ތެލުގެ އަގު ބޮޑުވާން ޖެހޭނެ ކަމަށް ގަބޫލުކުރަން: ޒަމީރު
25 މާރިޗު 2026 | ބުދަ 14:48ރާއްޖޭގައި ތެލުގެ އަގު ބޮޑުކުރަން ޖެހޭނެ ކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެ. މިނިސްޓަރު ވިދާޅުވީ ތެލުގެ އަގު ކަނޑައެޅުމުގައި ސްޓޮކާއި ކޭޝްފްލޯއަށް ބަލާނެ ކަމަށާއި، އަގަށް ބަދަލު ގެނައި ނަމަވެސް މަސްވެރިކަން ފަދަ ނާޒުކު ދާއިރާތަކަށް ސަރުކާރުން ދޭ ސަބްސިޑީ މެދުނުކެނޑި ކުރިއަށްދާނެ ކަމަށް. އަދި ތެލުގެ އަގު ބޮޑުކުރާނީ އެކަމުގެ ސަބަބުން ސިނާއަތްތަކަށް ކުރާނެ އަސަރުތައް ވަރަށް ބޮޑަށް މޮނިޓަރު ކުރުމަށްފަހު ކަމަށް ވެސް މިނިސްޓަރު ފާހަގަކުރެއްވި.
ފިނޭންސް މިނިސްޓަރު މޫސާ ޒަމީރު | ރައީސް އޮފީސް
ރާއްޖޭގައި ތެލުގެ އަގު ބޮޑުވާން ޖެހޭނެ ކަމަށް ގަބޫލުކުރައްވާ ކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެ އެވެ.
މިނިސްޓަރު މިހެން ވިދާޅުވީ ރައީސް އޮފީހުގައި ބުދަ ދުވަހުގެ މެންދުރު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުންނެވެ.
މިނިސްޓަރު ޒަމީރު ވިދާޅުވީ، ބައިނަލްއަގުވާމީ މާކެޓްސް ޕްލެޓްސްގެ ރޭޓުތަކަށް ބަލާއިރު، އިއްޔެ ތެލުގެ އަގުތައް ހުރީ ދަށުގައި ކަމަށެވެ. ރާއްޖެއަށް ތެޔޮ ގަންނަނީ ޕްލެޓްސްގެ ރޭޓަށް ބަލައިގެން ކަމަށާއި، ބްރެންޓް ކްރޫޑް ފަދަ މިންގަނޑުތަކުން ބެލި ނަމަވެސް އެވްރެޖް އަގުތައް މިހާރު ހުރީ ދަށަށް ގޮސްފައި ކަމަށް އޭނާ ފާހަގަކުރެއްވި އެވެ. މީގެ އިތުރުން، މެދުއިރުމަތީގެ ހަނގުރާމައިގެ ހާލަތާ ގުޅިގެން މާކެޓަށް އަންނަ ބަދަލުތައް ސަރުކާރުން ވަރަށް ގާތުން ބަލަމުންދާ ކަމަށް ވެސް ވިދާޅުވި އެވެ.
ތެލުގެ އަގު ބޮޑުކުރުމާ ގުޅޭގޮތުން ވާހަކަދައްކަވަމުން މިނިސްޓަރު ވިދާޅުވީ، ތެލުގެ އަގު ބޮޑުވާން ޖެހޭނެ ކަމަށް އެންމެން ވެސް ގަބޫލުކުރަން ޖެހޭ ކަމަށެވެ. މީގެ ކުރިން ވެސް ތެލުގެ އަގު ބޮޑުނުކޮށްގެން ސުވާލުތައް އަމާޒުވި ކަމަށާއި، ނަމަވެސް އޭރު އަގު ބޮޑުނުކުރީ ސްޓޮކުގައި ހުރި ތެލުގެ ޝިޕްމަންޓްތަކަށް ރިޢާޔަތްކޮށްފައި ކަމަށް ޒަމީރު ވިދާޅުވި އެވެ.
ދެން ތެލުގެ އަގުބޮޑުވުމުގެ ކަންތައްތައް؛ އަޅުގަނޑަށް ހީވަނީ، އަޅުގަނޑުމެން އެންމެން ގަބޫލުކުރަން ދެއްތޯ ތެލުގެ އަގު ބޮޑުވާން ޖެހޭނެ ކަމަށް. އަޅުގަނޑަށް ކުރިން ސުވާލު އައީ ތެލުގެ އަގުބޮޑު ނުކޮށްގެން. އަޅުގަނޑު އެކަމަކު ނުކުރާނަމޭ ބުނީ، އޭރު ހުރި ޝިޕްމަންޓް ނުކުރާނަމޭ. އޭގެ ކުރިން އަޅުގަނޑުމެން އެހެރީ އެ ޝިޕްމަންޓްގެ އެންޓިސިޕޭޝަނަށް އަގުތައް ރަނގަޅުކޮށްފައޭ. ދެން އެންމެ ފުރަތަމައިނުން އަޅުގަނޑުމެން އޭރުގައި ހުރި، ސްޓޮކުގައި ހުރި ތެޔޮ؛ އަޅުގަނޑު ކުރީ ދުވަހެއްގައި ވެސް ވާހަކަ ދައްކަމުން ކިޔައިދިނީ ވަރަށް ރަނގަޅަށް، ތެލުގެ އަގުހަދާ ގޮތާއި، ތެލުގެ ސްޓޮކް ގެންގުޅޭ ގޮތާ.ފިނޭންސް މިނިސްޓަރު މޫސާ ޒަމީރު
ރާއްޖޭގައި ތެލުގެ އަގު ކަނޑައެޅުމުގައި އޮންނަ އުނދަގޫތަކަށް އަލިއަޅުއްވާލައްވަމުން މިނިސްޓަރު ވިދާޅުވީ، ޔޫއޭއީ ފަދަ ގައުމުތަކުގައި ކޮންމެ މަހަކު އެއްފަހަރު އަގުތައް މުރާޖައާކޮށް އާންމުކުރާ ކަމަށެވެ. ރާއްޖޭގައި ވެސް ސްޓޮކަށް ބަލައި، ކޭޝްފްލޯއަށް ބޭނުންވާ މިންވަރާއި ލިބެންޖެހޭ ރިޓާންއަށް ރިޢާޔަތްކޮށް އަގުތަކަށް ބަދަލު ގެންނަ ކަމަށް އޭނާ ވިދާޅުވި އެވެ. އަދި އަގަށް ބަދަލު ގެނައި ނަމަވެސް، މަސްވެރިކަން ފަދަ ނާޒުކު ދާއިރާތަކަށް ސަރުކާރުން ސަބްސިޑީ ދެމުންގެންދާނެ ކަމުގެ ޔަގީންކަން މިނިސްޓަރު ދެއްވި އެވެ.
މިނިސްޓަރު އިތުރަށް ވިދާޅުވީ، އެންމެ ފަހުން ގެނައި ޝިޕްމަންޓްތަކުގެ އަގު ބޮޑުވި ނަމަވެސް، ކުރިއަށް އޮތް ތަނުގައި އަގުތައް ދަށަށްދާނަމަ އެވްރެޖްކޮށް އަގުތައް ހިފެހެއްޓޭނެ ކަމަށެވެ. ތެލުގެ އަގު ބޮޑުކުރަން ޖެހޭނެ ކަމަށް އެންމެން ގަބޫލުކުރި ނަމަވެސް، ސަރުކާރުން ބަލަނީ އެކަން ކުރާނެ ގޮތަކާއި، ބޮޑުކުރާނީ ކޮން އިންޑަސްޓްރީތަކަކަށްތޯ ބަލައި، އެކަންކަން ވަރަށް ބޮޑަށް މޮނިޓަރު ކުރަމުންދާ ކަމަށް މިނިސްޓަރު ޒަމީރު ވިދާޅުވި އެވެ.
