ޗައިނާގައި ފަޓާސް އުފައްދާ ކާރުޚާނާއެއްގައި އެއްޗެއް ގޮވައި 21 މީހުން މަރުވެއްޖެ
ޗައިނާގެ ހުނާން ޕްރޮވިންސްގެ ފަޓާސް ކާރުޚާނާއެއްގައި ހިނގި މި ހާދިސާއާ ގުޅިގެން ސަލާމަތީ ބާރުތަކުން ދަނީ ރޮބޮޓް ބޭނުންކޮށްގެން މީހުން ހޯދުމުގެ މަސައްކަތް ކުރަމުން. މި ގޮވުމުގެ ސަބަބުން ކައިރީގައި ހުރި އިމާރާތްތަކަށް ބޮޑެތި ގެއްލުންތަކެއް ލިބިފައިވާއިރު، އިތުރު ނުރައްކަލަކުން ސަލާމަތްވުމަށްޓަކައި އެ ސަރަހައްދުގެ ތިން ކިލޯމީޓަރުގެ ރޭޑިއަސްއެއްގައި ތިބި މީހުން ވަނީ ރައްކާތެރި ހިސާބުތަކަށް ބަދަލުކޮށްފައި. ރައީސް ޝީ ޖިންޕިންގް ވަނީ މި ހާދިސާގެ ފުރިހަމަ ތަހުގީގެއް ހިންގައި، ޒިންމާވާންޖެހޭ ފަރާތްތަކަށް ފިޔަވަޅު އެޅުމަށް އިރުޝާދު ދެއްވާފައި.
ބަޑިބޭހުގެ ތަކެތި އުފައްދާ ކާރުޚާނާގެ ވަށައިގެންވާ 3 ކިލޯމީޓަރު (1.9 މޭލު) ގެ ސަރަހައްދެއްގައި ދިރިއުޅޭ އެންމެން، ރެސްކިއު ޓީމުތަކުން އެ ސަރަހައްދުން ބޭރުކޮށް ރައްކާތެރި ހިސާބުތަކަށް ވަނީ ބަދަލުކޮށްފައި. | ގެޓީ އިމޭޖަސް
ޗައިނާގެ ހުނާން ޕްރޮވިންސްގައި ހުންނަ ފަޓާސް އުފައްދާ ކާރުޚާނާއެއްގައި ބާރުގަދަ އެއްޗެއް ގޮވައި، 21 މީހުން މަރުވެ 61 މީހުން ޒަޚަމްވެއްޖެ ކަމަށް އެ ގައުމުގެ ދައުލަތުގެ މީޑިއާއިން ރިޕޯޓްކޮށްފިއެވެ.
ލިއުޔަންގް ސިޓީގައި ހުންނަ "ޗަންގްޝާ ލިއުޔަންގް ހުއާޝެންގް ފަޔަރވޯކްސް" ކާރުޚާނާގައި މި ގޮވުން ގޮވާފައިވަނީ ހޯމަ ދުވަހުގެ އެތަނުގެ ގަޑިން ހަވީރު 16:40 ހާއިރުއެވެ. މި ހާދިސާއާ ގުޅިގެން ސަލާމަތީ ބާރުތަކުން ވަނީ އެ ކާރުޚާނާގެ ވަށައިގެން 3 ކިލޯމީޓަރު (1.9 މޭލު) ގެ ސަރަހައްދެއްގައި ތިބި އެންމެން ރައްކާތެރި ހިސާބުތަކަށް ބަދަލުކޮށްފައެވެ.
މީހުން ހޯދުމާއި ސަލާމަތްކުރުމުގެ މަސައްކަތަށާއި ޒަޚަމްވި މީހުންނަށް ފަރުވާ ދިނުމަށް ކަމާބެހޭ އިދާރާތަކުން 500 އެއްހާ މުވައްޒަފުން ހަރަކާތްތެރިވަމުންދާއިރު، އިމާރާތުގެ ތެރޭގައި ތާށިވެފައި ތިބި މީހުން ހޯދުމަށް ރޮބޮޓްވެސް ދަނީ ބޭނުންކުރަމުންނެވެ.
މި ގޮވުން ގޮވަން މެދުވެރިވި ސަބަބު ފުލުހުން ތަހުގީގު ކުރަމުންދާއިރު، ފަޓާސް އުފައްދާ ކުންފުނީގެ އިސްވެރިޔާ ފުލުހުންގެ ބެލުމުގެ ދަށަށް ގެނެސް "ކޮންޓްރޯލް ފިޔަވަޅުތައް" އަޅާފައިވާ ކަމަށް ޗައިނާގެ ދައުލަތުގެ މީޑިއާއިން ރިޕޯޓްކުރެއެވެ.
ކަމާބެހޭ އިދާރާތަކުން ބުނި ގޮތުގައި، މީހުން ސަލާމަތްކުރުމުގެ މަސައްކަތް ކުރިއަށްދާއިރު، ކާރުޚާނާގެ ސަރަހައްދުގައި ހުރި ބަޑިބޭސް ރައްކާކުރާ ދެ ގުދަނެއްގެ ސަބަބުން ނުރައްކާ ބޮޑުވެފައިވާ ކަމަށް ދައުލަތުގެ މީޑިއާއިން ރިޕޯޓްކޮށްފައިވެއެވެ.
ސަލާމަތްކުރާ ޓީމުތަކުން ވަނީ ފަޓާސް ކާރުޚާނާގެ ވަށައިގެން 3 ކިލޯމީޓަރު (1.9 މޭލު) ގެ ރޭޑިއަސްއެއްގައި ތިބި އެންމެން އެ ސަރަހައްދުން ބޭރުކޮށްފައެވެ. މީގެ އިތުރުން، "ސަލާމަތްކުރުމުގެ މަސައްކަތް ކުރިއަށްދާއިރު އިތުރު ހާދިސާއެއް ހިނގިޔަ ނުދިނުމަށްޓަކައި" އެ ސަރަހައްދުގެ ތެތްކަން ހިފެހެއްޓުމުގެ ފިޔަވަޅުތައް ވެސް ވަނީ އަޅާފައެވެ.
މި ގޮވުމުގެ ބާރުގަދަކަމުން ކާރުޚާނާ ކައިރީގައި ހުރި މީހުން ދިރިއުޅޭ އިމާރާތެއްގެ ކުޑަދޮރުތަކުގެ ބިއްލޫރިތައް ވެސް ތަޅައިގެން ގޮސްފައިވާ ކަމަށް، ހާދިސާ ހިނގި ސަރަހައްދުގައި ހުރި ސީސީޓީވީގެ ރިޕޯޓަރަކު ޓީވީ މެދުވެރިކޮށް ދިން ރިޕޯޓެއްގައި ފާހަގަކޮށްފައިވެއެވެ.
ރައީސް ޝީ ޖިންޕިންގް ވަނީ ވީނުވީއެއް ނޭނގި ގެއްލިފައިވާ މީހުން ހޯދުމަށާއި ޒަޚަމްވި މީހުން ސަލާމަތްކުރުމަށް ކުރެވެން ހުރި ހުރިހާ މަސައްކަތެއް ކުރުމަށް އިރުޝާދު ދެއްވާފައެވެ. އަދި މި ހާދިސާ ތަހުގީގުކޮށް، މީގައި ޒިންމާވާންޖެހޭ ފަރާތްތައް ޖަވާބުދާރީ ކުރުވުމަށް ވެސް ޝީ ގޮވާލައްވާފައިވާ ކަމަށް ދައުލަތުގެ މީޑިއާއިން ރިޕޯޓްކުރެއެވެ.
މަސްދަރު: ބީބީސީ
