އިންޑިއާ އަށް ދައްކަންޖެހޭ 400 މިލިއަން ޑޮލަރުގެ ކަރަންސީ ސްވޮޕްގެ މުއްދަތު އިތުރުކުރުމަށް ހުރަސްތަކެއް ކުރިމަތިވެއްޖެ!

އިންޑިއާގެ ކަރަންސީ ސްވޮޕް ފެސިލިޓީގެ މުއްދަތު އިތުރުކޮށްދިނުމަށް ދިވެހިރާއްޖެއިން އެދިފައިވާ އެދުމަށް، އެ ނިޒާމު ހިންގުމަށް ކަނޑައަޅާފައިވާ އުސޫލުތަކާއި ގަވާއިދުތަކުގެ ސަބަބުން ހުރަސްތަކެއް ކުރިމަތިވެފައިވާ ކަމަށް މިކަމުގެ މައުލޫމާތު އެނގޭ ފަރާތްތަކުން ބުނެފި ކަމަށް ހިންދުސްތާން ޓައިމްސް އިން ރިޕޯޓް ކޮށްފި އެވެ. 

ފާއިތުވި އަހަރުތަކުގައި ރާއްޖެއަށް ކުރިމަތިވި ބޭރު ފައިސާގެ ދަތިކަމާއި ދަރަނީގެ މައްސަލަތަކުން އަރައިގަތުމަށް އިންޑިއާއިން ވަނީ މުހިންމު ދައުރެއް އަދާކޮށްފައެވެ. މިގޮތުން ސާކް ކަރަންސީ ސްވޮޕް ފްރޭމްވޯކްގެ ދަށުން ކްރެޑިޓް ލައިންތަކާއި އެހީތެރިކަން ފޯރުކޮށްދީފައިވެއެވެ. މީގެ ތެރޭގައި 2024 ވަނަ އަހަރުގެ އޮކްޓޫބަރު މަހު ދޫކުރި 400 މިލިއަން ޑޮލަރުގެ ކަރަންސީ ސްވޮޕް ފެސިލިޓީ ހިމެނޭއިރު، މިއީ ރާއްޖޭގެ މާލީ ދަތިތަކަށް ހައްލެއް ހޯދުމަށް ދިން ކުރު މުއްދަތުގެ އެހީއެއް ކަމަށް ވެސް އެ ނޫހުގައިވެ އެވެ.

މައުލޫމާތު އެނގޭ ފަރާތްތަކާ ހަވާލާދީ ހިންދުސްތާން ޓައިމްސް އިން ބުނި ގޮތުގައި، 2024 ވަނަ އަހަރުގެ އޮކްޓޫބަރު މަހު ދޫކުރި ކަރަންސީ ސްވޮޕް ފެސިލިޓީ އަށް ހަރުކަށި އުސޫލުތަކެއް އޮތް ނަމަވެސް ދެ ފަހަރެއްގެ މަތިން ވަނީ މުއްދަތު އާކޮށްދީފައެވެ. މީގެ އިތުރުން، 2025 ވަނަ އަހަރުގެ މެއި އަދި ސެޕްޓެމްބަރު މަހު މުއްދަތު ހަމަވި 50 މިލިއަން ޑޮލަރުގެ ދެ ޓްރެޜަރީ ބިލެއްގެ މުއްދަތު ވެސް އިންޑިއާއިން ވަނީ އިތުރު އެއް އަހަރަށް އިތުރުކޮށްދީފައެވެ. މި ފިޔަވަޅުތަކަކީ ގާތް އަވަށްޓެރިއަކަށް އިންޑިއާއިން ދިން "ޚާއްސަ އިސްތިސްނާ" އެހީތެރިކަމެއްގެ ގޮތުގައި އެ ފަރާތްތަކުން ސިފަކުރެއެވެ.

ކަރަންސީ ސްވޮޕް ފެސިލިޓީގެ މުއްދަތު އަނެއްކާވެސް އިތުރުކޮށްދިނުމަށް ރާއްޖެއިން ދާދިފަހުން ވަނީ އިންޑިއާގައި އެދިފައެވެ. ނަމަވެސް، އިންޑިއާ ސަރުކާރުން މި ހުށަހެޅުން ދިރާސާކުރަމުންދާއިރު، އެ ފެސިލިޓީގެ މިހާރުގެ އުސޫލުތަކާއި ޝަރުތުތައް ހުރިގޮތުން އެކަމަށް ހުއްދަ ދިނުމަކީ ވަރަށް ދަތި ކަމެއް ކަމަށް މައުލޫމާތު ލިބެއެވެ. މީގެ ތެރޭގައި ފައިސާ ނެގުމުގެ ދެ މަރުހަލާގެ ދެމެދުގައި އޮންނަންޖެހޭ މުއްދަތާއި، އެންމެ ގިނަވެގެން މުއްދަތު އިތުރުކުރެވޭނެ އަދަދު ހަމަވެފައިވުން ހިމެނެއެވެ.

ރައީސް ޑރ. މުހައްމަދު މުއިއްޒު "އިންޑިއާ އައުޓް" ކެމްޕޭނަކާއެކު ވެރިކަމަށް ވަޑައިގެން، ޗައިނާއާ ގާތް ގުޅުމެއް ބޭއްވުމަށް މަސައްކަތް ކުރެއްވުމާ ގުޅިގެން މީގެ އަހަރުތަކެއް ކުރިން ދެ ގައުމުގެ ގުޅުން ވަރަށް ބޮޑަށް ހީނަރުވިއެވެ. ނަމަވެސް، 2024 ވަނަ އަހަރު ބޭއްވި ބޮޑުވަޒީރު ނަރެންދުރަ މޯދީގެ ހުވާކުރުމުގެ ރަސްމިއްޔާތަށް ރައީސް މުއިއްޒަށް ދައުވަތު ދެއްވުމާ ގުޅިގެން ދެ ގައުމުގެ ގުޅުން އަލުން ރަނގަޅުވާން ފެށިއެވެ.

ދެ ގައުމުގެ ގުޅުން އިތުރަށް ބަދަހިވެގެންދިޔައީ 2024 ވަނަ އަހަރުގެ އޮކްޓޫބަރު މަހު ރައީސް މުއިއްޒު އިންޑިއާއަށް ކުރެއްވި ދަތުރުފުޅުގައެވެ. އެ ދަތުރުފުޅުގައި ބޭރު ފައިސާގެ ދަތިކަމުން އަރައިގަތުމަށްޓަކައި 6،300 ކްރޯޑް އިންޑިއަން ރޫޕީސްއަށްވުރެ ގިނަ އަދަދެއްގެ އެހީތެރިކަން ރާއްޖެއަށް ފޯރުކޮށްދިނުމަށް އިންޑިއާއިން އެއްބަސްވިއެވެ. މީގެ ތެރޭގައި 100 މިލިއަން ޑޮލަރުގެ ޓްރެޜަރީ ބިލްތަކުގެ މުއްދަތު އިތުރުކުރުމާއި، 400 މިލިއަން ޑޮލަރު އަދި 3،000 ކްރޯޑް ރުޕީސްގެ ކަރަންސީ ސްވޮޕް އިންތިޒާމުތައް ހިމެނެއެވެ.

މެދުއިރުމަތީގެ ހަނގުރާމައިގެ ސަބަބުން ރާއްޖޭގެ އިގްތިސާދީ ހާލަތު މިހާރު ވަނީ އިތުރަށް ގޯސްވެފައެވެ. ޚާއްސަކޮށް ގަލްފުގެ މުއްސަނދި ގައުމުތަކުން ރާއްޖެއަށް އަންނަ ފަތުރުވެރިންގެ އަދަދު ވަރަށް ބޮޑަށް މަދުވެ، ހަކަތައިގެ އަގުތައް ވަނީ އުފުލިފައެވެ. މި ހާލަތުގެ ސަބަބުން އިތުރު ލޯނުތައް ހޯދުމަށް ރާއްޖެއަށް ކުރިމަތިވެފައިވާ ގޮންޖެހުންތައް އިތުރުވެދާނެ ކަމަށް މައުލޫމާތު އެނގޭ ފަރާތްތަކުން ބުނެއެވެ.

މާލީ ހާލަތު އިތުރަށް ނާޒުކުވެފައިވަނީ އޭޕްރީލް މަހު ދައްކަންޖެހޭ ގާތްގަނޑަކަށް 1 ބިލިއަން ޑޮލަރުގެ ދަރަނީގެ ސަބަބުންނެވެ. މީގެ ތެރޭގައި 500 މިލިއަން ޑޮލަރުގެ ސުކޫކް ބޮންޑާއި، އިންޑިއާއާއެކު ހަދާފައިވާ 400 މިލިއަން ޑޮލަރުގެ ކަރަންސީ ސްވޮޕް ހިމެނެއެވެ. ދިވެހި ސަރުކާރުން އޭޕްރީލް 1 ވަނަ ދުވަހު އިއުލާންކުރި ގޮތުގައި، 500 މިލިއަން ޑޮލަރުގެ ސުކޫކް ބޮންޑާއި އޭގެ އިންޓްރެސްޓްގެ ގޮތުގައި ދައްކަންޖެހޭ 24.68 މިލިއަން ޑޮލަރު މިހާރު ވަނީ ރިޒާވް އަދި ސޮވެރިން ޑިވެލޮޕްމަންޓް ފަންޑުން ދައްކާފައެވެ.

ކަރަންސީ ސްވޮޕް ފެސިލިޓީގެ މުއްދަތު އިތުރުކޮށްދިނުމަށް ރާއްޖެއިން އެދިފައިވާ އެދުމަށް އިންޑިއާއަށް އިޖާބަ ނުދެވިއްޖެނަމަ، ކުރިއަށް އޮތް ކުރު އަދި މެދު ރާސްތާގައި ރާއްޖޭގެ އިގްތިސާދަށް ކުރިމަތިވެފައިވާ މާލީ ގޮންޖެހުންތައް އިތުރަށް ބޮޑުވެގެންދާނެ ކަމަށް މައުލޫމާތު އެނގޭ ފަރާތްތަކުން ލަފާކުރާ ކަމަށް ހިންދުސްތާން ޓައިމްސް އިން ރިޕޯޓު ކޮށްފައިވެ އެވެ.