އެމްޑީޕީގެ މެމްބަރުން ކުރިއަށް ދާން ބޭނުމީ ޕާޓީ އާއި އެކު ދެގޮތެއް ނުވެ ތިބި ފަރާތްތަކާއި އެކު: މީކާއިލް
4 ޖޫން 2026 | ބުރާސްފަތި 14:12ޕާޓީގެ ހަރަކާތްތައް ކުރިއަށް ގެންދިއުމުގައި މެމްބަރުން އެދެނީ އާ ޒުވާން ޖީލަކަށް ކަމަށް މީކާއިލް ވިދާޅުވި.
"އިތުބާރު" ކެމްޕެއިން ހަރަކާތުގެ ތެރެއިން | ސޯޝަލް މީޑިއާ
މޯލްޑިވިއަން ޑިމޮކްރެޓިކް ޕާޓީ (އެމްޑީޕީގެ) އާއްމު މެމްބަރުން ކުރިއަށް ދާން ބޭނުން ވަނީ ޕާޓީ އާއި އެކު ދެގޮތެއް ނުވެ ތިބި ފަރާތްތަކާއި އެކުގައި ކަމަށް އެމްޑީޕީގެ ޗެއަރޕާސަން ކަމަށް ވާދަކުރައްވާ މީކާއީލް ނަސީމް ވިދާޅުވެއްޖެ އެވެ.
މީކާއިލް އެފަދައިން ވިދާޅުވީ އިތުބާރު ކެމްޕެއިން ޓީމުން އަތޮޅު ތެރެއަށް މިހާރު ކުރަމުންދާ ދަތުރުތަކުގެ ތެރެއިން މިހާރު ހައްދުން މައްޗަށް ކުރައްވަމުންދާ ދަތުރުގެ ތެރެއިން ދެއްވި ޚާއްސަ މެސެޖެއްގަ އެވެ. ބުދަ ދުވަހު ހުވަދޫގައި ކުރިއަށް ގެންދިޔަ ކެމްޕެއިން ހަރަކާތްތަކަށް ފަހު މިހާރު ހައްދުންމަތީގައި ތިބި އިރު، އިތުބާރު ކެމްޕެއިން ޓީމުންދާ ކޮންމެ ރަށަކުން ވެސް އެމްޑީޕީ އާއި އެކު ދެމި ތިބި ފަރާތްތަކާއި އެކު ޕާޓީގެ މެމްބަރުން ދެމި ތިބި ކަމުގެ މެސެޖު ދެމުންދާ ކަމަށް މީކާއިލް ވަނީ ވިދާޅުވެފަ އެވެ.
އެމްޑީޕީގެ އާއްމު މެމްބަރުން ޕާޓީގެ ކުރިމަގު ބައްޓަން ކުރަން ބޭނުމީ އާ ޒުވާން ޖީލަކާއި އެކުގައި ކަމަށް މީކާއިލް ވިދާޅުވި އެވެ. އަދި ޕާޓީގެ މަތި ފަޑި އަށް އާ ޒުވާން މޫނުތަކެއް ގެންނަން އާއްމު މެމްބަރުން ބޭނުންވާ ކަމަށް ވެސް މީކާއިލް ވަނީ ވިދާޅުވެފަ އެވެ. ޕާޓީގެ މުސްތަގްބަލަށްޓަކާ 12 ޖޫންގައި ބާއްވާ އެމްޑީޕީގެ ޗެއަރޕަރސަންކަމުގެ އިންތިޚާބުގައި އާއްމުން ވޯޓު ލާން ތިބީ "އިތުބާރު" އަށް ކަމަށް ވެސް މީކާއިލް ވިދާޅުވި އެވެ.
