ޕާކިސްތާނުގައި ސިޔާސީ އެއްވުމެއް އޮތް ތަނެއްގެ ކައިރީގައި ބޮމެއް ގޮއްވާލުމުގެ ސަބަބުން 15 މީހުން މަރުވެ، 30 އަށްވުރެ ގިނަ މީހުން ޒަޚަމް ވެއްޖެ އެވެ.

ރިޕޯޓުތައް ބުނާ ގޮތުގައި ބަލޫޗިސްތާން ޕްރޮވިންސްގެ ވެރިރަށް ގުއެޓާގައި ހުރި ސްޓޭޑިއަމެއްގައި ބަލޫޗިސްތާން ނެޝަނަލް ޕާޓީ (ބީއެންޕީ)ގެ ސަތޭކަ އެތައް މެންބަރުން އެއްވެ ތިއްބާ، އަންގާރަ ދުވަހުގެ ރޭ ޕާކިންގ އޭރިއާގައި ބޮމެއް ގޮއްވާލިއެވެ.

ބުދަ ދުވަހު ޕްރޮވިންސްގެ އޮތޯރިޓީތަކުން ބުނެފައި ވަނީ މަރުވި މީހުންގެ އަދަދު 15 އަށް އިތުރުވެފައިވާ ކަމަށެވެ. މި ހަމަލާ ދިންކަމަށް އިސްލާމިކް ސްޓޭޓް ހަތިޔާރު އެޅި ގްރޫޕުން ބުނެފައިވެއެވެ.

އަފްޣާނިސްތާނާއި އީރާނާ އިންވެގެން އޮންނަ ބަލޫޗިސްތާނަކީ އެ ޤައުމުގެ އެންމެ ބޮޑު އަދި އެންމެ ފަގީރު ސަރަޙައްދެވެ. އެތަނުގެ ރައްޔިތުން އިސްލާމިކް ސްޓޭޓާއި، ސަރަހައްދު މިނިވަން ކުރުމަށް ކަމަށް ބުނެ މަސައްކަތް ކުރާ ގްރޫޕްތަކާ ދެމެދުގައި ގަވާއިދުން ހިންގާ ހަމަލާތަކާ ކުރިމަތިލާން ޖެހެއެވެ.

ޕާކިސްތާނުގެ ޖިއޯ ނިއުސްގެ ރިޕޯޓުގައިވާ ގޮތުން، ބަލޫޗިސްތާނުގެ ސިއްޙީ ވަޒީރު ބަޚްތު މުޙައްމަދު ކަކާރު ވިދާޅުވީ ސަލާމަތީ ބާރުތައް ސެކިއުރިޓީ ބަލަހައްޓަމުން ދިއުމުގެ ސަބަބުން ޖާނުން ފިދާ ވެގެން ހަމަލާ ދިން މީހާ އަށް އެއްވުން އޮތް ސަރަޙައްދަށް ވަދެވިފައި ނުވާ ކަމަށެވެ.

ސަރުކާރުގެ އޮފިޝަލް ހަމްޒާ ޝަފްޤަތު ނޫސްވެރިންނަށް ބުނެފައި ވަނީ، އެއްވުމުގެ ތެރެއަށް ބޮން ގޮއްވާލި މީހާ އަށް ވަދެވުނު ނަމަ ގެއްލުން ވަރަށް ބޮޑުވީސް ކަމަށެވެ. އޭނާ އިތުރަށް ވިދާޅުވީ ސަރުކާރުން 120 ފުލުހުން އެއްވުމުގެ ސަލާމަތަކީ ކަންކަން ބެލެހެއްޓުމަށް ޑިޕްލޯއި ކުރި ކަމަށެވެ.

އަންގާރަ ދުވަހުގެ ރޭ ބޭއްވި އެއްވުމަކީ 2021 ގައި އަވަހާރަވި ބަލޫޗިސްތާނުގެ ކުރީގެ ވެރިޔާ އަތާއުﷲ މެންގަލްގެ ހަނދާނުގައި ބޭއްވި އެއްވުމެކެވެ.

ޕާކިސްތާނުގެ ބޮޑުވަޒީރު ޝަހްބާޒް ޝަރީފް، ބީއެންޕީގެ އެއްވުމަށް އަމާޒުކޮށް ދިން ހަމަލާ ކުށްވެރިކޮށް، މިއީ "ބަލޫޗިސްތާނުގައި ހަމަނުޖެހުން އުފެއްދުމަށް ޓެރަރިސްޓުން ރާވާ ނުބައި ރޭވުމުގެ ހެއްކެއް" ކަމަށް ވިދާޅުވެފައިވާ ކަމަށް ލޯކަލް މީޑިއާ އިން ރިޕޯޓުކޮށްފައި ވެއެވެ.

ބަލޫޗިސްތާނުގައި ހަތިޔާރު އެޅި ތަފާތު ގުރޫޕް ތައް ހަރަކާތްތެރިވަމުން ދިއުމާއެކު، އެތަނުގެ ރައްޔިތުންގެ ސަލާމަތަށް އަބަދުވެސް ނުރައްކާވެފައިވެއެވެ.

ފެބްރުއަރީ 2024 ގައި، ޕާލިމެންޓަރީ އިންތިޚާބުގެ ކުރީ ދުވަހު ބަލޫޗިސްތާނުގެ އިންތިޚާބީ އޮފީސްތަކަށް ދިން ބޮން ހަމަލާގެ ޒިންމާ އިސްލާމިކް ސްޓޭޓުން ނަގާފައިވެއެވެ. މި ހަމަލާތަކުގައި 20 އަށްވުރެ ގިނަ މީހުން މަރުވެ، އެތައް ބަޔަކު ޒަޚަމްވިއެވެ.

ނޮވެމްބަރު މަހު، ގުއެޓާގެ ރެއިލްވޭ ސްޓޭޝަނެއްގައި ހިންގި ބޮމުގެ ހަމަލާއެއްގައި 20 އަށްވުރެ ގިނަ މީހުން މަރުވެ، އެތައް ބަޔަކު ޒަޚަމްވިއެވެ. މި ހަމަލާގެ ޒިންމާ ބަލޫޗް ލިބަރޭޝަން އާމީ މިލިޓަންޓް ގްރޫޕުން ނަގާފައިވެއެވެ.

އަދި މިއަހަރުގެ މާރިޗް މަހު، ވަކިވަން އެދޭ ބަލޫޗިސްތާން ލިބަރޭޝަން އާމީގެ ހަތިޔާރުއެޅި ހަނގުރާމަވެރިން 400 އަށްވުރެ ގިނަ ފަސިންޖަރުން އުފުލި ރެއިލެއް ހައިޖެކް ކޮށް، ބަލޫޗް ސިޔާސީ ގައިދީން ދޫކޮށްނުލައިފިނަމަ ރޭލުގައި ތިބި މީހުން މަރާލާނެ ކަމަށް ބުނެފައިވެއެވެ.