ނޭމާގެ ޙާލަތު ރަނގަޅު ކަމަށް ބްރެޒިލް އިން ބުނެފި

ބްރެޒިލް ޤައުމީ ޓީމުގެ ތަރި ނޭމާ ޖޫނިއާ އަށް ލިބިފައިވާ އަނިޔާ އިން ރަނގަޅުވުމަށް ކުރަމުން އަންނަ މަސައްކަތް ތަކުގެ ތެރެއިން، އުންމީދު ކުރި ވަރަށް ވުރެ ބޮޑަށް އޭނާގެ ޙާލަތު ރަނގަޅު ވަމުން އަންނަ ކަމަށް ބްރެޒިލް އިން ބުނެފި އެވެ.

ބްރެޒިލްގެ ފުޓުބޯޅަ ފެޑެރޭޝަން އިން ނެރުނު ބަޔާނެއްގައި ބުނެފައި ވަނީ، ނޭމާގެ ފަރުވާގެ ކަންކަން ކުރިއަށް ދަނީ ވަރަށް ހެޔޮ ބަދަލުތަކާ އެކު ކަމަށެވެ. 

މިދިޔަ ހޯމަ ދުވަހު ނޭމާގެ ހަށިގަނޑުގެ އެމްއާރުއައި ސްކޭނެއް ހަދާފައިވާކަން ފާހަގަކޮށް ބްރެޒިލްގެ ފެޑެރޭޝަން އިން ބުނީ، ޓެސްޓު ތަކުގެ ނަތީޖާ އިން ދައްކާ ގޮތުގައި ނޭމާގެ ޙާލަތު އަންނަނީ ރަނގަޅު ވަމުން ކަމަށެވެ. އަދި މި ކުރިއެރުން ތަކަކީ، މެޑިކަލް ޓީމުން އުންމީދު ކުރި މިންގަނޑު ތަކުގެ ތެރޭގައި ހުރި ކުރިއެރުން ތަކެއް ކަމަށް ވެސް އެ އިދާރާ އިން ބުނެފައިވެ އެވެ. 

ނޭމާގެ ރިކަވަރީ، ނުވަތަ އަނިޔާ އިން ރަނގަޅު ވުމަށް ކުރިއަށް ގެންދާ ޕްރޮގްރާމްއާ ގުޅޭ ގޮތުން ފެޑެރޭޝަން އިން ބުނީ، ކުރިއަށް އޮތް ތަނުގައި އޭނާ އަމަލު ކުރަމުން ދާނީ ބްރެޒިލްގެ ޤައުމީ ޓީމުގެ މެޑިކަލް ކޮމިޝަން އިން ރާވާފައިވާ ޕްލޭންއާ އެއްގޮތަށް ކަމަށެވެ. މި ޕްލޭން އަކީ، އޭނާ އެނބުރި ދަނޑަށް ނިކުތުމަށްޓަކައި ބޭނުންވާ ފިޒިކަލް ފިޓްނަސް ހޯދުމަށް ވަރަށް ބޮޑަށް ބަލައިގެން ތައްޔާރު ކޮށްފައިވާ އުސޫލު ތަކެއް ކަމަށް ވެސް އެ ބަޔާނުގައި ބުނެފައިވެ އެވެ. 

ވޯލްޑް ކަޕާ ކުރިމަތިލާއިރު، ބްރެޒިލްގެ ޤައުމީ ޓީމުގައި އެންމެ ފާހަގަ ކޮށްލެވޭ ނޭމާ އަށް އަނިޔާ ވުމުގެ ސަބަބުން ކުޅުމާ ދުރުގައި ހުންނަން ޖެހުމަކީ ބްރެޒިލްގެ ޤައުމީ ޓީމަށް ކުރިމަތިވެފައިވާ ނުތަނަވަސް ކަމެކެވެ. ނަމަވެސް، އެންމެ ފަހުގެ މެޑިކަލް ރިޕޯޓުތަކާ އެކު، ނޭމާ އަވަސް މުއްދަތެއްގެ ތެރޭގައި އަލުން ކުޅުމުގެ ތެރެއަށް އަތުވެދާނެ ކަމުގެ އުންމީދު ވަނީ ބޮޑުވެފައި އެވެ. 

ބްރެޒިލްގެ މެޑިކަލް ޓީމުން އަންނަނީ ނޭމާގެ ޙާލަތު ވަރަށް ގާތުން ބަލަމުން ކަމަށެވެ. އަދި އޭނާގެ ފަރުވާގެ ކަންކަން ކުރިއަށްދާ ގޮތުގެ ތަފްސީލުތައް ޤަވާއިދުން އާންމު ކުރަމުން ދާނެ ކަމަށް ވެސް، ބްރެޒިލްގެ ފުޓުބޯޅަ ފެޑެރޭޝަން އިން ވަނީ ބުނެފައި އެވެ.