ހިތަދޫ އުތުރު ދާއިރާގެ ބައި-އިލެކްޝަގެ ވޯޓާސް ލިސްޓުގައި ކެނޑިޑޭޓުންގެ ފަރާތުން ސޮއިކޮށްފި
ޖޫން މަހުގެ 6 ވަނަ ދުވަހު ބާއްވާ މި އިންތިޚާބުގައި ވާދަކުރައްވަނީ ޕީއެންސީގެ ކެންޑިޑޭޓް އަހުމަދު ސައީދާއި އެމްޑީޕީގެ ކެންޑިޑޭޓް އަބްދުﷲ ސާދިގް
ހިތަދޫ އުތުރު ދާއިރާގެ ބައި-އިލެކްޝަން: ވޯޓާސް ލިސްޓުގައި ސޮއި ކުރުން | އިލެކްޝަންސް ކޮމިޝަން
2026 ޖޫން 6 ވާ ހޮނިހިރު ދުވަހު ބޭއްވުމަށް ހަމަޖެހިފައިވާ، ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ބައި-އިލެކްޝަން 2026 ގައި ވޯޓު ދިނުމުގެ ޙައްޤު ލިބިފައިވާ މީހުންގެ ފައިނަލް ރަޖިސްޓަރީގައި ކެންޑިޑޭޓުން ނުވަތަ ކެންޑިޑޭޓުން ކަނޑައަޅާ ފަރާތްތަކުން ސޮއިކޮށްފި އެވެ.
ކެންޑިޑޭޓުން ކަނޑައަޅާ ފަރާތްތަކުން ސޮއިކުރުމުގެ ފުރުޞަތު 2026 ޖޫން 02 ވީ އަންގާރަ ދުވަހުގެ ހެނދުނު 10:00 އިން މެންދުރުފަހު 1:30 ގެ ނިޔަލަށް ހުޅުވާލާފައިވެ އެވެ. ކެންޑިޑޭޓުން ސޮއިކުރުން ކުރިއަށް ގެންދިޔައީ އިލެކްޝަންސް ކޮމިޝަނުގެ އިންތިޚާބާބެހޭ މަރުކަޒު ގައެވެ.
އިލެކްޝަންސް ކޮމިޝަނުން ހާމަކުރި ގޮތުގައި އަންނަ މަހުގެ ހަ ވަނަ ދުވަހު އޮންނަ ބައި-އިލެކްޝަންގައި ވާދަކުރައްވަނީ ދެ ބޭފުޅުންނެވެ. އެއީ ހިތަދޫ މޫލެކެޑެ ދާއިރާގެ ކައުންސިލަރުގެ މަގާމުގައި ހުންނެވި އަހުމަދު ސައީދު (ސޮޑާ) އާއި އައްޑޫގެ ކުރީގެ މޭޔަރު އަބްދުﷲ ސާދިގު (ސޯބެ) އެވެ.
މި ދެ ކެންޑިޑޭޓުންގެ ތެރެއިން ސޮޑާއަކީ ޕީއެންސީގެ ކެންޑިޑޭޓެވެ. އަދި ސޯބެއަކީ އެމްޑީޕީގެ ކެންޑިޑޭޓެވެ. އިލެކްޝަންސް ކޮމިޝަނުން ބުނީ އެ ދާއިރާގައި ވޯޓުދިނުމުގެ ހައްގު ލިބިގެންދާ މީހުންގެ ރަޖިސްޓްރީގައި ކެންޑިޑޭޓުން ވެސް އަންގާރަ ދުވަހު ސޮއިކޮށްފައިވާކަމަށެވެ.
އެ ބައި-އިލެކްޝަންގައި ވޯޓު ދިނުމުގެ ހައްގު ލިބިފައިވާ މީހުންގެ ފައިނަލް ލިސްޓުގައިވާ ގޮތުން އެ ދާއިރާގެ 4،121 މީހަކަށް ވޯޓުލުމުގެ ހައްގު ވަނީ ލިބިފަ އެވެ. އީސީން އާއްމުކޮށްފައިވާ މައުލޫމާތަކުން އެނގޭ ގޮތުން މި ދާއިރާގެ ބައި-އިލެކްޝަންގައި ވޯޓުލުމަށް ހިތަދޫގައި ފަސް ފޮށި އަދި މާލޭގައި ދެ ފޮށި ބެހެއްޓުމަށް ވަނީ ހަމަޖެހިފައެވެ.
ހިތަދޫ އުތުރު ދާއިރާގެ ގޮނޑި ގެއްލިފައިވަނީ އެ ދާއިރާގެ ޕީއެންސީ މެންބަރު މުހައްމަދު ސިނާންގެ ގޮނޑި ގެއްލިފައިވާކަމަށް ކަނޑައަޅާ ސުޕްރީމް ކޯޓުން އިއްވި ހުކުމާ ގުޅިގެންނެވެ. ސިނާންގެ ގޮނޑި ގެއްލިފައި ވަނީ އިތުރު މީހަކާ އެކުވެގެން އިސްލާމިކް ބޭންކުން ނެގި ލޯނަކަށް 2.5 މިލިއަން ރުފިޔާ ދައްކަން އޮކްޓޯބަރު 2024 ގައި ކުރި ހުކުމަކާ އެއްގޮތަށް އޭނާ ފައިސާ ދައްކާފައި ނުވާ މައްސަލައިގައެވެ.
އެމްޑީޕީގެ ޓިކެޓުގައި ހިތަދޫ އުތުރު ދާއިރާގެ ގޮނޑިއަށް ވާދަކުރުމުގެ ފުރުސަތު ހުޅުވާލުމުން ކުރިމަތިލައްވާފައި ވަނީ ސޯބެ އެކަންޏެވެ. ހިތަދޫ އުތުރު ދާއިރާގެ ގޮނޑިއަށް ޕީއެންސީގެ ޓިކެޓުގައި ވާދަކުރުމުގެ ފުރުސަތު ހުޅުވާލުމުން ޕްރައިމަރީގައި ވާދަކޮށްފައި ވަނީ ސިނާން އަދި ސޮޑާއެވެ. ސިނާން އެ ޕްރައިމަރީ ކާމިޔާބު ކުރެއްވި ނަމަވެސް ޓިކެޓު ދޫކޮށްލުމުން ޕީއެންސީން ޓިކެޓު ދިނީ ސޮޑާއަށެވެ.
