އީރާނުގެ ބައެއް އެއަރޕޯޓް ތަކާއި ވައިގެ ސަރަހައްދު ބައިނަލްއަގުވާމީ ފްލައިޓްތަކަށް ހުޅުވާލައިފި
18 އެޕްރީލު 2026 | ހޮނިހިރު 09:48އީރާނުގެ އިރުމަތީ ސަރަހައްދުގެ ވައިގެ މަގުތަކާއި ތެހެރާންގެ މައި އެއާޕޯޓް ހިމެނޭހެން ޖުމްލަ ހަ އެއާޕޯޓެއް ބައިނަލްއަގުވާމީ ދަތުރުތަކަށް އަލުން ހުޅުވާލައިފި. އެ ގައުމުގެ ސިވިލް އޭވިއޭޝަނުން މިކަން އިއުލާން ކުރި ނަމަވެސް، ސަލާމަތީ ސަބަބުތަކަށްޓަކައި ގިނަ އެއާލައިންތަކުން އަދިވެސް ދަނީ އީރާނުގެ ވައިގެ ސަރަހައްދު ބޭނުންނުކޮށް އެހެން މަގުތަކުން ދަތުރުކުރަމުން. އެހެންކަމުން، ވައިގެ ސަރަހައްދު ހުޅުވާލިތާ ގަޑިއިރުތަކެއް ވީއިރުވެސް ބައިނަލްއަގުވާމީ ފްލައިޓްތަކުގެ ހަރަކާތްތައް އެ ސަރަހައްދުން އަދި ފެނިފައެއް ނުވޭ.
އީރާނުގެ ގައުމީ އެއާލައިން، އީރާން އެއާ އަށް ފޯރުކޮށްދޭ މަތިންދާބޯޓުތަކުގެ ފުރަތަމަ ބެޗުގެ ބޯޓުތައް ގެނައުމަށްޓަކައި، 12 ޖެނުއަރީ 2017 ގައި އެއާބަސް އޭ321 މަރުކާގެ މަތިންދާބޯޓެއް ވެރިރަށް ތެހެރާންގެ މެހެރްއާބާދު އިންޓަނޭޝަނަލް އެއާޕޯޓަށް ޖައްސަނީ. | ގެޓީ އިމޭޖަސް
އީރާންގެ އިރުމަތީ ސަރަހައްދުގެ ވައިގެ ސަރަހައްދު، އެ ގައުމުގެ މަތިން ދަތުރުކުރާ ބައިނަލްއަގުވާމީ ފްލައިޓްތަކަށް ހޮނިހިރު ދުވަހު އަލުން ހުޅުވާލާފައިވާ ކަމަށް އެ ގައުމުގެ ސިވިލް އޭވިއޭޝަން އޮތޯރިޓީން ބުނެފިއެވެ.
އީރާންގެ ސިވިލް އޭވިއޭޝަން އޮތޯރިޓީން ނެރުނު ބަޔާނެއްގައި ބުނީ، އެ ގައުމުގެ އިރުމަތީ ސަރަހައްދުގެ ވައިގެ މަގުތައް ބައިނަލްއަގުވާމީ ފްލައިޓްތަކަށް މިހާރު ހުޅުވާލާފައިވާ ކަމަށެވެ. އަދި ހޮނިހިރު ދުވަހުގެ ހެނދުނު 7:00 (ޖީއެމްޓީން 03:30) އިން ފެށިގެން ބައެއް އެއާޕޯޓްތައް ވެސް އަލުން ހުޅުވާލާފައިވާ ކަމަށް އެ އިދާރާއިން ބުނެފައިވެއެވެ.
އީރާނުން މިކަން އިއުލާން ކުރިތާ ތިން ގަޑިއިރަށް ވުރެ ގިނަ އިރު ވެފައިވީ ނަމަވެސް، ފްލައިޓްތައް ދަތުރުކުރާ ގޮތް ބަލާ ވެބްސައިޓްތަކުން ދައްކާ ގޮތުގައި އެ ގައުމުގެ ވައިގެ ސަރަހައްދުން އަދިވެސް ބައިނަލްއަގުވާމީ އެއްވެސް ފްލައިޓެއް ދަތުރެއް ނުކުރެއެވެ. އަދި ގިނަ އެއާލައިންތަކަކުން އަދިވެސް ދަނީ އީރާންގެ ވައިގެ ސަރަހައްދަށް ނުވަދެ، ދުރު މަގުތަކުން ދަތުރުކުރަމުންނެވެ.
މީގެ އިތުރުން އީރާނުން ބުނީ ތެހެރާންގެ އިމާމް ޚުމައިނީ އެއާޕޯޓާއި، މަޝްހަދު، ބިރްޖަންދު، ގުރުގާން އަދި ޒާހިދާން އެއާޕޯޓް ހިމެނޭހެން ޖުމްލަ ހަ އެއާޕޯޓެއް މިހާރު އަލުން ހުޅުވާލާފައިވާ ކަމަށެވެ.
