ހޯރަފުށީ އެއަރޕޯޓުގެ ސެކިއުރިޓީ އަށް ވަޅިން ބިރުދައްކާ އެއަރޕޯޓުގައި ހުންނަ މޯލްޑިވިއަން އޮފީސް ފަޅާލައިފި

ހއ. ހޯރަފުށި އެއަރޕޯޓުގައި ހުންނަ ގައުމީ އެއާލައިން - މޯލްޑިވިއަން ގެ އޮފީސް ރޭ ފަތިހު ފާޅާލައިފި އެވެ.

ރާއްޖެ އެމްވީ އަށް މައުލޫމާތު ލިބިފައިވާ ގޮތުގައި، ރޭ ފަތިހު ހޯރަފުށި އެއަރޕޯޓުގައި މި ހާދިސާ ހިނގީ ފަތިހު 4 ޖަހާކަށް ހާއިރު އެވެ. އަދި މޯލްޑިވިއަން ގެ އޮފީސް ފަޅާލައި އެތަނުން ޕާރްސަލް އެއް ގެންގޮސްފައިވާކަން ވެސް ރާއްޖެ އެމްވީ އަށް ވަނީ އެނގިފަ އެވެ. 

އެކަން ކޮށްފައިވަނީ ކާކުކަން ނޭނގޭ ގޮތަށް މޫނު ނިވައިކޮށްގެން ހުރި މީހެއް ކަމަށް މައުލޫމާތު ލިބިފައިވެ އެވެ. އަދި އޭނާ މޯލްޑިވިއަން ގެ އޮފިސް ފަޅާލާފައިވަނީ ދޮރު ހަލާކު ކޮށްލައިގެން ކަމަށް އެއަރޕޯޓުން ވާހަކަ ދެއްކި ފަރާތަކުން ބުނެފައިވެ އެވެ.

ރާއްޖެ އެމްވީ އަށް މައުލޫމާތު ލިބިފައިވާ ގޮތުގައި މިވަގުތާ ހަމައަށް ވެސް އެމީހާ އަތުލައިގަނެވިފައެއް ނުވެ އެވެ.

ހާދިސާ ހިނގި އިރު ޑިއުޓީގައި ދެ ސެކިއުރިޓީ އޮފިޝަލުން ތިއްބެވެ.

ހޯރަފުށީ އެއަރޕޯޓުގެ މޯލްޑިވިއަން އޮފީސް ފަޅާލާފައިވާއިރު، އޮކްޓޫބަރު މަހުގެ 27 ވަނަ ދުވަހު ވެލާނާ އިންޓަނޭޝަނަލް އެއަރޕޯޓް (ވީއައިއޭ) ޓަރމިނަލް އެކަކަށް ވަންނަން ދިޔަ ބޭންކެއްގެ ދެ މުވައްޒަފެއްގެ އަތުން، ލައްކަ އަކަށްވުރެ ގިނަ ޑޮލަރު ހުރި ސޫޓް ކޭސް އެއް ވެސް ވަނީ ފޭރިގަނެފަ އެވެ. 

ހޯރަފުށީ އެއަރޕޯޓު ހިންގުމާ ހަވާލުވެ ހުރި އަހުމަދު ވަލީދު އާ މި ނޫހުން ގުޅުމުން ބުނީ ފުލުހުން މައްސަލަ ތަހުގީގު ކުރަމުންދާތީ އިތުރު މައުލޫމާތެއް ދެވެން ނެތް ކަމަށެވެ.

ހޯރަފުށީ އެއަރޕޯޓު ހިންގަމުން ދާތާ 5 އަހަރު ފުރިފައިވާއިރު މިހާތަނަށް މިބާވަތުގެ ޙާދިސާ އެއް އެ އެއަރޕޯޓުގައި ހިނގާފައެއް ނުވެ އެވެ.