އަނެއްކާވެސް ރައީސް މުއިއްޒުގެ ވަރުގަދަ ހަމަލާއެއް ނޫސްވެރިންނަށް

2023 ވަނަ އަހަރު ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގަތުމަށްފަހު، މި ސަރުކާރުން ނޫސްވެރިންނާ މެދު ގެންގުޅޭ ހަރުކަށި ސިޔާސަތުތަކާއި ނޫސްވެރިކަމުގެ މިނިވަންކަމަށް އަރައިގަތުމުގެ މައްސަލަ ވަނީ އިންތިހާއަށް ބޮޑުވެފަ އެވެ. ވެރިކަމުގެ ފުރަތަމަ ދުވަހުން ފެށިގެން މިނިވަން ނޫސްވެރިކަން ފުނޑާލުމަށް ދުރާލާ ރާވައިގެން ގިނަ މަސައްކަތްތަކެއް ކުރަމުންދާއިރު، ސަރުކާރުން ބޭނުންވާ ގޮތަށް ހަބަރު ފަތުރާ ފަރާތްތަކަށް ނޫނީ ނޫސްވެރިކަމުގެ މައިދާނުގައި ފުރުސަތު ނެތް ކަމުގެ ބިރުވެރިކަން މިއަދު ވަނީ އުފެދިފަ އެވެ. ސަރުކާރުގެ އުސޫލުތަކާ ހިލާފަށް މަސައްކަތްކުރާ ނޫސްވެރިންނަށް ކުރިމަތިލާން ޖެހެނީ ދައުލަތުގެ އެންމެ މަތީ ވެރިޔާގެ ނުރުހުމާއި ރުޅިވެރިކަމާ އެވެ.

ދިވެހި ނޫސްވެރިން މިއަދު މަސައްކަތް ކުރަމުން ދަނީ މީގެ ކުރިން ދުވަހަކުވެސް ނުފެންނަ ފަދަ ބޮޑެތި ފިއްތުންތަކެއްގެ ތެރޭގަ އެވެ. އެކި ޒަމާންތަކުގައި ނޫސްވެރިންނަށް ގޮންޖެހުންތައް ކުރިމަތިވި ނަމަވެސް، މިހާރު ފެންނަމުންދަނީ ނޫސްވެރިކަމުގެ މިނިވަންކަން މުޅިން އެހެން ދަރަޖައަކަށް ހަނިކުރަމުންދާ މަންޒަރެވެ. ނޫސްވެރިންގެ މައްޗަށް ޖިނާއީ ދައުވާ އުފުލުމާއި، ހައްޔަރުކުރުމާއި، ޖަލު ހުކުމް އިއްވުމުގެ އިތުރުން، މީޑިއާ ސްޓޭޝަންތައް ރެއިޑްކުރުމަކީ މިއަދު އާންމު ކަމަކަށް ވެއްޖެ އެވެ. ވަކި މައުޟޫއުތަކަށް ރިޕޯޓްކުރުން ހަނިކޮށް، ނޫސްވެރިކަމުގެ މަސައްކަތް ކުރުމުން ގާނޫނީ އަދަބު ލިބިދާނެ ކަމުގެ ބިރުވެރިކަން މުޅި މީޑިއާ ދާއިރާގައި ވަނީ ފެތުރިފަ އެވެ.

މީޑިއާގެ އަޑު ކަނޑުވާލުމަކީ ހަމައެކަނި ރިޕޯޓަރުންނަށް ދެވޭ އަދަބެއް ނޫން ކަމަށާއި، އެއީ މުޅި ރައްޔިތުންނަށް ލިބޭ ބޮޑު އުނިކަމެއްގެ ގޮތުގައި ގިނަ ބަޔަކު ސިފަކުރެ އެވެ. ކޮރަޕްޝަންގެ މައްސަލަތައް ތަހުގީގުކުރުމާއި، ވެރިކަމުގައި ތިބޭ ފަރާތްތަކާ ސުވާލުކުރުމަށް ހުރަސްއެޅުމުގެ ސަބަބުން، ރައްޔިތުންނަށް ކަންކަން ސާފުވާން އޮތް ދޮރުތައް ދަނީ ބަންދުވަމުންނެވެ. ރައީސް މުއިއްޒު ވެރިކަމާ ހަވާލުވިފަހުން ގައުމުގެ މުޅި ނިޒާމު ހަލާކުކޮށްލާފައިވާ ކަމަށް އިދިކޮޅު ފަރާތްތަކުން ބުނަމުންދާއިރު، ސަރުކާރުން އެންމެ ބޮޑު އިސްކަމެއް ދެނީ ހަގީގަތް ހާމަކުރާ މީޑިއާތަކާ ޒާތީ ގޮތުން ޖައްސާލައި، އެ ފަރާތްތަކުގެ އަޑު ކަނޑުވާލުމަށެވެ.

މީގެ އިތުރުން، ރައްޔިތުންނަށް ހަގީގަތް އޮޅުވާލުމަށްޓަކައި ސަރުކާރުން ގެންދަނީ ރައްޔިތުންގެ ޓެކްސް ފައިސާ އިން ކޮންމެ މަހަކު އެތައް މިލިއަން ރުފިޔާއެއް ވަކި މީޑިއާތަކަށް ހަރަދުކުރަމުންނެވެ. ސަރުކާރު ޕްރޮމޯޓް ކުރުމަށް ބާރާއި ނުފޫޒު ބޭނުންކޮށްގެން ގިނަ މަސައްކަތްތަކެއް ކުރި ނަމަވެސް، ރައްޔިތުންގެ މެދުގައި ސަރުކާރުގެ މަގުބޫލުކަން ދަނީ ދުވަހެއް ދުވަހަކަށް ކުޑަވަމުންނެވެ. ދައުރުގެ މެދުތެރެއިން ނެގުނު ފެންނަ ނުފެންނަ ވޯޓުން ރައީސް މުއިއްޒުގެ ސަރުކާރަށް ލިބުނު ލަދުވެތި ނާކާމިޔާބީއަކީ މިކަމުގެ ހެއްކެއް ކަމަށް ސިޔާސީ މަސްރަހު ދިރާސާކުރާ ފަރާތްތަކުން ބުނެ އެވެ.

މިނިވަން ނޫސްވެރިކަން ދިވެހިރާއްޖެ އިން ނައްތާލުމަށްޓަކާ، ރައީސް މުއިއްޒުގެ ފުރިހަމަ ބާރު އޮންނަ ރައްޔިތުންގެ މަޖިލީހުން ވަނީ ގާނުނުތަކަށް ބަދަތަކެއް  ގެނެސްފަ އެވެ. ކޯޓުތަކުން ވަނީ ނޫސްވެރިންގެ އަނގަބަންދުކުރަން އަމުރުނެރެފަ އެވެ. ލިޔުނު ހަބަރަކުން، ކޮށްލި ސުވާލަކުން، ރައީސް މުއިއްޒު ވަނީ ނޫސްވެރިން ހުރަގެ އަށް ފޮނުވާފަ އެވެ. މިވަރުން އަދި ނިމުނީކީ ނޫނެވެ.

އެންމެ ފަހުން ރައީސް މުއިއްޒު ވަނީ ނޫސްވެރިންނަށް ވަރަށް ހުތުރު ބަހުން ހަމަލާދެއްވާފަ އެވެ. ރައީސް މުއިއްޒުގެ ކުރިފުޅުމަތީގަ ރާއްޖޭގެ ނޫސްވެރިންނަކީ އެންމެ ދައްފަންތީގެ ނޫސްވެރިކަން ކުރާ ބައެކެވެ. ރައީސް އޮފީހަށް ނޫސްވެރިން އެއްކޮށް ރައީސް މުއިއްޒު މިވަނީ ދިވެހި ނޫސްވެރިން "ގަން ހިންގުވާފަ" އެވެ. ރައީސް މުއިއްޒު ދިވެހި ނޫސްވެރިން ސިފަކުރެއްވީ އިންސާނުންގެ ނަޖިސް ދައުރުވާ ޖަންކްޝަންތަކުގެ ތެރެއިން އޮޕަރޭޓްވާ ބައެއްގެ ގޮތު ގައެވެ. މިއީ ދިވެހި ތާރީހުގައިވެސް ގައުމެއްގެ ވެރިއަކު ނޫސްވެރިންނަށް އަމާޒުކޮށް މިފަދަ ދަށު ދަރަޖައިގެ ބަސްމަގަކުން ވާހަކަދެއްކެވި ފުރަތަމަ ފަހަރެވެ.