ހޯރަފުށީ ހޮސްޕިޓަލްގެ މަޝްރޫއުގެ ސްޕީޑް ވަރަށް ލަސް، މިއަހަރު ޚިދުމަތެއް ނުދެވޭނެ: ވަހީދު
ވަހީދު ވިދާޅުވީ ހޯރަފުށީގައި އަޅާ އައު ހޮސްޕިޓަލުގެ މަސައްކަތް މިހާރު ކުރިއަށްދާ ސްޕީޑަށް ބަލާއިރު، މިއަހަރުގެ ތެރޭގައި އެތަން ނިންމައި ޚިދުމަތް ދެވޭނެ ކަމަށް ގަބޫލުނުކުރެވޭ ކަމަށް. ނަމަވެސް ސަރުކާރުން މީގެ ކުރިން ހާމަކޮށްފައިވަނީ ހޯރަފުށި ހިމެނޭހެން ރާއްޖޭގެ 6 ރަށެއްގައި ތަރައްގީކުރާ ހޮސްޕިޓަލްތަކުގެ މަސައްކަތް މިއަހަރު ނިންމާލެވޭނެ ކަމަށް. ކުރީ ސަރުކާރުގައި އަމަލީ މަސައްކަތް ފެށި މި މަޝްރޫއަކީ ރަށުގެ އާބާދީއަށް ސިއްހީ ފަރުވާގެ ފެންވަރު ރަނގަޅު ކުރުމަށްޓަކައި ރައްޔިތުން ނުހަނު ބޭނުންވެފައިވާ މުހިންމު މަޝްރޫއެއް.
ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ހއ.ހޯރަފުށީ ހޮސްޕިޓަލްގެ އަމަލީ މަސައްކަތް ފެށި ރަސްމިއްޔާތުގެ ތެރެއިން. | ސޯޝަލް މީޑިއާ
ހއ. ހޯރަފުށީ ހޮސްޕިޓަލް ގެ މަޝްރޫއު މިއަހަރުގެ ތެރޭގައި ނިންމާ ޚިދުމަތް ދޭން ނުފެށޭނެ ކަމަށް އެރަށުގެ ކައުންސިލް ރައީސް މުހައްމަދު ވަހީދު ވިދާޅުވެއްޖެ އެވެ.
ފަށާއިރު ޕްރޮގްރާމްގައި ވަހީދު ވިދާޅުވީ، ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ސިއްހީ ޚިދުމަތުގެ ފެންވަރު ރަނގަޅު ކުރުމަށް ވަރަށް ގިނަ މަސައްކަތްތައް ކުރެވުނު ކަމަށެވެ.
އެމަސައްކަތުގެ ދަށުން އައު ހޮސްޕިޓަލެއް އިމާރާތް ކުރުމަށް އެއްބަސްވުމުގައި ސޮއިކޮށް އަމަލީ މަސައްކަތް ފެށުނު ކަމަށް އޭނާ ވިދާޅުވި އެވެ. ނަމަވެސް މިސަރުކާރާއެކު، ހޮސްޕިޓަލް ގެ އަމަލީ މަސައްކަތް ކުރިއަށް ދާ ސްޕީޑް ވަރަށް ލަސް ކަމަށާއި، މި އަހަރު ވެސް މިމަޝްރޫއު ނިންމައި، ޚިދުމަތް ނުދެވޭނެ ކަމަށް އޭނާ ވިދާޅުވި އެވެ.
އަޅުގަނޑުމެންގެ ދައުރުގައި ވަރަށް ބޮޑު ލުއި ފަސޭހައަކަށް ރައްޔިތުންނަށް އެ ހޮސްޕިޓަލް ގެ އަމަލީ މަސައްކަތް ފެށީ އެނގޭތޯ. އެންމެ ބާރު ސްޕީޑްގައި ނުދިޔަ ކަމުގައި ވިޔަސް ކޮންމެވެސް ވަރަކަށް ހުއްޓުމެއްނެތި މަޑުމަޑުން ހޮސްޕިޓަލް ގެ މަސައްކަތް ކުރިއަށް އެބަ ދޭ. އެހެންނަމަވެސް ދަންނަވަންތޯ މިއަހަރު ނިމުމާ ހަމައަށްދާއިރު ވެސް މިދާ ރޭޓުގައި ދާ ކަމަށްވަންޏާ ނިމި ޚިދުމަތަށް އަންނާނެ ކަމަކަށް ގަބޫލެއް ނުކުރެވޭ. ކޮންމެ ޕްރޮޖެކްޓެއް ވެސް މިއިންނަނީ ވަރަށް ބޮޑަށް ސްލޯވެފައި.ހޯރަފުށީ ކައުންސިލް ރައީސް މުހައްމަދު ވަހީދު
ރާއްޖޭގެ އެކި ސަރަހައްދުތަކުގައި ތަރައްގީކުރަމުން އަންނަ 6 ހޮސްޕިޓަލެއްގެ މަސައްކަތާ ގުޅޭގޮތުން ދައުލަތުގެ މީޑިއާގެ ރިޔާސީ ބަޔާން ޕޮޑްކާސްޓްގައި ހެލްތް މިނިސްޓްރީގެ ސްޓޭޓް މިނިސްޓަރު އިސްމާއީލް ޝަރީފް ވިދާޅުވީ ހއ. ހޯރަފުށި، ނ.ކެނދިކުޅުދޫ، ރ.ދުވާފަރު، ބ.ތުޅާދޫ، ޅ.ހިންނަވަރު، ކ.ގުރައިދޫގެ ހޮސްޕިޓަލް ތަރައްގީ ކުރުމުގެ މަސައްކަތް މިއަހަރު ނިންމާ ޚިދުމަތް ދޭނެ ކަމަށެވެ.
ހއ. ހޯރަފުށީ ސިއްހީ ފަރުވާ ރަނގަޅުކޮށްދިނުމަކީ 2023 ގެ ރިޔާސީ އިންތިޚާބުގެ ކެމްޕެއިންގައި ރައީސް މުއިއްޒު ވެވަޑައިގެންނެވި ވައުދަށްވާއިރު، ކުރީ ސަރުކާރުގައި އެރަށުގައި 30 އެނދުގެ ހޮސްޕިޓަލެއް އެޅުމުގެ އަމަލީ މަސައްކަތް 6 ސެޕްޓެންބަރު 2023 ގައި ވަނީ ފަށާފަ އެވެ.
3500އެއްހާ މީހުންގެ އާބާދީއެއް އޮންނަ ހޯރަފުށީގައި ސިއްހީ ޚިދުމަތުގެ ފެންވަރު ރަނގަޅު ވެގެން ދިއުމަކީ އެރަށުގެ ރައްޔިތުންގެ ވަރަށް ބޮޑު އެދުމެކެވެ.
