ޢީދު ފާހަގަކުރުމަށް އިސްލާމިކް މިނިސްޓްރީން ޚާއްޞަ ޕްލޭނެއް އެކުލަވާލަނީ
4 ޖޫން 2026 | ބުރާސްފަތި 14:37ކުރިއަށް އޮތް ހިޖުރީ އައު އަހަރުން ފެށިގެން ރާއްޖޭގައި ކުލަގަދަކޮށް އީދު ފާހަގަކުރުމަށްޓަކައި އިސްލާމިކް މިނިސްޓްރީގެ ޚާއްޞަ ކޮމިޓީއަކުން ޕްލޭނެއް އެކުލަވާލުމުގެ މަސައްކަތް ފަށައިފި. ކައުންސިލްތަކާއި ޖަމިއްޔާތަކާ ގުޅިގެން ކުރިއަށްގެންދާ މި މަސައްކަތަކީ އިސްލާމީ އުސޫލުތަކާއި ދިވެހި ސަގާފަތާ އެއްގޮތަށް އީދު ހަރަކާތްތައް ތަރުތީބުކޮށް، އެއްގޮތް އުސޫލުތަކެއްގެ ދަށުން އީދު ފާހަގަކުރުމަށް ކުރެވޭ މަސައްކަތެއްކަމަށް މިނިސްތްރީ އިން ބުނޭ. މި ޕްލޭންގެ ސަބަބުން އަތޮޅުތަކާއި ސިޓީތަކުގައި ހިންގާ ހަރަކާތްތައް އިތުރަށް ހަރުދަނާވެ، ދީނީ އަދި އިޖުތިމާއީ ރޫހު އާލާވާނެ ކަމަށް ސަރުކާރުން ބުނޭ.
މި އަހަރުގެ ބޮޑުޢީދު ގައި ކުޅުދުއްފުށި ސިޓީގައި ބޭއްވި މަށިމާލި ޕެރޭޑްގެ ތެރެއިން | ރާއްޖެއެމްވީ
ކުރިއަށް އޮތް ހިޖުރީ އައު އަހަރުން ފެށިގެން ކޮންމެ އަހަރަކު ވެސް ފިޠުރު ޢީދާއި އަޟްޙާ ޢީދު ރާއްޖޭގައި ކުލަގަދަކޮށް ފާހަގަކުރުމާ ގުޅޭ ގޮތުން އިސްލާމިކް މިނިސްޓްރީން ޚާއްޞަ ޕްލޭނެއް އެކުލަވައިލުމުގެ މަސައްކަތް ފަށައިފި އެވެ.
އިސްލާމިކް މިނިސްޓަރ ޑރ. މުޙައްމަދު ޝަހީމް ޢަލީ ސަޢީދު ބުރާސްފަތި ދުވަހު މީޑިއާތަކަށް ފޮނުއްވި މެސެޖެއްގައި ވިދާޅުވީ، 1448 ވަނަ އަހަރުން ފެށިގެން ކޮންމެ އަހަރަކު ވެސް އިސްލާމީ ދެ ޢީދު މާލެއާއި އަތޮޅުތަކުގައި ފާހަގަކުރުމާ ބެހޭ ގޮތުން މިނިސްޓްރީގެ ޚާއްޞަ ކޮމިޓީއަކުން ޕްލޭނެއް އެކުލަވާލަން ފަށާފައިވާ ކަމަށެވެ. މި ޕްލޭނަކީ ހަމައެކަނި ގަވާއިދުތަކެއް ހެދުން ނޫން ކަމަށާއި، މިއީ ކައުންސިލްތަކާއި ޖަމިއްޔާތަކާ ގުޅިގެން ޢީދު ދުވަހުގެ މުނާސަބަތުގައި ހިންގާނެ ހަރަކާތްތައް ތަރުތީބުކުރުމަށް އެކުލަވައިލާ އުސޫލެއް ކަމަށް ވަޒީރު ފާހަގަކުރެއްވި އެވެ.
މި ޕްލޭންގެ ދަށުން ރަށްރަށުގެ ކައުންސިލްތަކާ މަޝްވަރާކޮށް، ރަށްރަށުގައި ހަރަކާތްތެރިވާ އިސްލާމީ ޚިދުމަތްދޭ މަދަނީ ޖަމިއްޔާތައް ބައިވެރިކޮށްގެން ޢީދުގެ ހަރަކާތްތައް ކުރިއަށް ގެންދިއުމަށް ވަނީ ނިންމާފަ އެވެ. ވަކިން ޚާއްޞަކޮށް، ރާއްޖޭގެ ސިޓީތަކުގައި ޢީދު ފާހަގަކުރުމަށް މުހިންމު އިވެންޓްތަކެއް ކުރިއަށް ގެންދާނެ ކަމަށް ވެސް ވަޒީރު ވިދާޅުވި އެވެ. މި މަސައްކަތަކީ ސަރުކާރުގެ އެކި ވުޒާރާތައް ގުޅިގެން ކުރިއަށްގެންދާ މަސައްކަތަކަށް ވާއިރު، މިކަމުގައި މިނިސްޓްރީ އޮފް ދިވެހި ލެންގުއޭޖް، ކަލްޗަރ އެންޑް ހެރިޓޭޖް ނުވަތަ ސަޤާފަތާ ބެހޭ ވުޒާރާއާ ގުޅިގެން މަސައްކަތް ކުރާނެ ކަމަށް ޝަހީމް ވިދާޅުވި އެވެ.
ޢީދު ފާހަގަކުރާނެ ގޮތުގެ ޚާއްސަ ޕްލޭނެއްގެ މަސައްކަތް އިސްލާމިކް މިނިސްޓްރީން މި ފެށީ، ނިމިދިޔަ އަޟްޙާ ޢީދު ފާހަގަކުރުމަށް ކުރިއަށްގެންދިޔަ ބައެއް ހަރަކާތްތަކާ ގުޅޭގޮތުން ބޮޑެތި ބަހުސްތަކެއް ކުރެވި، ބައެއް ފަރާތްތަކުން ނުރުހުން ފާޅުކޮށްފައިވާ ދަނޑިވަޅެއްގަ އެވެ. އެގޮތުން ކުޅުދުއްފުށީގައި ބޭއްވި މަށިމާލި ޕެރޭޑުގައި ސަރުކާރަށް ފާޑުކިޔާ ފުޅަނދުތަކެއް ހިމެނުމުން، ސަރުކާރަށް ތާއީދުކުރާ ބައެއް ފަރާތްތަކުން ވަނީ އެފަދަ ޕެރޭޑުތައް މަނާކުރުމަށް ވެސް ގޮވާލާފަ އެވެ.
އިސްލާމިކް މިނިސްޓްރީން ބުނީ މި ޕްލޭންގެ ސަބަބުން ކުރިއަށް އޮތް ތަނުގައި ޢީދުތައް ފާހަގަކުރުމުގައި އެއްގޮތް އުސޫލުތަކެއް ހިފެހެއްޓި، އިސްލާމީ އަދި ދިވެހި ސަޤާފީ ރީތި އާދަކާދަތައް ދިރުވުމަށް ފުރުސަތު ލިބިގެންދާނެ ކަމަށެވެ.
