ބުރްކީނާ ފާސޯގެ ރައީސް ކެޕްޓަން އިބްރާހީމް ޓްރައޮރޭ އަވަހާރަކޮށްލަން އުޅެފި

ބުރްކީނާ ފާސޯގެ އަސްކަރީ ލީޑަރު ކެޕްޓަން އިބްރާހީމް ޓްރައޮރޭ އަވަހާރަކޮށްލަން ރޭވި ނުރައްކާތެރި ރޭވުމެއް ނާކާމިޔާބު ކޮށްލާފައިވާ ކަމަށް އެ ގައުމުގެ ސަރުކާރުން ހާމަކޮށްފި އެވެ.

ހުޅަނގު އެފްރިކާގެ މި ގައުމުގެ ސެކިއުރިޓީ މިނިސްޓަރު ދައުލަތުގެ މީޑިއާ މެދުވެރިކޮށް ވިދާޅުވީ، މި ރޭވުމުގެ ފަހަތުގައި ހުންނެވީ 2022 ވަނަ އަހަރުގެ ސެޕްޓެމްބަރު މަހު ޓްރައޮރޭ ވެރިކަމުން ދުރުކުރެއްވި ކުރީގެ އަސްކަރީ ވެރިޔާ ލެފްޓިނެންޓް ކާނަލް ޕޯލް ހެންރީ ދަމީބާ ކަމަށެވެ.

ސެކިއުރިޓީ މިނިސްޓަރު މުހައްމަދު ސާނާ ވިދާޅުވި ގޮތުގައި، އެ ގައުމުގެ އިންޓެލިޖެންސް އިދާރާތަކުން މި އޮޕަރޭޝަން ހުއްޓުވީ އެންމެ ފަހު ވަގުތުގަ އެވެ. މި ރޭވުމުގެ ދަށުން ދައުލަތުގެ އިސްވެރިޔާ އަވަހާރަކޮށްލުމަށް ފަހު، ސަރުކާރުގެ މުހިންމު އިދާރާތަކަށާއި އާންމު ބައެއް ފަރާތްތަކަށް ހަމަލާދޭން އޮތީ ރާވާފަ އެވެ. އަދި މިކަމަށް ބޭނުންވާ ފައިސާގެ އެހީތެރިކަން އަވަށްޓެރި އައިވަރީ ކޯސްޓުން ފޯރުކޮށްދީފައިވާ ކަމަށްވެސް އޭނާ ތުހުމަތު ކުރެއްވި އެވެ.

މި ތުހުމަތުތަކާ ގުޅޭގޮތުން ކާނަލް ދަމީބާ ނުވަތަ އައިވަރީ ކޯސްޓުގެ ސަރުކާރުން އަދި ވަކި އެއްޗެއް ބުނެފައެއް ނުވެއެވެ.

ކެޕްޓަން ޓްރައޮރޭ ވެރިކަމާ ހަވާލުވެވަޑައިގަތް ފަހުން، އޭނާގެ ސަރުކާރު ވައްޓާލަން މީގެ ކުރިންވެސް ދެ ފަހަރަކު ބަގާވާތް ކުރަން މަސައްކަތް ކޮށްފައިވެ އެވެ. މީގެ އިތުރުން، އެ ގައުމުގައި ހަރަކާތްތެރިވާ ހަރުކަށި ފިކުރުގެ ހަނގުރާމަވެރިންގެ ނުރައްކަލާ ވެސް އޭނާ ދަނީ ކުރިމަތިލަމުންނެވެ.

އުމުރުން 37 އަހަރުގެ ޓްރައޮރޭ އަކީ ހަރުކަށި ވެރިއެއްގެ ގޮތުގައި ބައެއް ފަރާތްތަކުން ސިފަކުރި ނަމަވެސް، ހުޅަނގުގެ ނުފޫޒާ ދެކޮޅަށް އޭނާ ގެންގުޅުއްވާ ސިޔާސަތުތަކާއި އެފްރިކާގެ މިނިވަންކަމަށް ވަކާލާތު ކުރައްވާތީ، ގައުމުގެ ރައްޔިތުންގެ މެދުގައި އޭނާއަށް ބޮޑު ތާއީދެއް އޮވެ އެވެ.

ސެކިއުރިޓީ މިނިސްޓަރު ވިދާޅުވި ގޮތުގައި، މި ރޭވުން ރޭވި މީހުން ވާހަކަދައްކާ ވީޑިއޯ އެއް ކަމާބެހޭ ފަރާތްތަކަށް ވަނީ ލިބިފައެވެ. އެ ވީޑިއޯގައިވާ ގޮތުން، ދައުލަތުގެ އެންމެ އިސް ވެރިޔާ އަވަހާރަކޮށްލަން ނިންމާފައި ވަނީ ޖެނުއަރީ މަހުގެ 3 ވަނަ ދުވަހުގެ ރޭގަނޑު، ގާތުން ބަޑިޖަހައިގެން ނުވަތަ އޭނާ ދިރިއުޅުއްވާ ތަނުގައި ގޮއްވާލާ އެއްޗެއް ހަރުކޮށްގެންނެވެ.

މި ރޭވުން ތަންފީޒު ކުރުމަށްޓަކައި ދާމީބާ ވަނީ ސިފައިންނާއި އާންމުންގެ ބަޔަކު ތައްޔާރުކޮށް، އައިވަރީ ކޯސްޓުން ގާތްގަނޑަކަށް 125,000 ޑޮލަރުގެ ފައިސާ ހޯދާފައި ކަމަށް ސަރުކާރުން ބުނެ އެވެ.

މި މައްސަލައާ ގުޅިގެން މިހާތަނަށް ބައެއް މީހުން ހައްޔަރުކޮށްފައިވާ ކަމަށާއި، އެ މީހުން އިންސާފުގެ ކުރިމައްޗަށް ވަރަށް އަވަހަށް ހާޒިރުކުރާނެ ކަމަށްވެސް މިނިސްޓަރު ވިދާޅުވިއެވެ. އަދި ގައުމުގެ މަސްލަހަތު މިހާރު އޮތީ ކޮންޓްރޯލްގެ ދަށުގައި ކަމަށް އޭނާ ޔަގީންކޮށްދެއްވިއެވެ.

ބުރްކީނާ ފާސޯގެ ދާޚިލީ ކަންކަމަށް އައިވަރީ ކޯސްޓުން ނުފޫޒު ފޯރުވާ ކަމަށް އެ ގައުމުގެ އަސްކަރީ ސަރުކާރުން ތުހުމަތު ކުރާތާ ދުވަސްތަކެއް ވަނީ ވެފަ އެވެ. މިފަދަ ހަމަނުޖެހުންތަކުގެ ސަބަބުން އެ ސަރަހައްދުގެ ގައުމުތަކުގެ މެދުގައި އޮތް ނުތަނަވަސްކަން އިތުރަށް ބޮޑުވެގެންދާނެ ކަމަށް މަސްރަހު ދިރާސާކުރާ ފަރާތްތަކުން ބުނެ އެވެ.

ކާނަލް ޑަމީބާ އަކީ ބުރުކީނާ ފާސޯ ގެ  އިންތިޚާބީ ސަރުކާރު ވައްޓާލުމަށް ފަހު ވެރިކަމަށް އައި ފަރާތެކެވެ. އެހެން ނަމަވެސް 2022 ވަނަ އަހަރު އޭނާ ވެރިކަމުން ދުރުކުރެވުނެވެ. އެއަށް ފަހު، އަވަށްޓެރި ޓޯގޯ އަށް ހިޖުރަކޮށް، މީސްމީޑިއާ މެދުވެރިކޮށް އާންމުކުރެއްވި މެސެޖެއް ގައި، އޭނާގެ ފަހުން ވެރިކަމާ ހަވާލުވެވަޑައިގަތް ފަރާތަށް ފުރިހަމަ ކާމިޔާބީ އަށް އެދޭ ކަމަށް ލިޔެފައިވެ އެވެ.