އަރަބި ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް އީރާނުން ހަމަލާދިނުމަކީ ދިވެހިރާއްޖެ އަށް ހަމަލާ ދިނުން ފަދަކަމެއް: ޒަމީރު
އެމެރިކާ އަދި އިޒްރޭލުން އަރަބި ގައުމުތަކުގައި ހުރި އެމެރިކާގެ އަސްކަރީ މަރުކަޒުތައް ބޭނުންކޮށްގެން އިރާނަށް ހަމަލާދެމުން ދާކަމަށް އިރާނުން ތުހުމަތުކުރޭ. އަދި އިރާނަށް ހަމަލާދިނުމަށް އަރަބި ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކުގެ އިތުރުން، ވައިގެ ސަރަހައްދު އެމެރިކާއަށް ހުޅުވާލުމަކީ މި ހަނގުރާމައިގައި އިރާނާއި ދެކޮޅަށް އަރަބި ގައުމުތަކުން ސީދާ ބައިވެރިވުން ކަމަށް އިރާނުން ބުނޭ.
ރައީސް ޑރ. މުހައްމަދު މުއިއްޒުގެ ފިނޭންސް މިނިސްޓަރު މޫސާ ޒަމީރު | ރައީސް އޮފީސް
އީރާނަށް ހަމަލާ ދިނުމަށް އެމެރިކާ އިން ބޭނުންކުރާ އަރަބި ގައުމުތަކުގައި ގާއިމްކޮށްފައިވާ އެގައުމުގެ އަސްކަރީ މަރުކަޒުތަކަށް އީރާނުން ހަމަލާދިނުމަކީ، ދިވެހިރާއްޖޭގައި އެމެރިކާގެ ޓޫރިސްޓުން އުޅޭކަމަށް ބުނެ ރާއްޖެ އަށް އީރާނުން ހަމަލާދިނުމާ އެއްފަދަ ކަމެއް ކަމަށް ރައީސް މުއިއްޒުގެ ފިނޭންސް މިނިސްޓަރ މޫސާ ޒަމީރު ވިދާޅުވެއްޖެ އެވެ.
ބުދަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ޒަމީރު ވިދާޅުވީ މެދުއިރުމަތީގެ ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް އީރާނުން ހަމަލާދިނުމަކީ ގަބޫކުރެވޭ ކަމެއް ނޫންކަމަށް ވިދާޅުވެފަ އެވެ. އަދި އެއީ ރައީސް މުއިއްޒު ވެސް ނުހަނު ކަންބޮޑުވާކަމެއް ކަމަށް ޒަމީރު ވިދާޅުވި އެވެ.
މެދުއިރުމަތީގެ ގައުމުތަކުގައި ހުންނަ އެމެރިކާގެ އަސްކަރީ މަރުކަޒުތަކަށް އީރާރުން ހަމަލާދިނުން ކުށްވެރިކުރައްވައި ޒަމީރު ވަނީ، އެއީ ރާއްޖޭގައި އެމެރިކާ ޓޫރިސްޓުން އުޅެޔޭކިޔާފަ ރާއްޖެ އަށް އީރާނުން ހަމަލާ ދިނުމާ އެއްފަދަކަމެއްގެ ގޮތުގަ ސިފަކުރައްވާފަ އެވެ.
އަޅުގަނޑުމެން ހަމަ ވަރަށް ކަންބޮޑުވޭ މެދުއިރުމަތީގެ ގައުމުތަކަށް އިރާނުން ހަމަލާދޭތީ. އެގަމުތަކުން ރާއްޖެއަށް ވަރަށް އެހީވޭ. އެގަމުތަކުން އިސްވެ އިރާނާ ހަނގުރާމަ ނުކުރާއިރު، އީރާނުން އެގައުމުތަކަށް ހަމަލާދިނުމަކީ އަޅުގަނޑުމެން ގަބޫލުކުރާކަމެއް ނޫން. އިރާނުން ކުރި ނަމަވެސް، އަދި އެހެން ގައުމަކުން ކުރިކަމުގަ ވިޔަސް. އަޅުގަނޑަށް ހަމަ އުނދަގޫ ގަބޫލުކުރަން. މިސާލަކަށް ރާއްޖޭގައި އެމެރިކާގެ ޓޫރިސްޓުން ތިއްބޭ ކިޔާފަ ރާއްޖެ އަށް ހަމަލާދިނުން ފަދަ ކަމެއް ކަންނޭންގެ އެއީ. އަޅުގަނޑަށް ގަބޫލުކުރެވެނީ އެކަހަލަ ގޮތަކަށް. އެކަމު އެހެންވެގެނެއް ނުވާނެ.ފިނޭންސް މިނިސްޓަރ މޫސާ ޒަމީރު
ފިނޭންސް މިނިސްޓަރު ޒަމީރުގެ ވާހަކައިގައި އިތުރަށް ވިދާޅުވީ އަރަބި ގައުމުތަކާ މި ސަރުކާރާ އޮންނަ ގުޅުން ވަރަށް ރަނގަޅު ކަމަށެވެ. އަދި ދާދިފަހުން އެކުވެރި އަރަބި އިމާރާތުން ވެސް ވަނީ ރާއްޖެއިން އެ ގައުމުން ނަގާފައިވާ ސަތޭކަ މިލިއަން ޑޮލަރުގެ ސުކޫކެއް ދެއްކުމުގައި ލުއި ގޮތްތަކަކަށް އެއްބަސްވެފައި ކަމަށް ޒަމީރު ފާހަގަކުރެއްވި އެވެ.
އެމެރިކާ އަދި އިޒްރޭލުން އަރަބި ގައުމުތަކުގައި ހުރި އެމެރިކާގެ އަސްކަރީ މަރުކަޒުތައް ބޭނުންކޮށްގެން އީރާނަށް ހަމަލާދެމުން ދާކަމަށް އިރާނުން ތުހުމަތުކުރެ އެވެ. އަދި އިރާނަށް ހަމަލާދިނުމަށް އަރަބި ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކުގެ އިތުރުން، ވައިގެ ސަރަހައްދު އެމެރިކާއަށް ހުޅުވާލުމަކީ މި ހަނގުރާމައިގައި އީރާނާއި ދެކޮޅަށް އަރަބި ގައުމުތަކުން ސީދާ ބައިވެރިވުން ކަމަށް އިރާނުން ބުނެ އެވެ.
