އީރާންގެ ކްރިޕްޓޯ އެކްސްޗޭންޖު ތަކަށް އެމެރިކާ އިން ފިޔަވަޅު އަޅައިފި

އީރާންއާ ދެކޮޅަށް އެމެރިކާ އިން އަޅަމުންދާ ދަތި ކުރުމުގެ ފިޔަވަޅު ތަކުގެ ދަށުން، އެ ގައުމުގެ ކްރިޕްޓޯކަރަންސީ އެކްސްޗޭންޖު ތަކަކާއި، ބައެއް ފަރުދުންނަށް އަމާޒުކޮށް އައު ފިޔަވަޅު ތަކެއް އަންގާރަ ދުވަހު އަޅައިފި އެވެ.

އެމެރިކާގެ ޓްރެޒަރީ ޑިޕާޓްމަންޓް އިން އާންމު ކުރި ބަޔާނެއްގައިވާ ގޮތުން، މި ފިޔަވަޅުތައް އަމާޒު ކޮށްފައި ވަނީ އީރާންގެ ހަތަރު މީހަކަށާއި އެ ގައުމުގައި ހިންގާ ޑިޖިޓަލް އެސެޓް އެކްސްޗޭންޖު ތަކެއް ކަމަށްވާ ނޯބިޓެކްސް، ބިޓްޕިން، ރަމްޒިނެކްސް އަދި ވޮލެކްސް އަށެވެ.

ޓްރެޒަރީ ޑިޕާޓްމަންޓް އިން ބުނި ގޮތުގައި، މި ހަތަރު ކުންފުންޏާ އެކު މުއާމަލާތު ކުރާ ބޭރުގެ މާލީ އިދާރާ ތަކާއި ފަރުދުންނާ ދެކޮޅަށް ވެސް ފިޔަވަޅު އެޅުމުގެ ފުރުސަތު މިހާރު ވަނީ ހުޅުވިފައި އެވެ. މިއީ އީރާން އިން ބައިނަލްއަގުވާމީ މާލީ ނިޒާމުގެ ތެރެއިން ކުރާ މުއާމަލާތްތައް އިތުރަށް ހަނި ކުރުމަށް އެމެރިކާ އިން ކުރަމުންދާ މަސައްކަތުގެ ބައެކެވެ.

މިކަމާ ގުޅޭ ގޮތުން އެމެރިކާގެ ޓްރެޒަރީ ސެކްރެޓަރީ ސްކޮޓް ބެސެންޓް ވިދާޅުވީ، އީރާންގެ އިގްތިސާދު ވަރަށް ބޮޑަށް ހީނަރު ވަމުންދާ ދަނޑިވަޅެއްގައި، އެ ގައުމުގެ ސަރުކާރުން ޑިޖިޓަލް އެސެޓް ޓެކްނޮލޮޖީ ބޭނުން ކުރަމުން ދަނީ ކޮރަޕްޝަނުގެ އަމަލުތައް ހިންގުމަށެވެ. މީގެ ތެރޭގައި ދަތި ކުރުމުގެ ފިޔަވަޅު ތަކުން ރެކުމާއި، ގައުމުން ބޭރަށް ފައިސާ ފޮނުވުން ހިމެނޭ ކަމަށް އޭނާ ތުހުމަތު ކުރެއްވި އެވެ.

މީގެ އިތުރުން ބެސެންޓް ވިދާޅުވީ، އީރާންގެ އިގްތިސާދަށް މިހާރު ކުރިމަތި ވެފައިވާ ހަލަބޮލި ކަމަކީ އެމެރިކާގެ ރައީސް ޑޮނަލްޑް ޓްރަމްޕް ގެންގުޅުއްވާ "މެކްސިމަމް ޕްރެޝަރު" ނުވަތަ އެންމެ މަތީ ދަރަޖަ އަށް ފިއްތުންތައް ކުރިމަތި ކުރުމުގެ ސިޔާސަތު ކާމިޔާބު ވަމުންދާ ކަމުގެ ހެއްކެއް ކަމަށެވެ.

އެމެރިކާ އިން އީރާންގެ ކްރިޕްޓޯ މާކެޓަށް އަމާޒުކޮށް މި ފިޔަވަޅުތައް އެޅީ، އީރާން އިން އެ ގައުމުގެ ނިއުކްލިއާ ޕްރޮގްރާމް އާއި ސަރަހައްދީ ހަނގުރާމަވެރި ޖަމާއަތް ތަކަށް ފަންޑު ކުރުމަށް ޑިޖިޓަލް ފައިސާ ބޭނުން ކުރާ ކަމަށް އެމެރިކާ އިން ތުހުމަތު ކުރަމުންދާ ދަނޑިވަޅެއްގަ އެވެ. މި ފިޔަވަޅު ތަކުގެ ސަބަބުން އީރާންގެ ޑިޖިޓަލް ފައިސާގެ މުއާމަލާތް ތަކަށް ބޮޑެތި ހުރަސް ތަކެއް ކުރިމަތި ވާނެ ކަމަށް މާލީ މާހިރުން ލަފާ ކުރެ އެވެ.