މިސްކިތްތަކުގައި އިމާމުންގެ ދަތިކަން ހައްލުކުރަން ހާއްސަ އިމްތިހާނެއް
ރަށްރަށުގެ މިސްކިތްތަކަށް ދާއިމީ އިމާމުން ނުލިބޭ މައްސަލަ ހައްލުކުރުމަށްޓަކައި، އިމާމުކަމުގެ ހާއްސަ އިމްތިހާނެއް ފުރިހަމަކުރުމުން އެ ވަޒީފާ އަދާކުރެވޭނެ އުސޫލެއް އެކުލަވައިލުމުގެ މަސައްކަތް އިސްލާމިކް މިނިސްޓްރީން ފަށައިފި. މި ނިޒާމުގެ ދަށުން އޯލެވެލް ނިންމާ ދަރިވަރުންނަށާއި، ރަސްމީ ކޯހެއް ނެތަސް މިނިސްޓްރީގެ މުގައްރަރަށް ފާސްވާ ފަރާތްތަކަށް އިމާމުކަން ކުރުމުގެ ހުއްދަ ދިނުމަށް ވަނީ ނިންމާފަ. ރާއްޖޭގެ 69 މިސްކިތެއްގައި މިވަގުތު ދާއިމީ އިމާމުން ނެތްއިރު، މި ބަދަލާއެކު މިސްކިތްތަކަށް ދިމާވެފައިވާ މުވައްޒަފުންގެ ދަތިކަމަށް ދާއިމީ ހައްލެއް ލިބޭނެ ކަމަށް ސަރުކާރުން އުންމީދު ކުރޭ.
އިސްލާމިކް މިނިސްޓަރު ޑޮކްޓަރު މުޙައްމަދު ޝަހީމް އަލީ ސައީދު | ރައީސް އޮފީސް
ރާއްޖޭގެ ގިނަ ރަށްތަކެއްގެ މިސްކިތްތަކުގައި ދާއިމީ އިމާމުން ނެތުމުގެ ސަބަބުން ދިމާވެފައިވާ ގޮންޖެހުންތަކަށް އަވަސް ހައްލެއް ހޯދުމުގެ ގޮތުން، އިމާމުކަމުގެ ހާއްސަ އިމްތިހާނެއް ތައާރަފްކޮށް އިމާމުކަން ކުރުމުގެ ހުއްދަ ދޫކުރަން ނިންމާފައިވާ ކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެ އެވެ.
މީޑިއާތަކަށް ފޮނުއްވި މެސެޖެއްގައި މިނިސްޓަރު ޝަހީމް ވިދާޅުވީ، ރަށްރަށުގެ މިސްކިތްތަކުގައި ދާއިމީ އިމާމުން ނެތި ވަގުތީ އިމާމުން ތިބެންޖެހޭ މައްސަލައަށް ދާއިމީ ހައްލެއް ބޭނުންވާ ކަމަށެވެ. މި މައްސަލަ ދިމާވާ މައިގަނޑު ސަބަބުތަކުގެ ތެރޭގައި ރަށްރަށުގައި މިސްކިތްތައް އިތުރުވުމާއި، އިމާމުކަމުގެ ވަޒީފާ އަދާކުރެވޭ ފެންވަރުގެ މީހުން ބައެއް ރަށްތަކުގައި މަދުވުން ހިމެނޭކަން މިނިސްޓަރު ފާހަގަކުރެއްވި އެވެ.
މި މައްސަލަ ހައްލުކުރުމަށް މިނިސްޓްރީން ރާވާފައިވާ ކަންކަމުގެ ތަފްސީލް ދެއްވަމުން މިނިސްޓަރު ވިދާޅުވީ، އޯލެވެލް ނިންމާ ދަރިވަރުންގެ ތެރެއިން މި ދާއިރާއަށް ޝައުގުވެރިވާ ކުދިންނަށް ވަޒީފާގެ ފުރުސަތުތައް ފަހިކޮށްދިނުމަށް މަސައްކަތް ކުރައްވާނެ ކަމަށެވެ. މީގެ އިތުރުން، އިމާމުކަމުގެ ރަސްމީ ކޯހެއް ފުރިހަމަކޮށްފައި ނެތް ނަމަވެސް، މިނިސްޓްރީން ކަނޑައަޅާ ވަކި މުގައްރަރެއްގެ ދަށުން ކޮންމެ އަހަރަކު ބާއްވާ އާންމު އިމްތިހާނަކުން ފާސްވާ ފަރާތްތަކަށް އިމާމުކަން ކުރުމުގެ ހުއްދަ ދިނުމަށް ވަނީ ނިންމާފަ އެވެ.
މި އާ ނިޒާމުގެ ސަބަބުން އިމާމުންގެ ދަތިކަން ހުރި ރަށްރަށަށް ބޭނުންވާ މީހުން ހޯދުމުގައި ލުއިތަކެއް ލިބިގެންދާނެ ކަމަށް މިނިސްޓްރީން އުންމީދު ކުރެ އެވެ. މިކަމާ ގުޅޭގޮތުން ކަމާބެހޭ އެހެނިހެން އިދާރާތަކާއެކު މަޝްވަރާ ކުރަމުންދާ ކަމަށާއި، އެ މަޝްވަރާތަކަށްފަހު މިކަމުގައި އަމަލުކުރާނެ ގޮތް ވަރަށް އަވަހަށް އިއުލާން ކުރައްވާނެ ކަމަށްވެސް މިނިސްޓަރު ޝަހީމް ވިދާޅުވި އެވެ.
އިސްލާމިކް މިނިސްޓްރީގެ ތަފާސްހިސާބުތަކަށް ބަލާއިރު، ރާއްޖޭގެ މީހުން ދިރިއުޅޭ ރަށްރަށުގައި ޖުމްލަ 623 މިސްކިތް ހުންނަ އިރު، މީގެ ތެރެއިން ދާއިމީ އިމާމުން ހަމަޖެހިފައިވަނީ 554 މިސްކިތަކަށެވެ. ރާއްޖޭގައި މިވަގުތު 569 ދާއިމީ އިމާމުން ތިބި އިރު މިނިސްޓްރީގެ ހިސާބުތަކުން ދައްކާގޮތުގައި މިވަގުތު 69 މިސްކިތެއްގައި ދާއިމީ އިމާމަކު ނެތެވެ. އަދި ދެ އިމާމުން މަސައްކަތް ކުރަނީ މުޅި ރާއްޖޭގެ އެންމެ 15 މިސްކިތުގަ އެވެ.
