ފެންނަ ނުފެންނަ ވޯޓާ މެދު ދެވަނަ ވިސްނުމަކަށް ދާން ރައީސް ނަޝީދު ގޮވާލައްވައިފި
12 މާރިޗު 2026 | ބުރާސްފަތި 20:57ރާއްޖޭގެ އިގްތިސާދީ ހާލަތު ރަނގަޅުކުރުމަށް އިންޑިއާގެ އެހީތެރިކަމަށް އެދޭއިރު، ރާއްޖެއަކީ ޒިންމާދާރު އަދި ޑިމޮކްރަސީ ވަރުގަދަ ގައުމެއްކަން ސާބިތުކޮށްދޭންޖެހޭ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ. އިންތިހާބުތައް އެއްކޮށްލުމުގެ ބަހުސް ހޫނުވެފައިވާއިރު، އިދިކޮޅު ފަރާތްތަކުން ތުހުމަތުކުރާ ގޮތުގައި މިއީ ޑިމޮކްރަސީއަށް އޮތް ނުރައްކަލެއް.
އެމްޑީޕީ ޖަލްސާ އެއްގައި ކުރީގެ ރައީސް މުހައްމަދު ނަޝީދު ވާހަކަ ދައްކަވަނީ | އެމްޑީޕީ
ރިޔާސީ އިންތިހާބާއި މަޖިލިސް އިންތިހާބު އެއްކޮށްލުމާ ގުޅޭގޮތުން ރައްޔިތުންގެ މެދުގައި ނަގާ ފެންނަ ނުފެންނަ ވޯޓާ ގުޅިގެން ސަރުކާރުން ދެވަނަ ވިސްނުމަކަށް ދިޔުމަށް ކުރީގެ ރައީސް މުހައްމަދު ނަޝީދު ގޮވާލައިފި އެވެ.
ބުރާސްފަތި ދުވަހު ރައީސް ނަޝީދު އެކްސްގައި ކުރެއްވި ޕޯސްޓެއްގައި ވަނީ މިކަމުގެ އިތުރުން ތެޔޮ ހޯދަން ދަތި މި ދަނޑުވަޅުގައި ރައީސް މުއިއްޒު ތެޔޮ ހޯދަން އިންޑިއާގެ އެހީއަށް އެދުނު ވާހަކައަށް އަލިއަޅުވާލައްވައި، ޚަރަދު ކުޑަކުރުމުގެ ވާހަކަ ވެސް ދައްކަވާފަ އެވެ.
ރާއްޖެ އިން ތެލުގެ އެހީތެރިކަމަށް އިންޑިއާގެ ކިބައިން އެދޭއިރު ރާއްޖެ އަކީ ޒިންމާދާރު ބައެއްކަން ވެސް ސާބިތުކޮށްދޭންޖެހޭ ކަމަށް ރައީސް ނަޝީދު ވިދާޅުވި އެވެ. އެގޮތުން ސަރަހައްދީ ހަމަޖެހުމާއި ކުރިއެރުމަށްޓަކައި ރާއްޖޭގައި ޑިމޮކްރަސީ ވަރުގަދަކުރުމަކީ ކޮންމެހެން ބޭނުންތެރި ކަމެއް ކަމަށް އެމަނިކުފާނު ވިދާޅުވި އެވެ.
އެ މަނިކުފާނު ވިދާޅުވީ، ރާއްޖެއިން ބޭނުންޖެހުނު ކޮންމެ ވަގުތެއްގައި އިންޑިއާ އިން އެހީގެ އަތް ދިއްކޮށްލާފައިވާ ކަމަށެވެ. އެގޮތުން 1988 ގެ ބަގާވާތާއި، ސުނާމީ ކާރިސާ، ފެނުގެ ދަތިކަން އަދި ކޯވިޑް-19 ގެ ބަލިމަޑުކަން ފަދަ ނުރައްކާތެރި ދަނޑިވަޅުތަކުގައި އިންޑިއާ އިން ވަނީ ރާއްޖެ އަށް އެހީތެރިކަން ފޯރުކޮށްދީފައި ކަމަށް ރައީސް ނަޝީދު ފާހަގަކުރެއްވި އެވެ.
ރައީސް ނަޝީދު ވިދާޅުވީ، ރާއްޖޭގެ ޑިމޮކްރަސީ ހަރުދަނާކުރުން ކޮންމެހެން ބޭނުންތެރި ކަމަށެވެ. އެ ގޮތުން، ގާނޫނުއަސާސީ އަށް ގެންނަ ކޮންމެ އިސްލާހެއް ގެންނަންވާނީ އަވަސް އަރުވާލުމުގެ ބަދަލުގައި، އެންމެހާ ފަރާތްތަކާ ފުޅާ ދާއިރާއެއްގައި މަޝްވަރާކޮށްގެން ކަމަށް އެ މަނިކުފާނު ވިދާޅުވި އެވެ.
އަވަސް އަރުވާލައިގެން ގާނޫނު އަސާސީ އަށް ބަދަލު ގެނައުމަކީ ކުޅިވަރަކަށް ހަދައިގެން ދެ އިންތިހާބު އެއްކޮށްލަން ސަރުކާރުން މަސައްކަތް ކުރަނީ، ހީލަތްތެރި ރޭވުންތަކެއްގެ ދަށުން ރާއްޖޭގައި ހުދުމުހުތާރު ވެރިކަމެއް ގާއިމު ކުރުމަށްކަމަށް އިދުކޮޅޫ ފަރާތްތަކުން ތުހުމަތު ކުރެ އެވެ.
އެޕްރީލް 4، ގައި ރެފެރެންޑަމް ވޯޓު ނަގާއިރު އެ ދުވަހު ލޯކަލް ކައުންސިލް އިންތިހާބު ވެސް ބާއްވަން އޮތީ ތާވަލުކޮށްފަ އެވެ. ކައުންސިލް އިންތިހާބާއި ރެފެރެންޑަމްގައި ވޯޓު ދިނުމުގެ ހައްގު ލިބިގެންވަނީ ޖުމްލަ 294،937 މީހުންނަށެވެ.
