ބީއެމްއެލް އިން ލޯނާއި ފައިނޭންސިންގ ދޫކުރާ އެންމެ މަތީ އުމުރުފުރާ 60 އަހަރުން 75 އަހަރަށް މަތިކޮށްފި

ބޭންކް އޮފް މޯލްޑިވްސް ބީއެމްއެލް އިން ލޯނާއި ފައިނޭންސިންގ ދޫކުރާ އެންމެ މަތީ އުމުރުފުރާ 60 އަހަރުން 75 އަހަރަށް މަތިކޮށްފި އެވެ.

އަންގާރަ ދުވަހު ބީއެމްއެލްއިން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ބީއެމްއެލްގެ ސީއީއޯ އަދި މެނޭޖިންގ ޑިރެކްޓަރ މުޙައްމަދު ޝަރީފް ވިދާޅުވީ  ބީއެމްއެލް އިން ލޯނާއި ފައިނޭންސިންގ ދޫކުރާ އެންމެ މަތީ އުމުރުފުރާ ބަދަލުކުރުމަށް ނިންމާފައި ވަނީ އެ ބޭންކުގެ ބޯޑުން ނިންމައިގެން ކަމަށެވެ.

ކުރިން އެ ބޭންކުން ދޫކުރަމުން އައި ލޯނުތައް ދެމުން ދިޔައީ 60 އަހަރު ވާއިރު ދެއްކޭ ގޮތަށެވެ. އެ އުމުރު މިހާރު 75 އަހަރަށް ވަނީ މަތިކޮށްފަ އެވެ. އެހެންކަމުން މިހާރު އުމުރުން 18 އަހަރާއި 75 އަހަރާއި ދެމެދުގެ ފަރާތްތަކަށް ލޯނަށް އެދި ހުށަހެޅޭނެ އެވެ. 

ޝަރީފް ވިދާޅުވީ ކުރިން އޮންނަ ގޮތުން 60 އަހަރަށް ވުރެ އުމުރުން ދުވަސް ވެފައިވާ ނަމަ ލޯނު ނުދެވޭ ކަމަށެވެ. އަދި 55 އަހަރު ވާ މީހާ އަށް ވެސް ލޯނު ދޭން ޖެހެނީ 5 އަހަރު ތެރޭގައި ދައްކާ ގޮތަށް ކަމަށް އޭނާ ވިދާޅުވި އެވެ. 

މި ބަދަލާއި ގުޅިގެން ގޯތި ގެދޮރު ގަތުމުގައި އިތުރު ލުއިތަކެއް ލިބިގެން ދާނެ ކަމަށް އޭނާ ވިދާޅުވި އެވެ. މި ބަދަލާއި އެކު 20-25 އަހަރަށް ދަންމާލައިގެން ލޯނުތައް ދެއްކުމުގެ މަގު ފަހިވެގެންދާނެ ކަން ޝަރީފް ވަނީ ފާހަގަކުރައްވާފަ އެވެ. 

ލޯނުތަކާއި ގުޅޭ ގޮތުން އިތުރަށް ވާހަކަދައްކަވަމުން ޝަރީފް ވިދާޅުވީ ރިސޯޓްގައި މަސައްކަތް ކުރާ ގިނަ މުވައްޒަފުންނަށް ސަރވިސް ޗާޖާއި އެކު މުސާރަ ޑޮލަރުން ލިބޭ ކަމަށެވެ. އެ ފަރާތްތަކަށް ކުޑަ އަގެއްގައި ލޯނު ލިބޭނެ މަގު ފަހިކޮށްދެމުންދާ ކަމަށް ވެސް އޭނާ ވިދާޅުވި އެވެ.

މީގެ އިތުރުން ޑޮލަރުން އާމްދަނީ ލިބޭ ނަމަ ޑޮލަރުން ލޯނު އަނބުރާ ދައްކާ ހާލަތުގައި ކުޑަ އަގުގައި ލޯނު ލިބޭނެ ކަމަށާއި އެއީ ނޯމަލް އިންޓްރެސްޓް ރޭޓުން ބަލާއިރު %1.5 ކުޑަކޮށް އަދި އިކުއިޓީވެސް އިންވެސްޓްކުރަންޖެހޭ ވަރު %5 އަށް ކުޑަކޮށް ލޯނުދޭނެ ކަމަށް އޭނާ ވިދާޅުވި އެވެ.