ހިޔާ 5 ވަނަ ޓަވަރުގައި އަލިފާނުގެ ހާދިސާއެއް ހިނގައިފި
30 ޖެނުއަރީ 2026 | ހުކުރު 16:39ހުޅުމާލެ ދެވަނަ ފިޔަވަހީގައި ހިޔާ ފަސްވަނަ ޓަވަރުގައި ހުކުރު ދުވަހު އަލިފާނުގެ ހާދިސާއެއް ހިނގައިފައިވާއިރު، ފަޔާ އެންޑް ރެސްކިއު ސާވިސަސް އިން ވަނީ ހަރަކާތްތެރިވެފައި.
ހިޔާ ޓަވަރެއްގެ އެޕާޓްމެންޓެއްގައި ރޯވެ ދުން އަރަނީ. | ރާއްޖެ އެމްވީ
ހުޅުމާލެ ދެވަނަ ފިޔަވަހީގައި ހުންނަ ހިޔާ ފަސްވަނަ ޓަވަރުގައި ހުކުރު ދުވަހު އިރުއޮއްސުނުހާ އިރު އަލިފާނުގެ ހާދިސާއެއް ހިނގައިފި އެވެ. މި ހާދިސާއާ ގުޅިގެން އެ ޓަވަރުގައި ދިރިއުޅޭ މީހުން ސަލާމަތީ ހިދުމަތްތަކުން ބޭރަށް ނެރެފައިވާ ކަމަށް މައުލޫމާތު ލިބިފައިވެ އެވެ.
މޯލްޑިވްސް ނޭޝަނަލް ޑިފެންސް ފޯސް އިން ބުނި ގޮތުގައި ހިޔާ ފަސްވަނަ ޓަވަރުގައި އަލިފާނުގެ ހާދިސާ އެއް ހިނގައިގެން ފަޔާ އެންޑް ރެސްކިއު ސާވިސަސް އިން މިހާރު ހަރަކާތްތެރިވަމުން އަންނަކަމަށެވެ.
މައުލޫމާތު ލިބިފައިވާ ގޮތުގައި އަލިފާނުގެ ހާދިސާ ހިނގާފައިވަނީ އެ ޓަވަރުގެ ވައިގޮޅީގައި ހުރި އައުޓްޑޯ އޭސީ ޔުނިޓެއްގަ އެވެ. ސޯޝަލް މީޑިއާގައި ދައުރުވަމުންދާ މަންޒަރު ތަކުން ފެންނަ ގޮތުގައި ރޯވެފައިވަނީ ހިޔާ 5 ވަނަ ޓަވަރުގެ ވަނީ 24 ވަނަ ފަންގިފިލާގައި ހުރި އެޕާޓްމެންޓެއްގަ އެވެ.
ސޯޝަލް މީޑިއާގައި ދައުރުވަމުންދާ ވީޑިއޯތަކާއި ފޮޓޯތަކުން ފެންނަ ގޮތުގައި އެ ޓަވަރުގެ އެންމެ މަތިން ކަޅު ދުންތަކެއް އަރަމުންދާ ތަން ފެނެ އެވެ. ނަމަވެސް ހުޅުގަނޑެއް ނުފެނެ އެވެ. އެ ހިސާބުގައި ކަޅު ދުމުގެ އަސަރު ވަރަށް ބޮޑަށް ހުރިކަން ވީޑިއޯތަކުން އެނގެ އެވެ.
ހާދިސާ ހިނގި އެޕާޓްމެންޓުން ކަޅު ދުން އަރަމުން އަންނައިރު ތިރީ ފަންގިފިލާތަކަށް ވެސް ދުމުގެ ވަސް ފެތުރިފައިވާ ކަމަށް މައުލޫމާތު ލިބިފައިވެ އެވެ.
މި ހާދިސާގައި އެއްވެސް މީހަކަށް ގެއްލުމެއް ލިބުނުކަން އަދި އެނގިފައެއް ނުވެ އެވެ.މި ހާދިސާއާ ގުޅޭ އިތުރު ތަފްސީލެއް އެމްއެންޑީއެފުން އަދި ހާމައެއް ނުކުރެ އެވެ.
