ހިތަދޫ އުތުރު ބައި-އިލެކްޝަންގެ ވޯޓުލުން ފަށައިފި
ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ބައި-އިލެކްޝަންގައި ވާދަކުރައްވަނީ އެމްޑީޕީގެ ކެންޑިޑޭޓް އަބްދުﷲ ސޯދިގާއި ޕީއެންސީގެ ކެންޑިޑޭޓް އަހުމަދު ސައީދު. މި އިންތިޚާބުގައި ވޯޓުލުމުގެ ހައްޤު 4،121 މީހުންނަށް ލިބިފައިވާއިރު، އައްޑޫ އާއި މާލޭގައި ޖުމްލަ ހަތް ވޯޓު ފޮއްޓެއް ވަނީ ބަހައްޓާފަ. މި ގޮނޑި ހުސްވީ ކުރިން އެ ދާއިރާގެ މެންބަރުކަމުގައި ހުންނެވި މުހައްމަދު ސިނާނުގެ މެންބަރުކަމުގެ ޝަރުތު ގެއްލިފައިވާ ކަމަށް ސުޕްރީމް ކޯޓުން ހުކުމް ކުރުމާ ގުޅިގެން.
ހިތަދޫ އުތުރު ދާއިރާގެ ބައި އިލެކްޝަންގެ ވޯޓުލުން ދަރުމަވަންތަ ސްކޫލްގަ ކުރިޔަށްދަނީ. | ޕީއެސްއެމް
ރައްޔިތުންގެ މަޖިލީހުގެ ހުސްވެފައިވާ ހިތަދޫ އުތުރު ދާއިރާގެ ގޮނޑިއަށް މެންބަރަކު އިންތިޚާބު ކުރުމަށް ބާއްވާ ބައި-އިލެކްޝަންގެ ވޯޓުލުން ފަށައިފި އެވެ.
އިލެކްޝަންސް ކޮމިޝަނުން މަޢުލޫމާތު ދޭ ގޮތުގައި، މި އިންތިޚާބުގެ ވޯޓުލުން ފަށާފައިވަނީ ހޮނިހިރު ދުވަހުގެ ހެނދުނު 8:00 ޖެހިއިރު އެވެ. ވޯޓުލުން މިއަދު ހަވީރު 4:00 އާ ހަމައަށް ކުރިއަށްދާނެ ކަމަށް އެ ކޮމިޝަނުން ބުނެ އެވެ.
މި އިންތިޚާބުގައި ވޯޓުލުމަށްޓަކައި ޖުމްލަ 7 ވޯޓު ފޮއްޓެއް ވަނީ ބަހައްޓާފަ އެވެ. އޭގެ ތެރޭގައި ހިމެނެނީ އައްޑޫ ސިޓީ ހިތަދޫގައި ބަހައްޓާފައިވާ 5 ފޮއްޓާއި، މާލޭގައި ދިރިއުޅޭ އެ ދާއިރާގެ ރައްޔިތުންނަށް ޚާއްޞަކޮށްގެން މާލޭގައި ބަހައްޓާފައިވާ 2 ފޮއްޓެވެ. ހިތަދޫގައި ވޯޓު ފޮށިތައް ބަހައްޓާފައިވަނީ ހިތަދޫ ސްކޫލްގަ އެވެ. މާލޭގައި ވޯޓުލުން ކުރިއަށްދަނީ ދަރުމަވަންތަ ސްކޫލްގަ އެވެ. އިލެކްޝަންސް ކޮމިޝަނުން ހާމަކޮށްފައިވާ ތަފާސްހިސާބުތަކަށް ބަލާއިރު، މި ބައި-އިލެކްޝަންގައި ވޯޓު ދިނުމުގެ ހައްޤު ޖުމްލަ 4،121 މީހުންނަށް ލިބިގެންވެ އެވެ.
ހިތަދޫ އުތުރު ދާއިރާގެ ގޮނޑިއަށް މިފަހަރު ވާދަކުރައްވަނީ އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ފަރާތުން އައްޑޫ ސިޓީގެ މޭޔަރުކަން ވިދިވިދިގެން ތިން ދައުރު ކުރައްވާފައިވާ އަބްދުﷲ ސޯދިގު (ސޯބެ) އާއި، ސަރުކާރު ހިންގާ ޕީޕަލްސް ނެޝަނަލް ކޮންގްރެސް (ޕީއެންސީ) ގެ ފަރާތުން އަހުމަދު ސައީދު (ސޮޑާ) އެވެ. އެމްޑީޕީގެ ޓިކެޓް ސޯބެއަށް ލިބިވަޑައިގަތީ ޕްރައިމަރީއަކާ ނުލައި ކަމަށްވާއިރު، ޕީއެންސީގެ ޓިކެޓް އަހުމަދު ސައީދަށް ލިބުނީ އެ ޕާޓީގެ ޕްރައިމަރީ ކާމިޔާބު ކުރެއްވި ކުރީގެ މެންބަރު މުހައްމަދު ސިނާނު ކުއްލި ގޮތަކަށް އިންތިޚާބުގައި ވާދަނުކުރަން ނިންމުމާ ގުޅިގެންނެވެ.
މި ދާއިރާގެ ގޮނޑި ހުސްވީ އެ ދާއިރާގެ މެންބަރުގެ ގޮތުގައި ކުރިން ހުންނެވި މުހައްމަދު ސިނާނުގެ ކިބައިން މެންބަރުކަމުގެ ޝަރުތު ގެއްލިފައިވާ ކަމަށް މިދިޔަ އޭޕްރީލް މަހުގެ 12 ވަނަ ދުވަހު ސުޕްރީމް ކޯޓުން ހުކުމް ކުރުމާ ގުޅިގެންނެވެ. ސިނާނުގެ ގޮނޑި ގެއްލުނީ މޯލްޑިވްސް އިސްލާމިކް ބޭންކުން ނަގާފައިވާ 5 މިލިއަން ރުފިޔާގެ ލޯނަކަށް ސާބިތު ދަރަންޏެއް އޮވެ، ހުކުމާ އެއްގޮތަށް ފައިސާ ދައްކަމުން ނުދާތީ އެވެ.
މި ބައި-އިލެކްޝަންގެ ވޯޓުލުން ކުރިޔަށްދާއިރު އިލެކްޝަންސް ކޮމިޝަނުން ވަނީ ވޯޓުލުމުގެ ހައްޤު ލިބިފައިވާ ހުރިހާ ރައްޔިތުންވެސް ވީހާވެސް އަވަހަކަށް ވޯޓުލާ ނިންމުމަށް އިލްތިމާސްކޮށްފަ އެވެ.
