މަޖިލީހުގެ ނައިބު ރައީސް ނާޒިމްގެ އިތުބާރު ނެތް ކަމަށް ހުށަހަޅައިފި
ނާޒިމްގެ އިތުބާރު ނެތް ކަމުގެ މައްސަލަ ހުށަހަޅާފައިވާއިރު، އޭނާ އާއި ރައީސް ޑޮކްޓަރު މުޙައްމަދު މުޢިއްޒުއާ ދެމެދު މައްސަލަ ޖެހިފައިވާ ކަމަށް މީގެ ކުރިން ވެސް އަޑު ފެތުރިފައިވޭ.
ރައްޔިތުންގެ މަޖިލީހުގެ ޖަލްސާގައި މަޖިލީހުގެ ނައިބު ރައީސް އަޙުމަދު ނާޒިމް ރިޔާސަތުގައި | މަޖިލިސް
ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެމްބަރު އަޙުމަދު ނާޒިމްގެ އިތުބާރު ނެތް ކަމަށް ހުށަހަޅައިފި އެވެ.
ރައްޔިތުންގެ މަޖިލީހުން ބުނެފައި ވަނީ، ނާޒިމްގެ އިތުބާރު ނެތް ކަމުގެ މައްސަލައިގެ ޤަރާރެއް މަޖިލީހުގެ އިދާރާ އަަށް ލިބިފައިވާ ކަމަށެވެ. އެހެންކަމުން އެ މައްސަލަ ޤާނޫނު އަސާސީ އާއި ރައްޔިތުންގެ މަޖިލީހުގެ ޤަވާއިދުގައިވާ ގޮތުގެ މަތިން ކުރިއަށް ގެންދެވޭނެ ކަމަށް މަޖިލީހުން ބުނެފައިވެ އެވެ.
ނަމަވެސް މަޖިލީހުގެ ނައިބު ރައީސް ކަމުން ނާޒިމް ވަކި ކުރުމުގެ ޤަރާރުގައި ސޮއި ކުރީ ކިތައް މެމްބަރުން ކަމެއް ހާމަ ކޮށްފައި ނުވެއެވެ. ނާޒިމްގެ އިތުބާރު ނެތް ކަމުގެ މައްސަލަ ހުށަހަޅާފައިވާއިރު، އޭނާ އާއި ރައީސް ޑޮކްޓަރު މުޙައްމަދު މުޢިއްޒުއާ ދެމެދު މައްސަލަ ޖެހިފައިވާ ކަމަށް މީގެ ކުރިން ވެސް އަޑު ފެތުރިފައިވެ އެވެ.
ނާޒިމްގެ އިތުބާރު ނެތް ކަމުގެ މައްސަލަ ހުށަހަޅަން ޕީއެންސީގެ ޕީޖީ އިން މަސައްކަތް ފެށީ ބުދަ ދުވަހު އެވެ. ހަމަ އެ ދުވަހު، މައްސަލަ ހުށަހަޅަން ބޭނުންވާ އަދަދަށް ސޮއި ވަނީ ހަމަ ކޮށްފަ އެވެ. އޭގެ ކުރިން ޕީއެންސީގެ ޕީޖީ ގުރޫޕަށް ރައީސް މުޢިއްޒު އިރުޝާދު ދެއްވާ ވަޓްސްއެޕް ގުރޫޕް އިން ނާޒިމް ވަނީ ބޭރު ކޮށްފަ އެވެ.
