އެމްޑީޕީގެ ޗެއަރޕަރސަން ކަމަށް ވާދަކުރައްވާ އިބްރާހިމް މުހައްމަދު (ވާޑު)ގެ ތާއީދު މީކާއިލް އަށް
ޕާޓީގެ އިސް ސަފުން ޒުވާނުންނަށް ޖާގަ ލިބެންޖެހޭ ކަމަށް ވިދާޅުވެ، ކުރީގެ ރައީސް މުހައްމަދު ނަޝީދު އެ މަޤާމަށް ކުރިމަތިލެއްވުމަކީ ޕާޓީއަށް އެންމެ ރަނގަޅު ގޮތް ނޫން ކަމަށް ވާޑު ފާހަގަކުރެއްވި.
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ޗެއަރޕާސަންގެ އިންތިހާބުގައި ވާދަކުރައްވާ އިބްރާހިމް މުހައްމަދު (ވާޑު)، އެ މަޤާމަށް ވާދަކުރައްވާ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމް އަށް ތާއީދުކުރުން | ސޯޝަލް މީޑިއާ
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ޗެއަރޕާސަންގެ އިންތިހާބުގައި ވާދަކުރައްވާ އިބްރާހިމް މުހައްމަދު (ވާޑު)، އެ މަޤާމަށް ވާދަކުރައްވާ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމް އަށް ތާއީދުކުރަން ނިންމަވައިފި އެވެ.
އޭނާ މީކާއިލް އަށް ތާއީދުކުރައްވަން ނިންމަވާފައި ވަނީ ޒުވާނުންނަށް ލީޑަރޝިޕް އަށް ފުރުސަތު ދިނުމުގެ ގޮތުން ކަމަށް އޭނާ ވިދާޅވުި އެވެ. އަދި އެނިންމެވުން ނިންމެވީ ޒުވާނުން ޕާޓީގެ ކުރީސަފުގައި މަސައްކަތް ކުރުމަށް ފުރުސަތު ލިބޭނީ މީކާއިލްގެ ޗެއަރޕަރސަންކަމެއްގައި ކަަމށް ޤަބޫލުކުރައްވާތީ ކަމަށް އޭނާ ވިދާޅުވި އެވެ. މީގެ އިތުރުން މީކާއިލް ޗެއަރޕަރސަން ކަމަށް ހޮވުމަށް ކުރެވުނު ހުރިހާ މަސައްކަތެއް ކުރައްވާނެ ކަމަށް އޭނާ ވަނީ ވިދާޅުވެފަ އެވެ.
އޭނާ ވަނީ ޗެއަރޕަރސަންގެ މަޤާމަށް ކުރީގެ ރައީސް މުހައްމަދު ނަޝީދު ވާދަކުރެއްވުމަކީ ޕާޓީ އަށް ރަނގަޅު ގޮތް ނޫން ކަމަށް ވެސް ވިދާޅުވެފަ އެވެ. އުމުރުން 18 އަހަރުން ފެށިގެން ކުރީގެ ރައީސް މުހައްމަދު ނަޝީދު އާއި އެމްޑީޕީ އަށްޓަކާ މަސައްކަތް ކޮށްފައިވާ ކަމަށާއި، މިއަދު އޭނާގެ އުމުރުން 40 އަހަރު ވާން ކައިރިވެފައިވާ ކަމަށް އޭނާ ވިދާޅުވި އެވެ. އަދިވެސް ރައީސް ނަޝީދުގެ ފަހަތުން މަސައްކަތް ކޮށް ރައީސް ނަޝީދު ޗެއަރޕަރސަން އަކަށް ހޮވަން މަސައްކަތް ކުރަންވީތޯ އޭނާ ވަނީ ސުވާލުކުރައްވާފަ އެވެ.
"ވަރަށް ދެރަވެސް ވޭ ރައީސް ނަޝީދާއި ދެކޮޅަށް އެއްޗެކޭ ބުނަން. އުމުރުން 18 އަހަރުން ފެށިގެން އަޅުގަނޑު މި އުޅެނީ ޕާޓާއި އާއި ރައީސް ނަޝީދަށްޓަކާ. އަދިވެސް ވީ ރައީސް ނަޝީދު ޗެއަރޕަރސަން ކަމަށް ގެންނަން މަސައްކަތް ކުރަންތޯ އޭ؟" އޭނާ ވިދާޅުވި އެވެ.
އުމުރުގެ ބޮޑުބައި ޕާޓީ އާއި ރައީސް ނަޝީދު އަށްޓަކާ ހޭދަ ކުރެއްވި އިރު އަދިވެސް ފެންނަނީ ޒުވާނުންނަށް ޕާޓީގެ މަޤާމުތަކަށް ކުރިމަތިލުމުގެ ފުރުސަތު ނެތް މަންޒަރު ކަމަށް އޭނާ ވިދާޅުވި އެވެ. ރައީސް ނަޝީދު ޕާޓީގެ ޗެއަރޕަރސަންގެ މަޤާމަށް ގެންނަން އުޅެނީ ޒުވާނުންނަށް ފުރުސަތު ދިނުމުގެ ވިސްނުމެއް އަދިވެސް އެ ފަދަ ބޭބޭފުޅުންގެ ނެތުމުން ކަމަށް އޭނާ ވިދާޅުވި އެވެ.
"އަޅުގަނޑު ހީކުރީ ރައީސް ނަޝީދު ފަހަތަށް ޖެހިވަޑައިގެން އަޅުގަނޑާ މީކާއިލް އަށް މިފަހަރު ފުރުސަތު ދޭނެ އޭ. އެކަމަކު އެ ފުރުސަތެއް ނުދެއްވި." އޭނާ ވިދާޅުވި އެވެ.
އޭނާ ވަނީ ކުރިއަށް އޮތްތަނުގައި މަސައްކަތް ކުރާނީ މީކާއިލް އާއި އެކުގައި ކަމަށް ފާހަގަކުރައްވާފަ އެވެ. ޗެއަރޕާސަން އިންތިހާބުގައި ވާދަކުރައްވާ އިބްރާހިމް މުހައްމަދު (ވާޑު) މީކާއިލް އަށް ތާއީދުކުރުމަށް ނިންމެވުމަކީ ލިބުނު އިތުރު ހިތްވަރެއް ކަމަށް މީކާއިލް ވަނީ ވިދާޅުވެފަ އެވެ.
