އިދިކޮޅުގައި އެއްވެސް ކަހަލަ ހަރުދަނާ ނިޒާމެއް ނެތް ކަމަށް ހީނާ ވިދާޅުވުމުން ގިނަ ބައެއްގެ ފާޑު ކިޔުން އަމާޒުވެއްޖެ
އިދިކޮޅު ޕާޓީތަކުގައި ހަރުދަނާ ނިޒާމެއް ނެތް ކަމަށް ރައީސް އޮފީހުގެ ތަރުޖަމާނު ހީނާ ވިދާޅުވުމާ ގުޅިގެން، އާންމުންގެ ބޮޑެތި ފާޑުކިޔުންތަކެއް ވަނީ އަމާޒުވެފައި. މި ފަހުން ބޭއްވި އިންތިޚާބުތަކުގެ ނަތީޖާއަށް އިޝާރާތްކޮށް، ސަރުކާރުގެ ސިޔާސަތުތަކާމެދު ރައްޔިތުންގެ ނުރުހުން އޮތްކަން ހަމަވާ ކަމަށް ގިނަ ބަޔަކު ބުނޭ. މީގެ އިތުރުން، އެންސްޕާގެ ޚިދުމަތްތަކުގެ ފެންވަރު ދަށްވުމާއި ބައެއް އިހުމާލުތަކާ ގުޅިގެން ހީނާގެ އިސްތިއުފާއަށް ގިނަ ބަޔަކު ދަނީ ގޮވާލަމުން.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ރައީސް އޮފީހުގެ ތަރުޖަމާނު ހީނާ ވަލީދު ވާހަކަ ދައްކަވަނީ. | ރައީސް އޮފީސް
ސަރުކާރާ އިދިކޮޅު ޕާޓީތަކުގެ އެއްވެސް ކަހަލަ ހަރުދަނާ ނިޒާމެއް ނެތް ކަމަށް ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވުމުން ގިނަ ބައެއްގެ ފާޑު ކިޔުން އަމާޒުވެއްޖެ އެވެ.
މިމަހުގެ 4 ވަނަ ދުވަހުގެ ކުރިން ރާއްޖޭގެ މީޑިއާއަކަށް ދެއްވި އިންޓަވިޔުއެއްގައި ހީނާ ވިދާޅުވީ އިދިކޮޅުގައި މިހާރު ސިޔާސީ ގޮތުން އެއްވެސް ކަހަލަ ހަރުދަނާ ނިޒާމެއް ނެތް ކަމަށާއި، މަސައްކަތް ކުރަމުންދަނީ 2028 ގައި ބާއްވާ ރިޔާސީ އިންތިޚާބަށް ކަމަށެވެ.
އެމްޑީޕީއަށް އިޝާރާތް ކުރައްވައި ހީނާ ވިދާޅުވީ ވަރަށް ބޮޑަށް ޕެކްޝަން އުފެދިފައިވާ ކަމަށާއި، ލޯކަލް ކައުންސިލް އިންތިޚާބާއި، އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިޚާބު ކާމިޔާބު ކުރުމަށް މަސައްކަތް ކުރާ މަންޒަރު ނުފެންނަ ކަމަށެވެ. އަދި ކެންޑިޑޭޓުން ދޫކޮށްލުމަށްފަހު ބޮޑަށް މަސައްކަތް ކުރަނީ ރިފެރެންޑަމް ވޯޓަށް ކަމަށް އޭނާ ވިދާޅުވި އެވެ.
އިދިކޮޅުން މިހާރު ނެތެއްނުންތޯ މިހާރު ސިޔާސީ ގޮތުން އެއްވެސް ކަހަލަ ހަރުދަނާ ނިޒާމެއް. އެބޭފުޅުން މިހާރު އެމަސައްކަތް ކުރަމުން އެދަނީ އެބޭފުޅުންގެ ތެރޭގައި މި މިއޮތީ ކުރިއަށް މިއޮތީ ރިޔާސީ އިންތިޚާބުގެ ވާދަވެރިކަމާއި މިކަހަލަ ކަންތައްތަކެއް ފެކްޝަންތަކެއް އުފެދިފައި މިއޮތީ. އެހެންނަމަވެސް މިހާރު އަޅުގަނޑުމެންނަށް ނުފެނޭ ކައުންސިލް އިންތިޚާބަށް ވެސް އެބޭފުޅުން މަސައްކަތް ކުރާތަނެއް. އެބޭފުޅުންގެ ކެންޑިޑޭޓުން ވެސް ދޫކޮށްލާފައި ފެންނަ ނުފެންނަ ވޯޓާ ގުޅޭގޮތުން މިހާރު އެބޭފުޅުން އެމަސައްކަތް ކުރަމުން އެދަނީ.ރައީސް އޮފީހުގެ ތަރުޖަމާނު ހީނާ ވަލީދު
ހީނާ މިހެން ވިދާޅުވެފައިވާތީ، ތިން އިންތިޚާބުގެ ނަތީޖާ އަށްފަހު ގިނަ ބައެއްގެ ފާޑު ކިޔުން ވަނީ އަމާޒުވެފަ އެވެ. މުޅި ސޯޝަލް މީޑިއާގައި ގިނަ ބަޔަކު ދަނީ ގިނަ ސުވާލުތައް އަމާޒު ކުރަމުންނެވެ.
ރައްޔިތުން މިސަރުކާރާ މެދު ނުރުހޭ ކަމާއި، ސަރުކާރުގެ ސިޔާސަތުތައް ބަދަލު ކުރަން ނުޖެހޭތޯ ބައެއް މީހުން ސުވާލު ކޮށްފައިވެ އެވެ.
އެންސްޕާގެ ސީއީއޯގެ މަގާމުގައި ހިނާ ހުންނެވިއިރު، ޚިދުމަތުގެ ފެންވަރު ދަށްވެ، އެތައް މައްސަލަތަކެއް ފެންމަތިވަމުންދާއިރު، ޖަވާބުދާރީވުމަށް ވެސް ގޮވާލާފައިވެ އެވެ. އަދި މިފަހުން ކުޑަ ކުއްޖަކު ދިރިހުންނަން ބޭނުންވާ ކުޑަ ހޮޅިކޮޅެއް އެންސްޕާ މެދުވެރިކޮށް ގެނެސްދިނުމުގެ ހުއްދަ ނުދީ އޮއްވާ ކުއްޖާ ނިޔާވި މައްސަލައާ ގުޅިގެން ހީނާ އިސްތިއުފާ ދޭން ޖެހޭ ކަމަށް ވެސް ގިނަ ބަޔަކު ބުނެފައިވެ އެވެ.
ހީނާގެ އިތުރުން މިސަރުކާރުގެ ބޭފުޅުންނަށް އިދިކޮޅު ޕާޓީތަކަށް އެއްވެސް ވަރަކަށް ފާޑު ކިޔެން ނެތް ކަމަށާއި، މިހާރަށް ވުރެ ދިރިއުޅުން ދަތިވި ދުވަސްތަކެއް ނާންނަ ކަމަށް ވެސް ބައެއް މީހުން ބުނެފައިވެ އެވެ. އަދި މިސަރުކާރަށް ރައްޔިތުންގެ ތާއީދު ނެތް ކަމަށާއި، އެކަން މި ތިން އިންތިޚާބުގެ ނަތީޖާއިން ސަރުކާރަށް ސާފުވާނެ ކަމަށް ވެސް ގިނަ ރައްޔިތުން ބުނެފައިވެ އެވެ.
