ނަތަންޔާހޫއާ ނުރުހުންވެ، ޓްރަމްޕް އޭނާ އަށް ފާޑު ވިދާޅުވެއްޖެ

އިޒްރޭލް އިން ލުބުނާން އަށް ދެމުންދާ ހަމަލާތައް ވަރުގަދަކޮށް، މަސްރަހު އިތުރަށް ގޯސް ކުރަމުން ދާތީ އެމެރިކާގެ ރައީސް ޑޮނަލްޑް ޓްރަމްޕް، އިޒްރޭލްގެ ބޮޑު ވަޒީރު ބެންޖަމިން ނަތަންޔާހޫއާ މެދު ވަރަށް ބޮޑަށް ކޯފާވެ، ހަރުކަށި އިބާރާތުން ފާޑު ވިދާޅުވެއްޖެ އެވެ.

އެކްސިއޯސް ނިއުސް އިން ރިޕޯޓު ކޮށްފައިވާ ގޮތުގައި، ހޯމަ ދުވަހު މި ދެ ބޭފުޅުން ފޯނުން ގުޅުއްވައި ކުރެއްވި މަޝްވަރާ ތަކުގައި ޓްރަމްޕް ވަނީ ނަތަންޔާހޫއާ ދިމާލަށް ހަޑި ހުތުރު ބަހުން މުޚާތަބު ކުރައްވައި، ލުބުނާންގެ ވެރިރަށް ބެއިރޫތު އަށް ހަމަލާ ނުދިނުމަށް އަންގަވާފައި އެވެ.

އެމެރިކާ ސަރުކާރުގެ އިސް އޮފިޝަލުންނާ ހަވާލާދީ އެކްސިއޯސް އިން ބުނެފައި ވަނީ، ނަތަންޔާހޫ އަކީ "މޮޔައެއް" ކަމަށް ވިދާޅުވެ ޓްރަމްޕް ވަނީ އޭނާ އަށް ވަރަށް ބޮޑަށް ފާޑު ވިދާޅުވެފައި އެވެ. އަދި ނަތަންޔާހޫގެ މައްޗަށް ހިނގަމުންދާ ކޮރަޕްޝަންގެ މައްސަލަ ތަކަށް އިޝާރާތް ކުރައްވައި، ނަތަންޔާހޫ ޖަލަށް ނުގޮސް ސަލާމަތްވެ ހުރީ ޓްރަމްޕްގެ އެހީތެރިކަމާ ހެދި ކަމަށް ވެސް ޓްރަމްޕް ވިދާޅުވި ކަމަށް ރިޕޯޓުތައް ބުނެ އެވެ. ޓްރަމްޕް ވިދާޅުވީ އިޒްރޭލްގެ އަމަލު ތަކުގެ ސަބަބުން މިހާރު މުޅި ދުނިޔެ ވެސް އިޒްރޭލް އާއި ނަތަންޔާހޫ ދެކެ ފޫހި ވެފައިވާ ކަމަށެވެ.

މި ފޯނު ކޯލުގައި ޓްރަމްޕް ވަނީ ބެއިރޫތު އަށް ހަމަލާ ދީފި ނަމަ، ބައިނަލްއަގުވާމީ މައިދާނުގައި އިޒްރޭލް އިތުރަށް އެކަހެރި ވާނެ ކަމުގެ އިންޒާރު ދެއްވާފައި އެވެ. ހިޒްބުالله އިން އިޒްރޭލް އަށް ހަމަލާދޭކަން ޓްރަމްޕް ގަބޫލު ކުރެއްވި ނަމަވެސް، އަދި އިޒްރޭލް އަށް އަމިއްލަ ނަފްސު ދިފާއު ކުރުގެ ހައްގު އޮތް ކަމަށް ވިދާޅުވި ނަމަވެސް، ފަހަކަށް އައިސް އިޒްރޭލް އިން ދެމުންދާ ހަމަލާ ތަކަކީ އެއްވެސް އުސޫލެއް ނެތް، އިންސާފުން ބޭރު ހަމަލާ ތަކެއް ކަމަށް ޓްރަމްޕް ގަބޫލު ކުރައް ވައެވެ. ޚާއްސަކޮށް ހިޒްބުاللهގެ ކޮމާންޑަރުންނަށް އަމާޒުކޮށް ހަމަލާ ދޭއިރު، މުޅި އިމާރާތްތައް ގޮއްވާލައި އާންމުން މަރަމުންދާ ދިއުމަށް ޓްރަމްޕް ވަނީ ވަރަށް ބޮޑަށް ދެކޮޅު ހައްދަވާފައި އެވެ.

ޓްރަމްޕްގެ ކޯފާ މިހާ ބޮޑަށް ނަތަންޔާހޫ އަށް އަމާޒުވީ، އެމެރިކާ އާއި އީރާންއާ ދެމެދު ކުރިއަށްދާ މަޝްވަރާ ތަކަށް އިޒްރޭލްގެ އަމަލު ތަކުގެ ސަބަބުން ހުރަސް އެޅެމުންދާތީ އެވެ. ލުބުނާންގައި އިޒްރޭލް އިން ހިންގާ އަސްކަރީ ހަރަކާތްތަކާ ގުޅިގެން، އެމެރިކާ އާއެކު ކުރިއަށްދާ ވާހަކަތައް ހުއްޓާލާނެ ކަމުގެ އިންޒާރު އީރާން އިން ވަނީ ދީފަ އެވެ. އެމެރިކާ އާއި އީރާންއާ ދެމެދު މިހާރު މަޝްވަރާ ކުރެވެމުންދާ އެއްބަސްވުމުގައި ލުބުނާންގެ ހަނގުރާމަ ހުއްޓާލުމާ ގުޅޭ މާއްދާ ތަކެއް ހިމެނޭ އިރު، މިއީ ޓްރަމްޕާއި ނަތަންޔާހޫއާ ދެމެދު އަބަދު ވެސް ޚިޔާލު ތަފާތުވުން އުފެދޭ ކަމެކެވެ.

މި ފޯނު ކޯލަށް ފަހު، ބެއިރޫތުގައި ހުރި ހިޒްބުاللهގެ އަމާޒު ތަކަށް ހަމަލާ ދިނުމަށް ރާވާފައި އޮތް ރޭވުންތައް އިޒްރޭލް އިން މިހާރު މަޑު ޖައްސާލާފައިވާ ކަމަށް އިޒްރޭލްގެ އޮފިޝަލަކު އެކްސިއޯސް އަށް ވަނީ ކަށަވަރު ކޮށްދީފަ އެވެ. އިޒްރޭލް އާއި ލުބުނާންގެ ބޯޑަރު ސަރަހައްދުގައި ހަމަލާތައް ވަރުގަދަވެ، އިޒްރޭލް އިން ދެކުނު ލުބުނާން އަށް އެއްގަމު މަގުން އަރައި ގަނެފައިވާ މި ދަނޑިވަޅުގައި، މުޅި ސަރަހައްދަށް ހަނގުރާމަ ފެތުރި ދާނެ ކަމުގެ ބިރު ބޮޑުވެ، ބައިނަލްއަގުވާމީ މުޖުތަމައުން ދަނީ ހަނގުރާމަ ހުއްޓާލުމަށް ތަކުރާރުކޮށް ގޮވާލަމުންނެވެ.