އަދަދު ނޫހުގެ އޮފީސް ފާސްކޮށް އެނޫހުގެ ނޫސްވެރިންގެ ޕާސްޕޯޓް ހިފެހެއްޓުމަކީ، ތަހުގީގީ ނޫސްވެރިކަން ކުށެއްގެ ގޮތުގައި ކަނޑައެޅުމަށް ކުރާ މަސައްކަތެއް: ސީޕީޖޭ
ނޫސްވެރިކަމަށް ހުރަސްއެޅުމަށް ޖިނާއީ ތަހުގީގުތައް ބޭނުންކުރުން ހުއްޓާލުމަށް ސީޕީޖޭ އިން ސަރުކާރަށް ގޮވާލައިފި. އަދަދު ނޫހުގެ އޮފީސް ފާސްކޮށް، ނޫސްވެރިންގެ ދަތުރުފަތުރު ހިފެހެއްޓުމާ ގުޅިގެން ބައިނަލްއަގުވާމީ ޖަމިއްޔާތަކާއި އިނގިރޭސި ސަފީރު ވަނީ ކަންބޮޑުވުން ފާޅުކުރައްވާފަ. މީޑިއާގެ މިނިވަންކަމަށް ހުރަސްއެޅުމަކީ ޑިމޮކްރަސީގެ އަސާސްތަކާ ހިލާފު ކަމެއް ކަމަށް އެ ފަރާތްތަކުން ފާހަގަކުރޭ.
ފުލުހުން އަދަދު ނޫހުގެ އޮފީހުގައި ހަރަކާތްތެރި ވަނީ | ރާއްޖެ އެމްވީ
"އަދަދު" ނޫހުގެ އޮފީސް ފާސްކުރުމާއި، އެ ނޫހުގެ ނޫސްވެރިން ރާއްޖެ އިން ބޭރަށް ދިއުން މަނާކޮށްފައިވަނީ އިންވެސްޓިގޭޓިވް ޖާނަލިޒަމް ނުވަތަ ތަހުގީގީ ނޫސްވެރިކަމަކީ ކުށެއްގެ ގޮތުގައި ކަނޑައެޅުމަށް ކުރާ މަސައްކަތެއްގެ ގޮތުގައި ސިފަކުރެވޭ ކަމަށް ކޮމިޓީ ޓު ޕްރޮޓެކްޓް ޖާނަލިސްޓްސް (ސީޕީޖޭ) އިން ބުނެފި އެވެ.
ސީޕީޖޭ އިން އަންގާރަ ދުވަހު ނެރުނު ބަޔާނެއްގައި ވަނީ، ރައީސުލްޖުމްހޫރިއްޔާއާ ގުޅޭގޮތުން ގެނެސްދޭ ރިޕޯޓުތައް ހުއްޓުވުމަށްޓަކައި ޖިނާއީ ތަހުގީގުތަކުގެ ބޭނުންކުރުން ހުއްޓާލުމަށް ދިވެހި ސަރުކާރަށް ގޮވާލާފައެވެ. އަދި އަދަދު ނޫހުން ހިފަހައްޓާފައިވާ ތަކެތި ވަގުތުން އަނބުރާ ދިނުމަށާއި، އެ ނޫހުގެ މުވައްޒަފުންނަށް އަމާޒުކޮށް ނެރެފައިވާ ދަތުރުފަތުރުކުރުން މަނާކުރުމުގެ އަމުރުތައް ބާތިލުކުރުމަށް ވެސް އެ ޖަމިއްޔާ އިން ގޮވާލާފައިވެ އެވެ.
މީޑިއާ އާއި ގުޅޭ މަދަނީ ގަވާއިދުތަކުގެ ބަދަލުގައި، ޖިނާއީ ގާނޫނުތައް ބޭނުންކޮށްގެން ނޫސްވެރިކަމަށް ހުރަސްއެޅުމަކީ ނުރައްކާތެރި ނަމޫނާއެއް ކަމަށް އެ ޖަމިއްޔާ އިން ބުނެފައިވެ އެވެ. އަދި ސަރުކާރުގެ އިދާރާތައް ޒިންމާދާރުކުރުވުމުގެ ފުރުސަތު ކަމާބެހޭ ފަރާތްތަކުން ނޫސްވެރިންނަށް ދޭންޖެހޭނެ ކަމަށްވެސް ސީޕީޖޭ އިން ބުނެފައިވެ އެވެ.
މިކަމާ ގުޅޭގޮތުން ސީޕީޖޭގެ އޭޝިއާ ޕެސިފިކް ޕްރޮގްރާމް ކޯޑިނޭޓަރު ކުނާލް މަޖުމްދަރު ވިދާޅުވީ، ނޫސްވެރިކަމުގެ މިނިވަންކަމަށް ހުރަސްއެޅޭ ގޮތަށް އަމަލުކުރުން ހުއްޓާލައި، ދައުލަތުގެ މުއައްސަސާތައް ޖަވާބުދާރީކުރުވުމުގެ ޖާގަ ނޫސްވެރިންނަށް އޮންނަންޖެހޭނެ ކަމަށެވެ.
އަދަދުގެ އޮފީހަށް ފުލުހުން ވަދެ ބަލައިފާސްކުރުމާ ގުޅިގެން، އިނގިރޭސިވިލާތުން ރާއްޖެއަ ށް ކަނޑައަޅުއްވާފައި ހުންނަވާ ސަފީރު ނިކޮލަސް ޑޭވިޑް ލޯ ވެސް ވަނީ ކަންބޮޑުވުން ފާޅުކުރައްވާފަ އެވެ. މީގެ އިތުރުން ބޭރުގެ އެކި ނޫސް ޖަމިއްޔާތަކުން ވެސް ދަނީ އަދަދު ނޫހަށް ފުލުހުން ވަދެ ހިންގި އޮޕަރޭޝަނާ ގުޅިގެން ކަންބޮޑުވުން ފާޅުކުރަމުންނެވެ.
މި ފިޔަވަޅުތަކަކީ ރާއްޖޭގެ މީޑިއާގެ މިނިވަންކަމާއި އަދި ހިޔާލުފާޅުކުރުމުގެ މިނިވަންކަމަށް އޮތް ބޮޑު ނުރައްކަލަކަށް ބައިނަލްއަގުވާމީ ޖަމިއްޔާތަކުން ދަނީ ފާހަގަކުރަމުންނެވެ. ނޫސްވެރިކަމުގެ މިނިވަންކަން ރައްކާތެރިކުރުމަކީ ޑިމޮކްރަސީގެ މުހިންމު އަސާސެއް ކަމަށާއި، މި ހައްގުތަކަށް އުނިކަމެއް ގެނުވުމަކީ ބައިނަލްއަގުވާމީ މިންގަނޑުތަކާ ހިލާފު ކަމެއް ކަމަށް ބައިނަލްއަގުވާމީ ޖަމިއްޔާތަކުން ފާހަގަކުރެ އެވެ.
