ޝައިޚް އާސިމް އަލް ހަކީމް ރާއްޖޭގެ 5 ސިޓީގައި ދަރުސްދެއްވަނީ
މި މަހުގެ 28 އިން ފެށިގެން މެއި މަހުގެ 2 ވަނަ ދުވަހުގެ ނިޔަލަށް ކުރިއަށްގެންދާ މި ދަތުރުގައި ކުޅުދުއްފުށި، މާލެ، އައްޑޫ، ފުވައްމުލަކު އަދި ތިނަދޫ ސިޓީގައި ޚާއްސަ ދަރުސްތަކެއް ބޭއްވުމަށް ވަނީ ތާވަލުކޮށްފައި. "ދަ ޓްރެވަލާ" އާއި ސިޓީ ކައުންސިލްތައް ގުޅިގެން އިންތިޒާމުކުރާ މި ހަރަކާތުގެ އެންމެ ފަހު ދަރުސް އޮންނާނީ ތިނަދޫ ސިޓީގައި. މި ދަތުރާ ގުޅޭ އިތުރު މައުލޫމާތު 1510 ނަންބަރު ހޮޓްލައިން މެދުވެރިކޮށް އާންމުންނަށް ލިބޭނެ އިންތިޒާމު ވަނީ ހަމަޖައްސާފައި.
ޝެއިޚް އާސިމް ބިން ލުގްމާން އަލް ހަކީމް. | ސޯޝަލް މީޑިއާ
ދުނިޔޭގެ މަޝްހޫރު ދީނީ އިލްމުވެރިޔާ އައްޝައިޚް އާސިމް އަލް ހަކީމް ރާއްޖޭގެ ފަސް ސިޓީގައި ދީނީ ދަރުސް ދެއްވުމަށް ހަމަޖެހިއްޖެ އެވެ.
"އައްސަލާމް އަލައިކުމް މޯލްޑިވްސް" ގެ ނަމުގައި ކުރިއަށްގެންދާ މި ދަތުރަކީ ދަ ޓްރެވަލާގެ ފަރާތުން އިންތިޒާމުކޮށްގެން ބާއްވާ ހަރަކާތެކެވެ.
މި ދަތުރުގައި އެންމެ ފުރަތަމަ ދަރުސް ބޭއްވުމަށް ހަމަޖެހިފައިވަނީ މި މަހުގެ 28 ވާ އާދިއްތަ ދުވަހުގެ ރޭ 8:30 ގައި ކުޅުދުއްފުށި ސިޓީގެ އޭއީސީ ހޯލުގަ އެވެ. އޭގެ ފަހުން މި މަހުގެ 29 ވާ ހޯމަ ދުވަހުގެ ރޭ 8:30 ގައޮ މާލެ ސިޓީގެ އާޓިފިޝަލް ބީޗުގައި ޚާއްސަ ދަރުހެއް ބޭއްވުމަށް ވަނީ ތާވަލުކޮށްފަ އެވެ.
އައްޑޫ ސިޓީގައި ދަރުސް ދެއްވުމަށް ހަމަޖެހިފައިވަނީ މި މަހުގެ 30 ވާ އަންގާރަ ދުވަހުގެ ރޭ އެ 8:30 ގައި އެ ސިޓީގެ ސިޓީ ސްކޮޔަރގަ އެވެ. އަދި އަންނަ މެއި މަހުގެ 1 ވާ ބުދަ ދުވަހުގެ ރޭ ފުވައްމުލަކު ސިޓީގައި ދަރުސް ދެއްވުމަށް ހަމަޖެހިފައިވާއިރު، މި ދަތުރުގެ އެންމެ ފަހު ދަރުސް އޮންނާނީ މެއި މަހުގެ 2 ވާ ބުރާސްފަތި ދުވަހުގެ ރޭ ގަޑިން 8:30 ގައި ތިނަދޫ ސިޓީގެ ތިނަދޫ ސްކޫލް ހޯލުގަ އެވެ.
މި ހަރަކާތަކީ މުސްލިމް ވޮއިސް ފޯ ޕީސް (އެމްވީޕީ) އާއި ރާއްޖޭގެ ސިޓީ ކައުންސިލްތަކާ ގުޅިގެން ކުރިއަށްގެންދާ ސިލްސިލާ ދަރުސްތަކެކެވެ. މި ދަތުރާ ގުޅޭ އިތުރު މައުލޫމާތު ދަ ޓްރެވަލާގެ ވެބްސައިޓުންނާއި ހޮޓްލައިން ނަންބަރު 1510 މެދުވެރިކޮށް ލިބޭނެ ކަމަށް އެ ފަރާތުން ބުނެ އެވެ.
ޝެއިޚް އާސިމް ބިން ލުގްމާން އަލްހަކީމަކީ ޖިއްދާގައި ދިރިއުޅޭ ސައުދީ އަރަބިއްޔާގެ އިސްލާމީ އިލްމުވެރިއެއް އަދި ދަރުސްވެރިއެކެވެ. އިނގިރޭސި ބަހުން ދަރުސްތަކާއި ސުވާލު ޖަވާބު ސެޝަންތައް ދެއްވުމަށް މަޝްހޫރު އިލްމުވެރިއެކެވެ. ޚާއްސަކޮށް ސޯޝަލް މީޑިއާ ޕްލެޓްފޯމްތަކުގެ ތެރެއިން ޔޫޓިއުބް ޗެނަލާއި އެކްސް އެކައުންޓް މެދުވެރިކޮށް ވެސް އޭނާ ހަރަކާތްތެރިވެ އެވެ.
1962 ވަނަ އަހަރު އުފަންވި އާސިމް އަކީ ސައުދީ ރައްޔިތެކެވެ. އޭނާ ވަނީ ކިންގް އަބްދުލްއަޒީޒް ޔުނިވާސިޓީން ލިންގުއިސްޓިކްސް އިން 1987 ގައި ޑިގްރީ ހާސިލް ކުރައްވައި އުއްމުލް ޤުރާ ޔުނިވާސިޓީން އިސްލާމިކް ސްޓަޑީޒްގެ ހައި ޑިޕްލޮމާ 1998 ހާސިލް ކުރެއްވި އެވެ.
ޖިއްދާގެ މިސްކިތެއްގައި އިމާމެއްގެ ގޮތުގައި 20 އަހަރަށްވުރެ ގިނަ ދުވަހު އާސިމް މަސައްކަތް ކުރައްވާފައިވެ އެވެ. އޭނާ މަޝްހޫރުވެފައިވަނީ ހަފްތާއަކު އެއްފަހަރު ހުދާ ޓީވީން ކުރިއަށް ގެންދާ ސުވާލު ޖަވާބު ސެޝަންތަކާއި، ޕީސް ޓީވީއަށް ކޮށްދެއްވާ ޚިދުމަތްތަކާއި، ސޯޝަލް މީޑިއާގައި އޮންލައިން ޕްރޮގްރާމްތައް ކުރިއަށް ގެންދިއުމުންނެވެ.
