ހުޅުމާލޭ ފޭސް 2 ގެ ބޮޑު ސަރަހައްދަކުން ކަރަންޓު ކެނޑިއްޖެ، ކަރަންޓް ލިބޭނެ އިރެއް ނޭނގޭ
ހުޅުމާލޭ ފޭސް 2 ގެ ބައެއް ހިޔާ ޓަވަރުތަކާއި ސްކޫލްތަކުން މިއަދު މެންދުރުފަހު ކަރަންޓު ކެނޑުމާ ގުޅިގެން، އާންމު ދިރިއުޅުމަށާއި ކިޔަވައިދިނުމަށް ބޮޑެތި ދަތިތަކެއް ކުރިމަތިވެއްޖެ. ސްޓެލްކޯއިން ބުނި ގޮތުގައި މި ހިދުމަތް މެދުކެނޑުނީ ދިމާވި ޓެކްނިކަލް މައްސަލަތަކަކާ ގުޅިގެން ކަމަށާއި، އެ މައްސަލަ ހައްލުކޮށް އަލުން ކަރަންޓު ދިނުމުގެ މަސައްކަތް އެ ކުންފުނީގެ ޓީމުތަކުން ދަނީ މެދުކެނޑުމެއްނެތި ކުރަމުން. ކަރަންޓު ކެނޑުމުގެ ސަބަބުން ބައެއް ލިފްޓުތަކުގައި މީހުން ތާށިވެފައިވާއިރު، ގިނަ ބަޔަކު ވަނީ އިމާރާތްތަކުން ބޭރަށް ނުކުމެ މަގުމަތީގައި މަޑުކޮށްފައި.
ހިޔާ ފްލެޓްތައް ހުންނަ ސަރަހައްދު | ޕީއެސްއެމް
ހުޅުމާލޭ ފޭސް 2 ގެ ބޮޑު ސަރަހައްދަކުން ކަރަންޓު ކެނޑިއްޖެ އެވެ.
ހުޅުމާލޭ ފޭސް 2 ގެ ބައެއް ހިޔާ ޓަވަރުތަކާއި ސްކޫލްތަކުން ކަރަންޓް ކެނޑުނީ މެންދުރުފަހު 3:20 ހާއިރު އެވެ. މިކަމާއި ގުޅިގެން 3:21 ގައި ސްޓެލްކޯ އިން އެކްސްގައި ކުރި ޕޯސްޓެއްގައި ބުނީ ދިމާވި ޓެކްނިކަލް މައްސަލައަކާއި ގުޅިގެން ހުޅުމާލޭގެ ދެވަނަ ފިޔަވަހީގެ ބައެއް ސަރަހައްދުތަކުން ކަރަންޓުގެ ހިދުމަތް މެދުކެނޑިފައިވާ ކަމަށެވެ. އަދި މައްސަލަ ދެނަގަނެ ހައްލު ކުރުމުގެ މަސައްކަތްތައް ދަނީ ކުރެވެމުން ކަމަށެވެ.
ނަމަވެސް ކަރަންޓުގެ މައްސަލަ ހައްލު ނުވެ އޭގެ ފަހުން 4:23 ގައި ސްޓެލްކޯ އިން އެކްސްގައި ކުރި ޕޯސްޓެއްގައި ބުނީ ހުޅުމާލޭގެ ދެވަނަ ފިޔަވަހީގެ ބައެއް ޓަވަރުތަކުން ކަރަންޓުގެ ހިދުމަތް މެދުކެނޑެން ދިމާވި މައްސަލަ ދެނަގަނެ ހައްލު ކުުރުމުގެ މަސައްކަތްތައް ދަނީ ކުރެވެމުންނެވެ. ވީއެންމެ އަވަހަކަށް މައްސަލަ ހައްލު ކުރުމަށް ސްޓެލްކޯގެ މުވައްޒަފުން މަސައްކަތް ކުރަމުންދާއިރު، މައްސަލަ އެކީ ހައްލު ކުރެވި އަލުން ކަރަންޓުގެ ހިދުމަތްދޭން ގާތްގަނޑަކަށް 45 ވަރަކަށް މިނެޓް ހޭދަވާނެ ކަމަށް ބެލެވޭ ކަމަށް އެކްސްގައި ބުނެފައިވެ އެވެ.
ނަމަވެސް އޭގެ ފަހުން ދޮޅުގަޑި އިރު ވި އިރު ވެސް ކަރަންޓް ލިބިފައި ނުވެ އެވެ.
ސްޓެލްކޯ އިން ފަހުން ކުރި ޕޯސްޓެއްގައި ބުނީ ހުޅުމާލޭގެ ދެވަނަ ފިޔަވަހީގެ ބައެއް ޓަވަރުތަކަށް ކަރަންޓު ފޯރުކޮށްދިނުން މެދުކެނޑުނު މައްސަލަ ހައްލުކުރުމުގެ މަސައްކަތް ކުރިއަށްދަނިކޮށް، އިތުރު ޓެކްނިކަލް މައްސަލަތަކެއް ފާހަގަވެފައިވާތީ، އެ މައްސަލަތައް ވީ އެންމެ އަވަހަކަށް ހައްލުކުރުމަށް ޓެކްނިކަލް ޓީމުން ދަނީ ކެނޑިނޭޅި ގިނަ މަސައްކަތްތަކެއް ކުރަމުންނެވެ. މި ދަތި ވަގުތުގައި ވެސް ކަސްޓަމަރުންގެ ފަރާތުން ލިބެމުން އަންނަ އެއްބާރުލުމަށް ވަރަށް އިހްލާސްތެރިކަމާއެކު ޝުކުރު ދަންނަވާ ކަމަށާއި، އަދި ހިދުމަތް މެދުކެނޑުމުގެ ސަބަބުން ކަސްޓަމަރުންނަށް ކުރިމަތިވެދާނެ ދަތިތަކަށްޓަކައި ނިހާޔަތަށް މަޢާފަށް އެދޭކަމަށް ބުނެފައިވެ އެވެ.
ފޭސް 2 ގެ ހިޔާ ޓަވަރު 1 އިން 8 އަށް ކަރަންޓް ވަނީ ކެނޑިފަ އެވެ. އަދި އެ ސަރަހައްދުގައި ހުރި ސްކޫލްތަކުގައި ކިޔަވައި ދިނުން ވެސް ވަނީ މެދުކަނޑާލާ ދަރިވަރުން ގެއަށް ފޮނުވާލާފަ އެވެ. އަދި ކަރަންޓް ދިޔަ ގަޑީގައި ލިފްޓްތަކުގައި އެތައް ބަޔަކު ތާށިވެ، ލިފްޓް އޮޕަރޭޓް ކުރާ މީހުން ގެނެސްގެން ވަނީ ލިފްޓުން މީހުން ނެރެފަ އެވެ.
ނަމަވެސް އުސް އިމާރާތްތަކަށްވެފައި ކަރަންޓް ނެތުމުގެ ސަބަބުން ގިނަ ބަޔަކު ވަނީ މަގުމަތިވެފަ އެވެ.
