ބިދޭސީންގެ ފިންގަރ ޕްރިންޓްތައް ސިސްޓަމް ތެރެއިން ގެއްލިގެން އަނެއްކާ ފިންގަރ ޕްރިންޓްތައް ނަގާ ކަމެއް ސަރުކާރުގެ ތަރުޖަމާނަކަށް ނޭނގެ
ރާއްޖޭގައި މަސައްކަތްކުރާ ބިދޭސީންގެ ބަޔޯމެޓްރިކްސް މައުލޫމާތު ފުރިހަމަކުރުމުގެ މަސައްކަތް ސަރުކާރުން ފަށާފައިވާއިރު، މިއީ ސިސްޓަމުން މައުލޫމާތު ގެއްލިގެން ކުރާ ކަމެއް ނޫން ކަމަށް ސަރުކާރުގެ ތަރުޖަމާނު ވިދާޅުވެއްޖެ. މި މަސައްކަތުގެ ދަށުން 10 އިނގިލީގެ ނިޝާން ފަދަ މައުލޫމާތު މަދުވާ ފަރާތްތަކުގެ މައުލޫމާތު ފުރިހަމަކުރަމުންދާއިރު، މޫސުން ގޯސްވުމުގެ ސަބަބުން ކިއޫގައި ތިބި ބިދޭސީންނަށް ބޮޑެތި ދަތިތަކަކާ ވަނީ ކުރިމަތިލާން ޖެހިފަ.
ބިދޭސީންގެ އިނގިލީގެ ނިޝާން ނެގުން ބޮޑު ކަރީސާއަކަށް ވެފައި | ރާއްޖެއެމްވީ
ރާއްޖޭގައި މަސައްކަތް ކުރާ ބިދޭސީންގެ ފިންގަރ ޕްރިންޓްތައް ސިސްޓަމް ތެރެއިން ގެއްލިގެން އަލުން އެ މަސައްކަތް ކުރަމުންދާ ކަމުގެ މައުލޫމާތު ލިބިފައި ނުވާ ކަމަށް ސަރުކާރުގެ ތަރުޖަމާނު މުހައްމަދު ހުސައިން ޝަރީފް (މުންދު) ވިދާޅުވެއްޖެ އެވެ.
ތަރުޖަމާނު މިހެން ވިދާޅުވީ ބިދޭސީންގެ ބަޔޯމެޓްރިކްސް ނެގުމުގެ މަސައްކަތް އަލުން ފަށައިގެން ކުރިއަށްދާ ދިއުމާ ގުޅޭގޮތުން ނޫސްވެރިން ސުވާލު ކުރުމުންނެވެ.
ރާއްޖޭގައި އުޅޭ ބިދޭސީ މަސައްކަތްތެރިންގެ ތެރެއިން 98 އިންސައްތަ މީހުންގެ ބަޔޯމެޓްރިކްސް ނެގިފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މީގެ ކުރިން ވަނީ ވިދާޅުވެފަ އެވެ. ނަމަވެސް "ރާއްޖެޓީވީ" އަށް މައުލޫމާތު ލިބިފައިވާ ގޮތުގައި، ސިސްޓަމުން ބައެއް މައުލޫމާތު ގެއްލުމާ ގުޅިގެން، ކުރިން ބަޔޯމެޓްރިކްސް ނަގާފައިވާ ބިދޭސީންގެ މައުލޫމާތު އަލުން ނެގުމުގެ މަސައްކަތް މިހާރު ދަނީ ކުރަމުންނެވެ. މި މަސައްކަތް ކުރިއަށްދާތާ މިހާރު ތިން ދުވަސް ވެފައިވާއިރު، ބުރާސްފަތި ދުވަހުގެ ހެނދުނު ވެސް ބިދޭސީން ކިއޫ ހަދައިގެން ތިބި މަންޒަރު ވަނީ ފެނިފަ އެވެ.
މިކަމާ ގުޅޭގޮތުން ސުވާލުކުރުމުން ސަރުކާރުގެ ތަރުޖަމާނު މުންދު ވިދާޅުވީ، މައުލޫމާތު ގެއްލިގެން އެ މައުލޫމާތު ހޯދުމަށް މަސައްކަތް ކުރާ ކަމެއް އެނގިވަޑައިގެންފައި ނެތް ކަމަށެވެ. އެހެންނަމަވެސް، ކަމާބެހޭ ފަރާތްތަކާ ސުވާލު ކުރުމުން، ބައެއް ކޭސްތަކުގައި މައުލޫމާތު ފުރިހަމަ ނުވާކަން ފާހަގަކުރެވިފައިވާ ކަމަށް އޭނާ ވިދާޅުވިއެވެ. ވަކިން ހާއްސަކޮށް 10 އިނގިލީގެ ފިންގަރ ޕްރިންޓް ނުވަތަ ބަޔޯމެޓްރިކްސް ލިބިފައި ނެތް ފަރާތްތައް ފާހަގަވެގެން އެ މައުލޫމާތު ފުރިހަމަ ކުރުމަށް ގޮވާލަމުންދާ ކަމަށް މުންދު ވިދާޅުވި އެވެ.
ތަރުޖަމާނު އިތުރަށް ވިދާޅުވީ، މިހާރު ކުރިއަށްދާ މަސައްކަތަކީ މައުލޫމާތު ފުރިހަމަ ކުރުމުގެ މަސައްކަތް ކަމަށާއި، ގެއްލިގެން އަލުން ބަލުން މީހެއްގެ މައުލޫމާތު ނަގާ ކަމަށް އެ ބޭފުޅުން ވިދާޅުވެފައި ނުވާ ކަމަށެވެ. އަދި މިކަމާ ގުޅޭ އިތުރު ތަފްސީލު އޮޅުންފިލުވުމަށްފަހު ޔަގީންކަމާއެކު ހިއްސާ ކުރައްވާނެ ކަމަށް ވެސް އޭނާ ވިދާޅުވިއެވެ. މީގެ އިތުރުން، ކިއޫގައި ތިބި ހުރިހާ ބިދޭސީންނަކީ ހަމައެކަނި އެކަމަށް އައިސް ތިބި ބައެއް ނޫން ކަމަށާއި، އޭގެ ތެރޭގައި އަމިއްލައަށް އިސްނަގައިގެން އަލަށް މައުލޫމާތު ދޭން އައިސް ތިބި ބަޔަކު ވެސް ހިމެނޭ ކަމަށް މައުލޫމާތު ލިބިފައިވާ ކަމަށް މުންދު ފާހަގަކުރެއްވި އެވެ.
ބިދޭސީންގެ ބަޔޯމެޓްރިކްސް ނެގުމުގެ މަސައްކަތް ކުރިއަށްދާއިރު، މި ދުވަސްވަރަކީ ރާއްޖެއަށް މޫސުން ގޯސް ދުވަސްވަރަކަށް ވުމުން، ބޯކޮށް ވާރޭވެހި ވިއްސާރަވުމުގެ ސަބަބުން ބިދޭސީންނަށް ބޮޑެތި ދަތިތަކާ ކުރިމަތިލާން ޖެހިފައިވާކަން ފާހަގަކުރެވެ އެވެ. ގިނަ އަދަދެއްގެ ބިދޭސީން މެންދަމުން ފެށިގެން ކިއޫ ހަދައިގެން ތޮއްޖެހިފައިވާ ހާލަތެއްގައި ތިބެން ޖެހުމަކީ އާންމުންގެ ކަންބޮޑުވުން އޮތް ކަމެކެވެ. ސަރުކާރުން ބުނަމުންދަނީ މިއީ ބިދޭސީންގެ މައުލޫމާތު ފުރިހަމަކޮށް، ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް ކުރިއަށްގެންދާ މުހިންމު މަސައްކަތެއް ކަމަށެވެ.
