ފްލައިނާސްއިން ރިޔާޟް-މާލެ ސީދާ ދަތުރުތައް އަލުން ފަށައިފި
ސައުދީ އަރަބިއްޔާގެ ފްލައިނާސް އެއާލައިނުން ރިޔާޟާއި މާލެއާ ދެމެދު ހަފުތާއަކު ތިން ދަތުރު ކުރުމަށް ނިންމައި، ޝެޑިއުލް ދަތުރުތައް އަލުން ފަށައިފި. ޖޫން 20 ވަނަ ދުވަހު ފެށި މި ދަތުރުތަކުގެ ފުރަތަމަ ފްލައިޓުން އައި ފަސިންޖަރުންނަށް ވެލާނާ އިންޓަނޭޝަނަލް އެއާޕޯޓުން ވަނީ ހޫނު މަރުހަބާއެއް ކިޔާފައި.
ސައުދީ އަރަބިއްޔާގެ ބަޖެޓް އެއާލައިން، ފްލައިނާސް އިން އެ ގައުމުގެ ރިޔާޟުން ދިވެހިރާއްޖެ އަށް ކުރާ ސީދާ ދަތުރުތައް އަލުން ފަށައިފި. | ވެލާނާ އެއާޕޯޓް
ފްލައިނާސް އެއާލައިނުން ސައުދީ އަރަބިއްޔާގެ ރިޔާޟާއި މާލެއާ ދެމެދު ސީދާ ދަތުރުތައް އަލުން ކުރުމަށް ނިންމައި، ވެލާނާ އިންޓަނޭޝަނަލް އެއާޕޯޓަށް ޝެޑިއުލް ދަތުރުތައް ކުރަން ފަށައިފިއެވެ.
ސައުދީ އަރަބިއްޔާއަށް ނިސްބަތްވާ މި ބަޖެޓް އެއާލައިނުން ރިޔާޟްގެ ކިންގް ޚާލިދު އިންޓަނޭޝަނަލް އެއާޕޯޓާއި ވެލާނާ އިންޓަނޭޝަނަލް އެއާޕޯޓާ ދެމެދު ހަފުތާއަކު ތިން ފްލައިޓް ބޭއްވުމަށް ވަނީ ހަމަޖެހިފައެވެ.
ދަތުރުތައް އަލުން ފެށުމުގެ ގޮތުން ކުރި ފުރަތަމަ ދަތުރު، ފްލައިނާސްގެ އެކްސްވައި245 (XY245) ފްލައިޓް ރިޔާޟުން ފުރައިގެން ވެލާނާ އިންޓަނޭޝަނަލް އެއާޕޯޓަށް އައިސްފައިވަނީ ޖޫން މަހުގެ 20 ވަނަ ދުވަހުއެވެ. މި ފްލައިޓުން އައި ފަސިންޖަރުންނަށް މަރުހަބާ ކިޔާފައިވަނީ ސަގާފީ ބޮޑުބެރުގެ ހަރަކާތްތަކަކާއެކު، ވޯޓާ ސަލިއުޓެއް އަރުވައިގެންނެވެ.
މި ދަތުރުތައް ފެށުމުގެ މުނާސަބަތުގައި، ފްލައިނާސްގެ ފުރަތަމަ ފްލައިޓުން ރާއްޖެއަށް އައި ފަސިންޖަރުންނަށާއި، ވެލާނާ އިންޓަނޭޝަނަލް އެއާޕޯޓުން އެ އެއާލައިނުގެ ފުރަތަމަ ފްލައިޓުން ފުރި ފަސިންޖަރުންނަށް ވަނީ ހާއްސަ ހަދިޔާތަކެއް ދީފައެވެ.
