ޣަފޫރު: މި ސަރުކާރަކީ ވަގުންގެ ބޮޑު ގޭންގެއް, ސަރުކާރެއްގެ ސިފަ އެއް ނެތް
5 ޖޫން 2026 | ހުކުރު 08:45މި ސަރުކާރަށް 170 ބިލިއަން ރުފިޔާ ލިބިފައިވާއިރު ރައްޔިތުންނަށް ފައިދާހުރި ކަމެއް ނުކުރެވޭ ކަމަށާއި، ވޭތުވެދިޔަ ތިން އަހަރުގެ ތެރޭގައި 43 ބިލިއަން ރުފިޔާގެ ބޮޑު ދަރަންޏެއް އުފައްދާފައިވާ ކަމަށް އެމްޑީޕީގެ ވަގުތީ ޗެއާޕާސަން އަބްދުލްޣަފޫރު މޫސާ ތުހުމަތުކުރެއްވި.
ރައްޔިތުންގެ މަޖިލީހުގެ މެމްބަރު އަބްދުލްޣަފޫރު މޫސާ އެމްޑީޕީގެ ޖަލްސާgawi ވާހަކަދައްކަވަނީ | އެމްޑީޕީ
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރަކީ ވަގުންގެ ބޮޑު ގޭންގެއްގެ ގޮތުގައި އެމްޑީޕީގެ ޗެއަރޕަރސަން އަދި ރައްޔިތުންގެ މަޖިލީހުގެ މެމްބަރު އަބްދުލްޣަފޫރު މޫސާ ސިފަކުރައްވައިފި އެވެ.
އެމްޑީޕީ އިން އައްޑޫގައި ބޭއްވި ޖަލްސާއެއްގައި ވާހަކަދައްކަވަމުން ޣަފޫރު ވަނީ ސަރުކާރަށް ވަރަށް ބޮޑަށް ފާޑު ވިދާޅުވެފަ އެވެ. އޭނާ ވިދާޅުވީ މިހާރު ރާއްޖޭގައި އޮތީ ސަރުކާރެއް ނޫން ކަމަށާއި އެއީ ވަގުންގެ ބޮޑު ގޭންގެއް ކަމަށެވެ. މުޅި ދައުލަތުގެ ރައްޔިތުންގެ ފައިސާ އެ މީހުން ވަގަށް ނޮޅައި ކައި ހުސްކުރަމުންދާ ކަމަށެވެ. އަދި އެ މީހުން މަރުވާނެކަން ވެސް ހިތަށް ނާރާ ކަމަށް ޣަފޫރު ވަނީ ވިދާޅުވެފަ އެވެ.
ޣަފޫރު ވިދާޅުވީ މީގެކުރިން ރާއްޖޭގެ އެއްވެސް ސަރުކާރަކަށް ފައިސާ ނުދޭ މިންވަރަށް މި ސަރުކާރަށް ވޭތުވެ ދިޔަ ތިންއަހަރުގެ ތެރޭގައި ބަޖުޓުން ފައިސާ ދެވިފައިވާ ކަމަށެވެ. އެގޮތުން މި ސަރުކާރަށް 170 ބިލިއަން ރުފިޔާ ދީފައި ވީ ނަމަވެސް މިހާތަނަށް އައި އިރު ރައްޔިތުންނަށް ފައިދާހުރި އެއްވެސް ކަމެއް ކުރެވިފައި ނުވާ ކަމަށް އޭނާ ތުހުމަތުކުރެއްވި އެވެ. މީގެ އިތުރުން ރާއްޖޭގެ ތާރީހުގައި ވެސް އެއްވެސް ސަރުކާރަކުން ނުއުފައްދާ މިންވަރަށް މި ސަރުކާރުން ދަރަނި އުފައްދާފައިވާ ކަމަށް އޭނާ ވަނީ ވިދާޅުވެފަ އެވެ. އެކަމުގެ ތަފްސީލްތަކަށް ބައްލަވާލައްވަމުން ޣަފޫރު ވިދާޅުވީ ވޭތުވެދިޔަ ތިން އަހަރުގެ ތެރޭގައި އެކަނިވެސް 43 ބިލިއަން ރުފިޔާގެ ދަރަނި މި ސަރުކާރުން އުފައްދާފައިވާ ކަމަށެވެ. އެކަމުން ގައުމަށް ލިބުނު އެއްވެސް ކުރިއެރުމެއް ނެތް ކަމަށް ޣަފޫރު ވިދާޅުވި އެވެ.
ސަރުކާރުގެ ތެރޭގައި ހިނގަމުންދާ ކޮރަޕްޝަނުގެ މައްސަލަތަކަށް އަލިއަޅުއްވާލައްވަމުން ޣަފޫރު ވިދާޅުވީ، ސިނގިރޭޓުގެ ޑިއުޓީ ބޮޑުކޮށްގެން ވައްކަން ކުރުމުގެ ސަބަބުން ކަސްޓަމްސްއަށް ދެ ބިލިއަނެއްހާ ރުފިޔާގެ ގެއްލުން ވެފައިވާ ކަމަށް ޣަފޫރު ވަނީ ވިދާޅުވެފަ އެވެ. ޣަފޫރު ވަނީ ކަސްޓަމްސް އާއި އެމްޕީއެލްގެ ބެލުމުގެ ދަށުގައި ހުރި 40 ފޫޓުގެ ދެ ކޮންޓޭނަރުގެ ސިނގިރޭޓަށް ވީގޮތެއް ނޭނގި ގެއްލިފައިވާތީ އެކަމަށް ވެސް ފާޑު ވިދާޅުވެފަ އެވެ.
އިތުރަށް ވާހަކަދައްކަވަމުން އޭނާ ވިދާޅުވީ ސަރުކާރަށް ނޭނގި ދެ ތެޔޮ ބޯޓު ރާއްޖޭގެ ސަރަހައްދުގައި ހަތް ދުވަސް ވަންދެން އޮތް ކަމަށް ޣަފޫރު ވިދާޅުވި އެވެ. އެ ބޯޓުތައް ފަހުން ބެލިއިރު އޭގައި އެއްވެސް އެއްޗެއް ނެތް ކަމަށް ޣަފޫރު ވިދާޅުވި އެވެ.
