ޔަމަނުގެ ކުރީގެ ރައީސް ހާދީ އަވަހާރަވެއްޖެ

ޔަމަނުގެ ކުރީގެ ރައީސް އަބްދު ރައްބޫ މަންސޫރު ހާދީ، އުމުރުފުޅުން 80 އަހަރުގައި އަވަހާރަވެއްޖެ ކަމަށް އެ ގައުމުގެ ރިޔާސީ އޮފީހުން ބުރާސްފަތި ދުވަހު ހާމަކޮށްފިއެވެ.

ހާދީގެ ވަކިވެދިއުމުގެ ހިތާމައިގައި، ގައުމީ ދިދަ ބައިދަނޑިއަށް ތިރިކުރުމަށާއި ތައުޒިޔާގެ ދަފްތަރު ހުޅުވުމާއެކު ތިން ދުވަހުގެ ގައުމީ ހިތާމައިގެ މުއްދަތެއް މިހާރު ވަނީ އިއުލާންކޮށްފައެވެ. ރައީސް ހާދީއަކީ ހޫޘީން ޔަމަނުގެ ބޮޑު ސަރަހައްދެއް ހިފައި، އެ ގައުމުގައި ބޮޑު ދާޚިލީ ހަނގުރާމައެއް ފެށުނު ހަލަބޮލި ދުވަސްވަރު ވެރިކަން ކުރެއްވި ބޭފުޅެކެވެ.

ޔަމަނުގެ ރިޔާސީ އޮފީހުން ނެރުނު ބަޔާނުގައި ހާދީގެ "ހިކުމަތްތެރި ލީޑަރޝިޕަށް" ތައުރީފުކޮށްފައިވެއެވެ. އެ ބަޔާނުގައި ބުނެފައިވަނީ، ހަނގުރާމައާއި، ބަޣާވާތާއި އަދި ކުރިން ދުވަހަކުވެސް ކުރިމަތިނުވާ ފަދަ އިންސާނީ އަދި އިގްތިސާދީ ކާރިސާތަކެއްގެ ތެރޭގައި، ޔަމަނު ދުށް އެންމެ އުނދަގޫ މަރުހަލާގައި ހާދީ ވަނީ ގައުމު ކުރިއަށް ގެންގޮސްދެއްވާފައި ކަމަށެވެ.

އަރަބް ސްޕްރިންގ މުޒާހަރާތަކާ ގުޅިގެން، 33 އަހަރަށްފަހު އަލީ އަބްދުﷲ ސާލިހު ވެރިކަމުން އިސްތިއުފާ ދެއްވުމުން، 2012 ވަނަ އަހަރު ހާދީ ރައީސްކަމާ ހަވާލުވެވަޑައިގަތީ ގިނަ ދުވަސްތަކެއް ވަންދެން ނައިބު ރައީސްގެ މަގާމު ފުރުއްވުމަށްފަހުއެވެ.

އުމުރުފުޅުން 80 އަހަރުގައި އަވަހާރަވި ހާދީ އުފަންވެވަޑައިގަތީ 1945 ވަނަ އަހަރުއެވެ. މަޑުމައިތިރި މިޒާޖެއްގެ ބޭފުޅެއްގެ ގޮތުގައި ފާހަގަކުރެވުނު ހާދީ، މިލިޓަރީ އޮފިސަރުން ތަމްރީނުކުރާ ސްކޫލަކުން ދަސްވެނިވެވަޑައިގަތީ 1964 ވަނަ އަހަރުއެވެ.

އޭނާ ވަނީ އިނގިރޭސިވިލާތުން އަސްކަރީ ތަމްރީނު ފުރިހަމަކުރެއްވުމަށްފަހު، 1970 ވަނަ އަހަރާ ހަމައަށް މިސްރުގައި ހަނގުރާމަމަތީ އުޅަނދުފަހަރާ ބެހޭ ޚާއްސަ ތަމްރީނުތަކެއް ފުރިހަމަކުރައްވާފައެވެ.

އުތުރު ޔަމަނާއި ކޮމިއުނިސްޓް ދެކުނު ޔަމަނު 1990 ވަނަ އަހަރު އެއްކޮށްލުމުގެ ކުރިން ހާދީ ހުންނެވީ ސާލިހުގެ އަރިސް ބޭފުޅެއްގެ ގޮތުގައެވެ. އަދި 1994 ވަނަ އަހަރު ދެކުނު ޔަމަނުން ވަކިވެގަންނަން ކުރި މަސައްކަތް ސާލިހު ނާކާމިޔާބުކޮށްލެއްވި ދުވަސްވަރު، ހާދީ ވަނީ ޔަމަނުގެ ޑިފެންސް މިނިސްޓަރުގެ މަގާމަށް އައްޔަންކުރައްވާފައެވެ.