އެމްއައިބީގެ ޑޮލަރު ލިމިޓް ބައެއް ވިޔަފާރި ސައިޓްތަކަށް ބޭނުންނުކުރެވޭ ގޮތް ހަދައިފި
އެމްއައިބީގެ ރުފިޔާ ކާޑުން ބޭރުގެ އީކޮމާސް ސައިޓުތަކުގައި ކުރެވޭ މުއާމަލާތްތައް މަހަކު 10 އަށް މިހާރު ވަނީ މަދުކޮށްފަ. ނަމަވެސް ރާއްޖެއިން ބޭރުގެ ޕީއޯއެސް މެޝިންތަކާއި، ސިއްހީ އަދި ފަތުރުވެރިކަމުގެ ބޭނުންތަކަށް 250 ޑޮލަރުގެ ލިމިޓް ބޭނުންކުރެވޭނެ ކަމަށް އެ ބޭންކުން ބުނޭ.
އިސްލާމިކް ބޭންކުގެ ޑެބިޓް ވިސާ ކާޑު އިފްތިތާޙުކުރުން | އެމްއައިބީ
މޯލްޑިވްސް އިސްލާމިކް ބޭންކުން (އެމްއައިބީ) ރުފިޔާ ކާޑަށް ދޫކުރަމުން އައި ޑޮލަރު ލިމިޓު، ބައެއް ވިޔަފާރި ސައިޓްތަކަށް ބޭނުންނުކުރެވޭ ގޮތް ހަދައިފި އެވެ.
މި ބަދަލު ގެނައީ ބައެއް ކަސްޓަމަރުން ޒަރޫރީ ބޭނުންތަކަށް ދޫކޮށްފައިވާ ލިމިޓް އެހެނިހެން ބޭނުންތަކަށް ބޭނުންކުރަމުންދާތީ ކަމަށް އެ ބޭންކުން ބުނެފައިވެ އެވެ.
އެމްއައިބީން ކުރި އިއުލާނެއްގައި ބުނެފައިވަނީ އެ ބޭންކުގެ ރުފިޔާ ކާޑަށް ދޫކުރަމުންދިއަ ޑޮލަރު ލިމިޓަކީ ޒަރޫރީ ބޭނުންތަކަށް ދޫކުރަމުން ދިޔަ ލިމިޓެއްކަމަށެވެ. ނަމަވެސް ފާއިތުވެދިޔަ މަދު ދުވަސްކޮޅުގައި ބައެއް ކަސްޓަމަރުން އެހެނިހެން ބޭނުންތަކަށް މި ލިމިޓް ބޭނުންކުރަމުންދާކަން ފާހަގަކުރެވިފައިވާ ކަމަށް އެ ބޭންކުން ބުނެފައިވެ އެވެ.
އެހެންކަމުން ދެމެހެއްޓެނިވި ގޮތެއްގައި ކަސްޓަމަރުންގެ ޒަރޫރީ ބޭނުންތައް ފުއްދުމަށްޓަކައި މި ހިދުމަތް ފޯރުކޮށްދިނުމަށް އިސްކަންދިނުމުގެ ގޮތުން މިހިނދުން މިހިނދަށް ބައެއް ވިޔަފާރި ސައިޓުތަކުން މި ޑޮލަރު ލިމިޓް ބޭނުންނުކުރެވޭ ގޮތް ހެދުމަށް ނިންމާފައިވާކަމަށް އެމްއައިބީން ބުނެފައިވެ އެވެ.
އެމްއައިބީން ބުނެފައިވާ ގޮތުގައި މީގެ ފަހުން ބޭރުގެ އީކޮމާސް ސައިޓުތަކުން ކުރެވޭނީ ގިނަވެގެން 10 ޓްރާންސެކްޝަނެވެ. އެ ބަދަލު ގެނައި ނަމަވެސް ސަބްސްކްރިޕްޝަންތަކަށް ފައިސާ ދެއްކޭނެ ކަމަށް އެމްއައިބީން ބުނެފައިވެ އެވެ.
މީގެ އިތުރުން ރާއްޖެއިން ބޭރުގައި ހުންނަ ޕީއޯއެސް މެޝިންތަކުން ކުރާ ވިޔަފާރިތަކާއި ސިއްހީ ހިދުމަތް ހޯދުމަށް އަދި ޗުއްޓީ ހޭދަކުރުމަށް ހިނގާ އެކިއެކި ހަރަދުތަކަށް ދުއިސައްތަ ފަންސާސް ޑޮލަރުގެ ލިމިޓުގެ ތެރެއިން ބޭނުންކުރެވޭނެ ކަމަށް އެމްއައިބީން ބުނެފައިވެ އެވެ.
އެމްއައިބީން މިފަދަ ކޮންޓްރޯލްތަކެއް ގެނެސްފައިވާއިރު މި ސަރުކާރު ވެރިކަމަށް އައި ފަހުން ބޭންކް އޮފް މޯލްޑިވްސް (ބީއެމްއެލް) އިން ވެސް ވަނީ ބޭންކުގެ ރުފިޔާ ކާޑުތަކުން ޑޮލަރުގެ މުއާމަލާތް ކުރެވޭ މިންވަރު ވަރަށް ބޮޑަށް ދަށްކޮށްފަ އެވެ.
ބޭންކުތަކުން ޑޮލަރު ލިމިޓްތަކަށް ގެނައި މި ބަދަލުތަކަކީ ރާއްޖޭގައި ޑޮލަރު ދަތިކަން ބޮޑުވަމުންދާތީ ގެނައި ބަދަލުތަކެއްކަން ފާހަގަކުރެވެ އެވެ. މި ސަރުކާރު ވެރިކަމަށް އައި ފަހުން ޑޮލަރު ދަތިކަން ބޮޑުވެ ބޭންކުތަކުން ޑޮލަރު ލިބުން އުނދަގޫވެފައިވާތީ އާއްމު ރައްޔިތުންގެ ފާޑުކިޔުން ސަރުކާރަށް ވަރަށް ބޮޑަށް އަމާޒުވަމުންނެވެ.
