ އިއްސެ)، މަރިޔަމް އައްޒަ، އަހުމަދު ނިމާލް، ޝީލާ ނަޖީބު، އަހުމަދު އީސާ، ވާސިއާ މުހައްމަދު އަދި މަރިޔަމް ޝަކީލާ ހިމެނެއެވެ. މި ފިލްމުގައި އައްޒައާއި ޝީލާގެ އެކްޓު ވަރަށް ތަފާތުވާނެކަމަށް ފިލްމުގެ ޑައިރެކްޓަރ ވަނީ ފާހަގަކޮށްފައެވެ.
މިއީ މަހުދީގެ ސްކްރީން ޕްލޭގެ މައްޗަށް މުނައްވަރު ޑައިރެކްޓްކުރާ ހަތަރުވަނަ ފިލްމެވެ. ފިލްމުގެ ޕްރޮޑިސަރަކީ ކަމަނަ ފިލްމުގެ އެއް ޕްރޮޑިއުސަރ އަލީ ޝާނިޒް މުހައްމަދެވެ.
